REGİONLAR
Tovuzda əkin dövriyyəsinə qatılan 12 min hektar sahəyə ərzaq buğdası səpilib
Tovuz, 14 aprel, Famil Quliyev, AZƏRTAC
Ölkə əhalisinin ərzaq təminatını yaxşılaşdırmaq üçün Tovuzun Ceyrançöl qış otlaqlarında 12 min hektar sahənin təyinatı dəyişdirilərək əkin dövriyyəsinə qatılıb və cari ilin məhsulu üçün burada ərzaq buğdası səpilib. Taxılla özünütəminetmə səviyyəsinin yüksəldilməsi məqsədilə rayonda keçən ilə nisbətən 13731 hektar çox taxıl əkini aparılıb.
AZƏRTAC xəbər verir ki, bu barədə aprelin 14-də Tovuz Rayon İcra Hakimiyyətində cari ilin birinci rübündə rayonda sosial-iqtisadi inkişaf sahəsində görülmüş işlər və qarşıda duran vəzifələrə həsr olunan şura iclasında rayon icra hakimiyyətinin başçısı Tofiq Zeynalovun məruzəsində qeyd olunub.
Bildirilib ki, bu il rayonda 10 ton barama istehsal edilməsi üçün bütün hazırlıq işləri görülüb. Belə ki, 27 kənddə barama bəslənəcək yerlər müəyyənləşdirilib, kümxanalar aqrozootexniki tələblərə uyğun təşkil olunub. İpək qurdunun yem bazasının möhkəmləndirilməsi məqsədilə 2016-cı ilin payızında Çin Xalq Respublikasından gətirilmiş 10 min ədəd çəkil ağacları əkilib. Rayonda şəkər çuğundurunun əkilməsi üçün konkret yerlər müəyyənləşdirilib, 500 hektardan çox şum qaldırılıb və indiyədək 320 hektar sahədə səpin aparılıb. Tütün əkini üçün lazımi infrastruktura malik, su mənbəyi və suvarma şəbəkəsi olan əlverişli torpaqlar müəyyən edilib və 27 yaşayış məntəqəsinin ərazisində 50 hektar sahədə əkin planlaşdırılıb.
Diqqətə çatdırılıb ki, rayonda bağçılığın inkişafına diqqət artırılıb, payız-yaz mövsümündə 201 hektar sahədə yeni meyvə bağları salınıb. O cümlədən cari mövsümdə 13 hektar sahədə yeni fındıq bağı salınıb və fındıq bağlarının ümumi sahəsi 35,5 hektara çatdırılıb. Üzümçülük və şərabçılıqla bağlı tədbirlərin həyata keçirilməsi, xarici bazarlara çıxış üçün dövlət dəstəyinin göstərilməsi, şərab məhsulları ixracının artırılması və bu sahədə Şərab İstehsalçıları və İxracatçıları Assosiasiyası ilə əlaqələrin qurulması istiqamətində lazımi təşkilatı tədbirlər görülür. Rayonda 664 hektar üzüm bağı var ki, bunun 33 hektarı son ildə salınıb. Gələcəkdə üzüm bağlarının sahəsinin 3 min hektara çatdırılması proqnozlaşdırılıb.
Rayon üçün gəlirli sahələrdən olan kartofun əkin sahəsinin genişləndirilməsinə də xüsusi diqqət yetirilir. İndiyədək ötən illə müqayisədə 221 hektar çox sahədə kartof əkilib və əkin davam etdirilir. Heyvandarlığın səmərəli şəkildə inkişaf etdirilməsi, əlavə cins mal-qara gətirərək süd və süd məhsulları istehsalının artırılması, cins heyvandarlıq təsərrüfatlarının yaradılması istiqamətində də müvafiq addımlar atılır. Qapalı şəraitdə 1000 başlıq müasir heyvandarlıq kompleksi yaratmaq məqsədilə 550 hektar torpaq sahəsi ayrılıb və yem bitkiləri əkilməsi üçün 400 hektar sahədə şumlama işləri aparılıb. Kompleksdə onlarla yeni iş yerinin açılacağı gözlənilir.
Qeyd olunub ki, cari ilin birinci rübündə rayonda kənd təsərrüfatı məhsulları istehsalı ötən ilin müvafiq dövrü ilə müqayisədə 2,1 faiz artıb. Hesabat dövründə rayonda 1657 ton ət, 6793 ton süd, 4 milyon 400 min ədəd yumurta istehsal olunub. Əvvəlki ilin müvafiq dövrü ilə müqayisədə iribuynuzlu mal-qara 200 baş, qoyun və keçilər isə 622 baş artıb.
Cari ilin birinci rübündə tikinti-quruculuq və abadlıq işləri, digər sosial proqramlar da uğurla davam etdirilib. Qeyd olunub ki, bu il Düz Cırdaxan kəndində xalça istehsalı müəssisəsinin tikintisinə başlanılıb. Tovuz şəhərində Dövlət Bayrağı Muzeyi, Tarix-Diyarşünasıq Muzeyi, yüksək gərginlikli elektrik yarımstansiyası, dənli bitki toxumlarının istehsalı stansiyasının tikilməsi və istifadəyə verilməsi də gələcək planlar arasındadır.