ELM VƏ TƏHSİL


Prezident elm adamlarının sosial təminatının yaxşılaşdırılmasına xüsusi önəm verir

Bakı, 11 aprel, AZƏRTAC

İlham Əliyevin yenidən prezident seçilməsindən bir il ötür. Azərbaycan Respublikasının Prezidenti İlham Əliyevin hələ 2003-cü ildə prezident seçkilərində xalqın iradəsi ilə qalib gəldikdən söylədiyi “Mən hər bir azərbaycanlının Prezidenti olacağam” fikri 16 ildə tam doğrulub. Prezident İlham Əliyevin 2003-cü ildə və sonrakı illərdə respublikamızın inkişafı, xalqımızın əmin-amanlıq şəraitində yaşamasının təmin edilməsi üçün verdiyi bütün vədlər həyatda öz təsdiqini tapmışdır.

Bu sözləri AZƏRTAC-a açıqlamasında Azərbaycan Milli Elmlər Akademiyasının (AMEA) Elm Tarixi İnstitutun direktoru, tarix elmləri doktoru Məryəm Seyidbəyli deyib.

M.Seyidbəyli qeyd edib ki, seçkilərdən ötən bir il təkcə sosialyönümlü islahatlarla deyil, ölkəmizin mövqeyini dünyanın inkişafda olan ölkələri sırasında daha da möhkəmləndirən mühüm layihələrin həyata keçirilməsi ilə də zəngin oldu.

“Biz gələcəyə bu cür baxırıq: müasirlik, dinamik inkişaf, texnologiyaların tətbiqi” - bu sözləri Prezident İlham Əliyev AMEA-nın yubileyində səsləndirmişdi. Bu çıxış Prezidentin texniki elmlərin inkişafı ilə yanaşı, digər elm sahələrinin inkişaf etməsi üçün də stimuldur. Məsələn, 2019-cu ilin “Nəsimi ili” elan edilməsi ölkə başçısının elmin bütün sahələrini diqqətdə saxlamasının bariz nümunəsidir.

Ümumiyyətlə, Prezident İlham Əliyevin elmə və elm xadimlərinə diqqətini təsdiqləyən xeyli sayda qərar və sərəncamlar nümunə gətirmək mümkündür: “2007–2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı” gənclərimizin dünyanın aparıcı universitetlərində mükəmməl elmi biliklərə yiyələnməsi, həmçinin dünya elminə inteqrasiya istiqamətində atılmış çox əhəmiyyətli addım idi. Yaxud “2009–2015-ci illərdə Azərbaycan Respublikasında Elmin İnkişafı üzrə Milli Strategiya”, 2012-ci ildə Prezidentin Fərmanı ilə təsdiqlənmiş “Azərbaycan 2020: gələcəyə baxış” İnkişaf Konsepsiyası, əslində Azərbaycan elminin inkişafına dövlət qayğısının göstəricisidir.

Ölkə başçısının elm adamlarının sosial təminatının yaxşılaşdırılması istiqamətindəki fəaliyyəti də göz önündədir. Təşəbbüskarı olduğu dövlət layihələri əsasında tikilən sosial binalarda ilk növbədə elm xadimlərinin mənzil almaq imkanı, AMEA-nın həqiqi və müxbir üzvlərinin aylıq rütbə maaşlarının artırılması və nəhayət, “Elm günü”nün təsis edilməsi bu diqqətin təzahürüdür. “Elm günü” üçün 27 mart, yəni respublikamızda Elmlər Akademiyasının təsis olunduğu tarixin qəbul edilməsi Prezidentin AMEA-ya verdiyi dəyərdir. AMEA-nı təmsil edən Elm Tarixi İnstitutunun kollektivi ölkəmizin gələcəyinə, milli ziyalılığın və elmin daha böyük inkişafına çatmağın Prezident İlham Əliyevin rəhbərliyi ilə mümkün olacağına daim inanır.

Təsadüfi deyil ki, son illərdə AMEA-nın elmi müəssisə və təşkilatlarının maddi-texniki bazasının gücləndirilməsi, dünyanın nüfuzlu akademik qurumları ilə əməkdaşlığın genişləndirilməsi istiqamətində mühüm addımlar atılıb və bu proses uğurla davam etməkdədir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.