REGİONLAR
QUŞÇULUQ MƏHSULLARININ NÖVBƏTİ SATIŞ YARMARKALARI KEÇİRİLMİŞDİR
AZƏRTAC xəbər verir ki, dekabrın 14-də Bakının “Təzə bazar” MMC, 6 nömrəli ticarət mərkəzi, Sabunçu və Badamdar qəsəbələrinin ərazilərində quşçuluq məhsullarının növbəti satış yarmarkaları keçirilmişdir.
İqtisadi İnkişaf Nazirliyinin və Quşçular Cəmiyyətinin birgə təşkil etdikləri yarmarkalar paytaxt əhalisinin bu məhsullara tələbatının daha dolğun ödənilməsi və qiymətlərin süni şəkildə artırılmasının qarşısının alınması məqsədi ilə həyata keçirilir.
“Təzə bazar” MMC-nin ərazisindəki yarmarkada alıcılara toyuq əti, yumurta təklif olunurdu.
Giləzi quşçuluq fabrikinin işçisi Elçin Quliyev satışa 18 min ədəd yumurta çıxarmışdı və birini 11-12 qəpiyə, qəfəsini 3 manat 30 - 3 manat 60 qəpiyə satırdı. İmişli və Mərdəkan broyler fabriklərindən Faiq Əhmədov, İlqar Əsgərov növlərinə görə toyuq ətinin kiloqramını 2 manat 20 - 2 manat 70 qəpiyə təklif edirdilər.
Alıcılar quş əti və yumurtanın keyfiyyətli, qiymətlərinin münasib olduğunu bildirirdilər.
Respublika Quşçular Cəmiyyətinin sədri Aydın Vəliyevin sözlərinə görə, bu gün şəhərin yarmarkalarında satışa 10 ton toyuq əti və 500 minə yaxın yumurta çıxarılmışdır. Satış-yarmarkalar şənbə və bazar günləri də davam etdiriləcəkdir.