Bakı, 26 aprel, AZƏRTAC

Tikinti obyektinin tikintisinə icazələrin verilməsi üçün texniki şərtlər "Bir Pəncərə" prinsipi ilə 1 sorğu vasitəsilə "ASAN Kommunal” və “ASAN xidmət" mərkəzlərində əldə olunur. Tikinti obyektinin tikintisinə və istismarına icazələrin verilməsi qaydalarına dair AZƏRTAC-ın suallarını İqtisadi İslahatların Təhlili və Kommunikasiya Mərkəzinin departament rəhbəri Ayaz Çaparlı cavablandırıb.

- Tikinti niyyəti olan fiziki və hüquqi şəxslər özlərinə məxsus torpaq sahəsi üzərində tikinti obyektinin inşa edilməsinə başlamaq məqsədilə hansı orqana müraciət etməlidirlər?

-Tikinti niyyəti olan fiziki və ya hüquqi şəxslərin ilkin məlumatların əldə olunması və bütün lazımi sualların cavablandırılması məqsədilə Bakı Şəhər İcra Hakimiyyətində formalaşdırılan tikintiyə icazələrin alınması üzrə “Bir Pəncərə”yə müraciət etmək imkanı mövcuddur. “Bir Pəncərə”də Azərbaycan Respublikası Fövqəladə Hallar Nazirliyi, Bakı Şəhər İcra Hakimiyyəti, “ASAN Kommunal”, Azərbaycan Respublikası Səhiyyə Nazirliyi Respublika Gigiyena və Epidemiologiya Mərkəzi, Azərbaycan Respublikası Ekologiya və Təbii Sərvətlər Nazirliyinin Dövlət Ekspertiza İdarəsi kimi dövlət qurumlarının nümayəndələri təmsil olunur. Sifarişçinin “Bir Pəncərə”yə onlayn qaydada elektron müraciəti əsasında isə tikintiyə icazələrin alınması üzrə icraat prosesinə başlanıla bilər.

- Tikinti obyektinin tikintisinə və istismarına icazələrin alınması məqsədilə sahibkar hansı prosedurlardan keçməlidir?

-Azərbaycan Respublikasında tikinti obyektinin tikintisinə və istismarına icazələrin verilməsi üçün ümumilikdə üç mərhələ üzrə cəmi 10 prosedur mövcuddur. Belə ki, sahibkar birinci mərhələdə tikinti obyektinin layihələndirilməsini həyata keçirməlidir. İlkin olaraq “Bir Pəncərə ” vasitəsilə, müraciət edildikdən sonra 10 gün ərzində tikinti obyektinin icazə verilən parametrləri barəsində ilkin məlumatlar əldə olunur. Daha sonra isə sifarişçinin tapşırığı əsasında müvafiq lisenziyası olan hüquqi və ya fiziki şəxs vasitəsilə mühəndis axtarış işləri aparıldıqdan sonra Fövqəladə Hallar Nazirliyi (FHN) tərəfindən 10 gün ərzində rəy verilir və eyni zamanda, müvafiq lisenziyalı şirkət tərəfindən topoqrafik tədqiqatlar da həyata keçirilir.

İkinci mərhələdə, sifarişçi tələb olunan sənədlər və ərizə ilə müraciət etdikdən sonra Bakı Şəhər İcra Hakimiyyətinin “Bir Pəncərə”yə sənədlərin təqdim olunması və yoxlanılmasını təmin edərək icazənin verilməsini həyata keçirir. Ekspertizası tələb olunmayan tikinti obyektləri üçün 15 gün ərzində tikintiyə icazə verilməsinə dair qərar qəbul olunur. Qeyd olunan müddət ərzində icra hakimiyyəti orqanı tərəfindən ekspertizası tələb olunmayan tikinti obyektləri üçün aidiyyəti qurumlardan 5 gün ərzində rəy, eyni zamanda, 10 gün ərzində “ASAN Kommunal” mərkəzlərindən bir sorğu vasitəsilə texniki şərtlər əldə edilir. Tikintiyə icazə əldə olunduqda isə Bakı Şəhər İcra Hakimiyyəti orqanı tərəfindən qərarın sürəti və xüsusi nişan sahibkara təqdim olunur.

