İQTİSADİYYAT


Sabah Bakıda Cənub Qaz Dəhlizi Məşvərət Şurası çərçivəsində nazirlərin beşinci toplantısı keçiriləcək

Bakı, 19 fevral, AZƏRTAC

Fevralın 20-də Bakıda keçiriləcək Cənub Qaz Dəhlizi Məşvərət Şurası çərçivəsində nazirlərin beşinci toplantısına hazırlıq işləri yekunlaşıb.

Energetika Nazirliyindən AZƏRTAC-a bildirilib ki, toplantıda iştirak edəcək ölkələrin sayı dəqiqləşib. Məşvərət Şurasının budəfəki iclasında Avropa Komissiyasının büdcə məsələləri və insan resursları üzrə komissarı Günter Ottinger, “Cənub Qaz Dəhlizi” layihəsinə cəlb edilmiş ölkələrdən - Türkiyənin enerji və təbii sərvətlər naziri Fatih Dönmez, Gürcüstanın iqtisadiyyat və davamlı inkişaf nazirinin müavini Natela Turnava, İtaliyanın iqtisadi inkişaf nazirinin müavini Andrea Cioffi, Yunanıstanın Ətraf Mühit və Energetika Nazirliyinin baş katibi Mixail Veriopoulos, Albaniyanın infrastruktur və energetika nazirinin müavini Shkreli Artan, Bolqarıstandan isə energetika naziri Temenujka Petkova iştirak edəcək.

ABŞ-ı Dövlət katibinin köməkçisinin enerji məsələləri üzrə müavini Sandra Oudkirk və Böyük Britaniyanı Baş nazirin Azərbaycan üzrə ticarət elçisi Baronessa Emma Nikolson təmsil edəcək.

Bu il ilk dəfə olaraq Məşvərət Şurasının iclasına Serbiya, Macarıstan və San-Marino kimi ölkələr də qatılacaq. Serbiyanı mədən və energetika nazirinin müavini Mirjana Filipoviç, Macarıstanı Xarici İşlər və Ticarət Nazirliyinin enerji təhlükəsizliyi məsələləri üçün xüsusi tapşırıqlar üzrə səfiri Pal Sagvari və San-Marinonu Xarici İşlər Departamentinin iqtisadi məsələlər üzrə direktoru-səlahiyyətli nazir Dario Galassi təmsil edəcək. Xorvatiyanın ətraf mühit və energetika naziri Tomislav Çoriç, Monteneqronun İqtisadiyyat Nazirliyinin energetika üzrə baş idarəsinin baş direktoru Marko Reduloviç, Bosniya və Herseqovinadan isə xarici ticarət və iqtisadi əlaqələr nazirinin müavini Mato Franjiçevic tədbirə qatılacaq. Türkmənistan Prezidentinin müşaviri Yaxşıgəldi Kakayev, Rumıniyanın Energetika Nazirliyinin dövlət katibi Lulian Robert Tudorake də iştirakçılar sırasındadır.

Tədbir iştirakçıları arasında BP, TANAP, TAP, “Snam”, “Fluxys”, “LNG Croatia”, “Plinacro”, “ICGB AD” və “Transgaz” şirkətləri geniş tərkibdə yer alıb.

Beynəlxalq maliyyə qurumlarından isə Dünya Bankı, Asiya İnkişaf Bankı, Avropa Yenidənqurma və İnkişaf Bankı, Avropa İnvestisiya Bankı, İnvestisiyaların zəmanəti üzrə Çoxtərəfli İnvestisiya Agentliyinin nümayəndələrinin iştirakı nəzərdə tutulub.

Cənub Qaz Dəhlizi Məşvərət Şurası çərçivəsində nazirlərin beşinci toplantısı açılış mərasimi və salamlama nitqlərindən sonra üç plenar sessiya üzrə davam edəcək. Birinci sessiyada “Cənub Qaz Dəhlizi” layihəsinin bütün seqmentləri üzrə görülmüş işlərə dair hesabatlar diqqətə çatdırılacaq. Avrokomissar G.Ottinger və energetika naziri Pərviz Şahbazovun moderatorluğu ilə keçirilən ikinci plenar sessiyada layihəyə cəlb edilmiş ölkələrin nazirlərinin çıxışları nəzərdə tutulub. Üçüncü plenar sessiya “Cənub Qaz Dəhlizi” layihəsinin birləşdirici kəmərlərlə genişləndirilməsi perspektivlərinə həsr olunub.

Məşvərət Şurası çərçivəsində nazirlərin görüşünün iştirakçıları tərəfindən “Birgə Bəyannamə” imzalanması, eləcə də mətbuat konfransının keçirilməsi planlaşdırılır.

Xatırladaq ki, Məşvərət Şurası çərçivəsində nazirlərin ilk toplantısı 2015-ci il fevralın 12-də, ikinci toplantı 2016-cı il fevralın 29-da, üçüncü toplantı 2017-ci il fevralın 23-də, dördüncü toplantı isə ötən il fevralın 15-də keçirilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.