REGİONLAR
PAYTAXT BAZARLARINDA KƏND TƏSƏRRÜFATI MƏHSULLARININ QİYMƏTLƏRİNİN SÜNİ SURƏTDƏ ARTIRILMASININ QARŞISI ALINIR
BAKININ RAYONLARI NÖVBƏTİ SATIŞ YARMARKALARIN KEÇİRİLMƏSİNƏ HAZIRDIR
AZƏRTAC-ın müxbirləri paytaxtın rayonlarında yarmarkalar təşkil ediləcək yerlərdə hazırlıq işlərinin gedişi ilə tanış olmuşlar.
SURAXANI RAYONU
Əmircan qəsəbəsi, S.Bəhlulzadə küçəsi 2,
Suraxanı maşınqayırma zavodu ATSC
Rayon icra hakimiyyəti başçısının birinci müavini Hüseyn Həsənovun sözlərinə görə, burada satıcı və alıcılar üçün münasib şərait yaradılmışdır. Piştaxtalar, kölgəliklər quraşdırılmış, uzaq rayonlardan gəlmiş fermerlərə istirahət otaqları və yeməkxana ayrılmışdır. Ət və süd, digər tez xarab olan məhsulların saxlanılması üçün soyuducu kameralar quraşdırılmışdır.
Qaraçuxur qəsəbəsi “Yeni Günəşli”
yaşayış sahəsi, “Günəş” ticarət mərkəzi
Burada da satıcı və alıcılar üçün bütün şərait yaradılmışdır. Diri heyvanların kəsilməsi üçün yer ayrılmışdır.
Dindar satıcı və fermerlər də unudulmamışdır, onlar üçün ibadət otaqları müəyyənləşdirilmişdir.
İki gün davam edəcək satış yarmarkalarına Lənkəran və Cəlilabaddan gətiriləcək 100 tondan çox kənd təsərrüfatı məhsulları çıxarılacaqdır.
Yarmarkaların açılışını səbirsizliklə gözləyən sakinlər tədbirin təşkilini onlara göstərilən diqqət və qayğı kimi qiymətləndirir və buna görə, respublika rəhbərliyinə minnətdarlıq edirlər.
NƏRİMANOV RAYONU
Metronun “Nərimanov” stansiyasının yaxınlığında,
Ə.Əliyev küçəsi, 26 ünvanında, “Bakı taxıl” ASC-nin ərazisi
Burada Xaçmaz və Salyan rayonlarından gətiriləcək kənd təsərrüfatı məhsullarının satış yarmarkası ilə əlaqədar geniş hazırlıq işləri görülüb. Bu məqsədlə rayon icra hakimiyyətində xüsusi sərəncam imzalanmışdır. Sərəncamda icra hakimiyyətinin müvafiq şöbələrinin, rayondakı idarə, təşkilat və müəssisələrin konkret vəzifələri müəyyənləşdirilmişdir.
Göstərilən ünvanda piştaxtalar qurulmuş, digər zəruri işlər görülmüşdür. İyulun 22-23-də Nərimanov rayon polis idarəsinin əməkdaşları yarmarkanın keçiriləcəyi yerdə asayişi qoruyacaqlar. Rayon gigiyena və epidemiologiya mərkəzinin əməkdaşları da ərazidə olacaqlar.
Bundan əlavə, yarmarka ilə əlaqədar əhalinin məlumatlandırılması məqsədi ilə idarə, təşkilat, müəssisə və şirkətlərdə, habelə rayon ərazisində məskunlaşmış qaçqın və məcburi köçkünlərin yaşadığı yerlərdə, məhəllələrdə elanlar vurulmuşdur.
BİNƏQƏDİ RAYONU
Dərnəgül yaşayış sahəsindəki K.Rəhimov
küçəsində yerləşən 6 saylı peşə liseyinin həyəti
Yarmarka təşkil olunacaq bu ərazidə piştaxtalar və günlüklər quraşdırılıb. Ərazinin sanitariya vəziyyəti diqqət mərkəzindədir. Rayon polis idarəsinin əməkdaşları ayın 22-23-də ərazidə asayişi mühafizə edəcəklər.
