CƏMİYYƏT
Suraxanı rayonunda məşğulluqla bağlı növbəti “dəyirmi masa” təşkil olunub
Bakı, 3 iyun, AZƏRTAC
Suraxanı rayon Məşğulluq Mərkəzinin təşkilatçılığı ilə “Sosial məsuliyyətin bölgüsü çərçivəsində həyata keçirilən tədbirlərdə işəgötürənlərin iştirakı” mövzusunda “dəyirmi masa” keçirilib.
Tədbirdə Suraxanı rayon Məşğulluq Mərkəzinin direktoru Sənan Məmmədzadə bildirib ki, əhalinin məşğulluğunun təmin olunmasında işəgötürənlərin fəaliyyəti çox səmərəli olduğundan bu “dəyirmi masa” növbəti dəfədir Suraxanıda təşkil olunub. O qeyd edib ki, keçirilən “dəyirmi masa”lar işəgötürənlərlə məşğulluq xidməti arasında əlaqələrin daha da yaxşılaşdırılmasına öz töhfəsini verməkdədir. Bu gün işəgötürənlərin məşğulluq mərkəzi ilə daha sıx əlaqə saxlamaları buna əsaslı sübutdur.
Direktor deyib ki, Azərbaycan Prezidentinin sosial məsuliyyətin bölüşdürülməsi təşəbbüsü mövcud iqtisadi şəraitdə əhalinin məşğulluq imkanlarının artırılmasında işəgötürənlərin daha fəal iştirakına imkan yaradıb. Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrasının ikinci ilinin yekunlarına dair konfransda Prezidenti İlham Əliyev “Hesab edirəm ki, əgər iş adamları bu məsələyə sosial məsuliyyət nöqteyi-nəzərindən yanaşsalar və işsiz qalan insanları işə götürsələr, yaxud da ki, işçiləri ixtisar etməsələr onlar ümumi işimizə töhfə verərlər. Çünki bu, sosial məsuliyyətdir. Bu, bizim ümumi işimizdir” - deyə bildirib. Dövlət başçısının bu təşəbbüsü Azərbaycanda sosial məsuliyyət prinsipinin daha geniş dairədə praktik gerçəkliyə çevrilməsinə, əmək və məşğulluq sahəsində mövcud olan sosial tərəfdaşlıq müstəvisində dövlət-işəgötürən münasibətlərini keyfiyyətcə yeni və işgüzar bir mərhələyə çıxmasına yol açıb. Qısa müddətdə işəgötürənlər tərəfindən Əmək və Əhalinin Sosial Müdafiəsi Nazirliyinin məşğulluq orqanlarına 60 minə yaxın vakansiya təqdim edilib ki, bu da mövcud iqtisadi şəraitdə sərbəstləşmiş işçi qüvvəsinin yenidən məşğulluğuna, ailə gəlirlərini bərpa etmələrinə imkan yaradıb. Bununla da həyata keçirilən kompleks təsirli tədbirlər nəticəsində Azərbaycanın əmək bazarında gərginlik, kütləvi işsizlik halı özünü göstərmədi, ailə gəlirlərinin azalmasına imkan verilmədi.
Tədbirdə çıxış edən Suraxanı Rayon İcra Hakimiyyətinin sosial-iqtisadi inkişafın təhlili və proqnozlaşdırılması şöbəsinin müdiri Altun Quliyev çıxışında məşğulluq siyasətinin icra olunması haqında icra hakimiyyətinin gördüyü işlərdən danışıb. O qeyd edib ki, son iki ildə dövlət – qeyri-dövlət müəssisələrində iş yerləri açılıb. Suraxanıda da yüzlərlə belə iş yeri açılıb. Bu gün işəgötürənlərin və Məşğulluq Mərkəzlərinin üzərinə böyük məsuliyyət düşür. Fərəhli haldır ki, Suraxanı rayon Məşğulluq Mərkəzi rayon icra hakimiyyəti ilə sıx əlaqədə işləyir.
Dövlət Məşğulluq Xidmətinin yerli orqanlarla və sosial tərəfdaşlarla iş sektorunun baş məsləhətçisi Xətai Mehralıyev tədbir iştirakçılarını Dövlət Məşğulluq Xidmətinin məşğulluq siyasətinin yerinə yetirilməsində gördüyü işlərdən danışıb. O, işəgötürənlərin yerli Məşğulluq Mərkəzi ilə mütəmadi əlaqə saxlamalarının, hesabatları vaxtında vermələrinin vacibliyini bildirib.
Suraxanı rayon Mənzil-Kommunal Təsərrüfatı Birliyinin (MKTB) rəisi Mais Məmmədov çıxışında 2017-ci ilin ilk beş ayında Suraxanı MKTB tərəfindən işlə təmin olunan işaxtaran vətəndaşların sayını açıqlanıb. O bildirib ki, Suraxanı MKTB vətəndaşları işə götürərkən kvota üzrə işlə təmin olunmaya xüsusi nəzarət edir.
Suraxanı rayon Gənclər və İdman İdarəsinin rəisi Amil Bağırov çıxış edərək əmək bazarında hazırda işaxtaranların əsas hissəsini gənclərin təşkil etdiyini bildirib. Suraxanı Gənclər və İdman İdarəsinin gənclərin yeni peşə və sənətlərə yiyələnməsində təşkil etdiyi kursların əhəmiyyətindən danışan natiq bildirib ki, rəhbərlik etdiyi idarə əgər müəyyən ixtisaslar üzrə kurslar təşkil edə bilmirsə həmin ixtisaslar üzrə gəncləri Suraxanı rayon Məşğulluq Mərkəzinə yönəldir. Gənclər Mərkəzi ilə Suraxanı rayon Məşğulluq Mərkəzi sıx əməkdaşlıq şəraitində işləyir.
“Dəyirmi masa”nın sonunda Suraxanı rayon Məşğulluq Mərkəzinin direktoru S.Məmmədzadə və digər məruzəçilər tədbir iştirakçılarını maraqlandıran sualları cavablandırıblar.