Tikinti obyektinin inşasına başlanıldıqdan sonra isə tikinti prosesinin şəhərsalma və tikintiyə dair normativ sənədlərin tələblərinə əməl olunaraq icra etmək üçün tikintiyə dövlət, müəllif, texniki və daxili əməliyyat nəzarətləri həyata keçirilir. Tikintiyə dövlət nəzarətini həyata keçirən FHN-nin Tikintidə Təhlükəsizliyə Nəzarət Dövlət Agentliyinin Baş Dövlət Tikinti Müfəttişliyi yalnız müəllif, texniki və daxili əməliyyat yoxlamalarının aparılmasına nəzarət edir və tikinti-quraşdırma işlərinin normativ tələblərə uyğun aparılmasına dair “istismara hazırlıq aktı” tərtib edir. Eyni zamanda, “ASAN xidmət” mərkəzlərinin nəzdində Əmək Münasibətlərinin Monitorinq Mərkəzi tərəfindən qeyri-rəsmi əmək münasibətlərinin qarşısının alınması sahəsində monitorinqi həyata keçirilir. Həmçinin çoxmənzilli yaşayış binalarının və tikinti ilə məşğul olan fiziki və hüquqi şəxslərin elektron reyestri yaradılır və aparılır.

Sonuncu mərhələdə isə, qanunvericiliyə əsasən müəyyən olunmuş müvafiq sənədlər icra hakimiyyəti orqanına təqdim olunur və 20 gün ərzində istismara icazənin verilməsi haqqında qərar qəbul olunur. İstismara icazə alındıqdan sonra isə tikili “Tikintilərin Dövlət Reyestri” nə daxil olunur, müvafiq olaraq istifadə kodu verilir və daha sonra isə tikinti obyekti “Daşınmaz Əmlakın Dövlət Reyestri”nə daxil olunur və çıxarış əldə edilir.

- Azərbaycan Respublikasında tikinti obyektinin tikintisinə və istismarına icazələrin alınması üzrə icraat prosesi dünya ölkələri ilə necə müqayisə olunur ?

-Xarici ölkələr ilə müqayisədə Bolqarıstan, Portuqaliya, Sloveniya, Belarus, Çexiya, Rumıniya və digər bu kimi ölkələrdə tikinti obyektinin tikintisinə və istismarına icazələrin əldə olunması üçün sərf edilməli olan prosedurların və günlərin sayı Azərbaycan Respublikası ilə müqayisədə nəzərə çarpacaq dərəcədə çoxdur.

Eləcə də, 2017-ci il ərzində həyata keçirilən islahatlar nəticəsində sahibkarların elektrik enerjisinə qoşulması və biznesə başlaması sahələrində də bir sıra dəyişikliklər edilib, proses daha da sadələşdirilib ki, bu da tikinti obyektinin tikintisinə və istismarına icazə alınmasına öz təsirini göstərib. Belə ki, elektrik enerjisinə qoşulma üçün cəmi prosedurların sayı 7-dən 3-ə endirilib, eləcə də elektrik enerjisinin əldə olunması üçün sərf edilən günlərin sayı 69 gündən 24 günə azaldılıb. Həmçinin sahibkarın biznesə başlaması üçün ümumilikdə 2 prosedurla 2,5 gün ərzində prosesin tamamlanması imkanı yaradılıb. Əlavə olaraq, işçilərin Əmək və Əhalinin Sosial Müdafiəsi Nazirliyində qeydiyyatdan keçirilməsi artıq onlayn olaraq qısa zaman ərzində həyata keçirilir.