Biləcəri qəsəbəsinin Məlik Aslanov küçəsindəki
284 nömrəli orta məktəbin qarşısı
Burada da ticarət aparılacaq sahədə satıcılar və alıcıların səmərəli işi üçün hər cür şərait yaradılmışdır. Ərazidə sanitariya tədbirləri görülmüş, səliqə-sahman yaradılmışdır.
Binəqədi Rayon İcra Hakimiyyətindən verilən məlumata görə, Bərdə və Ağsu rayonlarından təxminən 12 yük maşınında gətiriləcək kənd təsərrüfatı məhsullarının satışında problem olmayacaqdır.
Hər iki ünvanda satıcıların nahar etməsi üçün iaşə obyektlərində hazırlıq işləri görülmüşdür.
SƏBAİL RAYONU
Badamdar qəsəbəsinin mərkəzində
5, 7 və 9 mərtəbəli binaların həyətində,
239 nömrəli məktəbə bitişik, ətrafı hasarlanmış sahə
Burada təmizlik işləri aparılmış, əraziyə su və kanalizasiya xətləri çəkilmiş, gündən qorunmaq üçün xüsusi çətirlər hazırlanmışdır. Bir sözlə, öz məhsullarını satmağa gələn Saatlı və Masallı rayonlarının fermerləri üçün hər cür şərait yaradılmışdır.
Satışa çıxarılan məhsulların keyfiyyətini yoxlamaq üçün yarmarkada stasionar sanitar-epidemioloji stansiya fəaliyyət göstərəcəkdir.
Yerli sakinləri yarmarka barədə məlumatlandırmaq üçün elanlar və plakatlar hazırlanmışdır.
NİZAMİ RAYONU
Metronun “Əzizbəyov” ərazisindəki “Ankara”
istehsalat kommersiya firması;
Heydər Əliyev prospekti 92, “Azaqrotreyd”
ASC-nin ərazisi (keçmiş Bakı meyvə-tərəvəz bazası);
Heydər Əliyev prospekti, 105, “Keşlə maşınqayırma
zavodu” törəmə müəssisəsinin ərazisi
Bu ünvanlarda olacaq yarmarkaların yüksək səviyyədə təşkili məqsədi ilə rayon icra hakimiyyətinin, əlaqədar dövlət və ictimai təşkilatların nümayəndələrindən ibarət işçi qrupu yaradılmışdır. Hər 3 ərazidə təmizlik-abadlıq, sanitariya-dezinfeksiya işləri aparılmış, piştaxtalar, günlüklər quraşdırılmış, satıcıların burada qalması, istirahəti, onlara iaşə xidmətinin təşkili ilə bağlı lazımi tədbirlər görülmüşdür.
Rayon sakinləri Tovuz və Lənkəran fermerləri və torpaq mülkiyyətçilərinin becərdiyi müxtəlif bostan-tərəvəz məhsullarını bazardakından xeyli aşağı qiymətə ala biləcəklər.
XƏTAİ RAYONU
General Şıxlinski küçəsi 37, “Ordubad”
kiçik müəssisəsinin ticarət mərkəzi, metronun
“Həzi Aslanov” stansiyasının yaxınlığında
Bu ünvanda sakinlərə Kürdəmir, Saatlı, Quba və Şəmkirdən gətirilən müxtəlif kənd təsərrüfatı məhsulları təklif olunacaqdır. Təxminən 1000 kvadratmetrədək sahəsi olan ticarət mərkəzində kənd rayonlarından gələn fermerlər üçün hər cür şərait yaradılmışdır. Piştaxtalar təmir edilərək rənglənmişdir. Ərazidə digər abadlıq işləri də aparılmışdır. Elektrik, su xətləri və sanitariya qovşaqları təmir edilmişdir. Təmir, tikinti və abadlıq işləri rayonun daxili imkanları hesabına, rayon mənzil-kommunal təsərrüfat birliyinin və ticarət mərkəzinə yaxın mənzil istismar sahələrinin köməyi ilə həyata keçirilir.
Fermerlərin nahar etməsi üçün iaşə obyektləri, nəqliyyat vasitələrinin saxlanması üçün yer də nəzərdə tutulmuşdur.
Rayon icra hakimiyyətinin və Kənd Təsərrüfatı Nazirliyinin məsul işçiləri satış yarmarkalarına təhkim olunmuşlar. Bütün mühafizə tədbirləri görülmüşdür.
Əhmədli qəsəbəsi, Sarayevo küçəsi,
“Bakı” kinoteatrının yanı, metronun “Əhmədli”
stansiyasının yaxınlığında “Bülbülə” kiçik
müəssisəsinin “Azər” ticarət mərkəzi
Burada şənbə və bazar günlərində təşkil olunacaq yarmarkalara nümunəvi hazırlıq görülmüşdür. Rayon icra hakimiyyəti başçısının birinci müavini Zaməddin Əkbərov bildirmişdir ki, sahəsi təxminən 600 kvadratmetr olan ticarət mərkəzində fermerlər üçün hər cür şərait yaradılmışdır. Yarmarka günlərində burada çayxana və kafe fəaliyyət göstərəcəkdir. Kürdəmir, Saatlı, Quba və Şəmkirdən gətiriləcək müxtəlif çeşidli kənd təsərrüfatı məhsullarının satışı üçün piştaxtalar quraşdırılmış, ərazidə abadlıq işləri görülmüş, səliqə-sahman yaradılmışdır. Ticarət mərkəzində elektrik xətləri təzələnmiş, su təchizatı sistemi və sanitariya qovşaqları təmir edilmişdir. Nəqliyyat vasitələrindən ötrü dayanacaqlar, fermerlərin gecələməsi üçün yerlər müəyyənləşdirilmişdir.
NƏSİMİ RAYONU
Mərdanov qardaşları küçəsi 113,
“Bakı Tikiş Evi” ASC-nin həyəti
(keçmiş Volodarski fabriki)
Rayon icra hakimiyyəti başçısının müavini Zahid Xəlilov demişdir ki, yarmarkanın keçirilməsi üçün satış yerləri düzəldilmiş, piştaxtalar və çətirlər qurulmuşdur. Alıcı və satıcılar üçün bütün şərait yaradılmış, 900 kvadratmetr sahəyə asfalt döşənmişdir. Yarmarka günləri əraziyə rayon gigiyena və epidemiologiya mərkəzinin həkimləri, polis nəfərləri nəzarət edəcəklər. Zibilin daşınması üçün operativ qruplar yaradılmışdır.
C.Məmmədquluzadə küçəsi, 101,
”Bakı Tikiş Sənaye” ASC-nin həyəti
Burada yarmarkanın təşkili üçün bütün normativlərə uyğun şərait yaradılmışdır. Piştaxta və çətirlər quraşdırılmış, sahədə sanitariya qovşaqları, su xətti, skamyalar, zibil qutuları qoyulmuşdur. Ət və süd, eləcə də digər tez xarab olan məhsullar üçün soyuducu kameralar quraşdırılmış, Sabirabad, Ağdaş və Cəlilabaddan gələcək fermerlər üçün yeməkxana və yataq yerləri hazırlanmışdır.
YASAMAL RAYONU
Şərifzadə küçəsi 194, metronun “İnşaatçılar”
stansiyasının 200 metrliyində hasara alanmış sahə
Astara və Salyan rayonlarından gətiriləcək kənd təsərrüfatı məhsullarının satışı üçün nəzərdə tutulmuş yerdə artıq bütün hazırlıq işləri görülmüşdür. Piştaxtalar qurulmuş, satıcı və alıcıların gündən qorunması üçün çətirlər quraşdırılmışdır. Ərazidə su və kanalizasiya xətləri işləyir.
Yeni Yasamal yaşayış massivi Mərkəzi
dairəvi ərazidə müvafiq sahə
Ərazidə əhaliyə yüksək keyfiyyətli xidmət göstərmək üçün bütün şərait yaradılmışdır. Yaxınlıqda satıcıların nahar etməsi üçün iaşə obyektləri nəzərdə tutulmuşdur.
Hər iki sahədə satılacaq məhsulların keyfiyyətini yoxlayan xüsusi komissiya fəaliyyət göstərəcəkdir. Rayon icra hakimiyyətinin nümayəndələri və polis əməkdaşları yarmarkanın normal fəaliyyət göstərməsinə nəzarət edəcəklər.