Bakı, 24 aprel, AZƏRTAC 

Birinci rübdə ölkə üzrə mehmanxanalarda keçirilmiş gecələmələrin sayı 13 faiz azalaraq 474,6 min olub.

Dövlət Statistika Komitəsindən AZƏRTAC-a bildirilib ki, dünyada koronavirus infeksiyasının sürətlə yayılması əksər ölkələrin turizm sektoruna da öz mənfi təsirini göstərib. Bu hal ölkəmizdə də müşahidə olunub və cari ilin yanvar-mart aylarında ötən ilin eyni dövrü ilə müqayisədə turizm infrastrukturunun əsas elementlərindən olan mehmanxana və mehmanxana tipli müəssisələrin göstəricilərində azalma qeydə alınıb. Ölkə üzrə mehmanxanalarda keçirilmiş gecələmələrin sayı 13 faiz azalaraq 474,6 min olub. Azalmaya əsas səbəb koronavirus infeksiyasının yayılmasının qarşısını almaq məqsədilə Azərbaycan Respublikası ilə qonşu dövlətlər arasında dövlət sərhədində məhdudlaşdırıcı rejimin, eləcə də dünyanın əksər ölkələrində vətəndaşların səfərlərinə müvəqqəti məhdudiyyətlərin tətbiq olunması ilə əlaqədar cari ilin mart ayında gecələmələrin sayında baş vermiş kəskin azalma olub. Belə ki, mart ayında gecələmələrin sayı fevral ayına nisbətən 2,7 dəfə, ötən ilin mart ayına nisbətən isə 2,9 dəfə azalıb.

Cari ilin birinci rübündə mehmanxanalarda keçirilmiş gecələmələrin 55,4 faizi Bakıda, 9,8 faizi Qusarda, 8,4 faizi Qəbələdə, 5,1 faizi Naftalanda, 4,6 faizi Qubada, 3,8 faizi Naxçıvan Muxtar Respublikasında, 2 faizi Lənkəranda, 1,7 faizi Şabranda, 1 faizi Mingəçevirdə, 0,8 faizi Gəncədə və 7,4 faizi digər şəhər və rayonlardakı mehmanxanalarda qeydə alınıb.

Əcnəbilər və vətəndaşlığı olmayan şəxslər tərəfindən mehmanxanalarda keçirilmiş gecələmələrin sayı əvvəlki ilin birinci rübünə nisbətən 16,7 faiz azalaraq 314,9 min olub ki, bu da ümumi gecələmələrin 66,4 faizini təşkil edir. Gecələmələrin 15,9 faizi Rusiya Federasiyası, 12 faizi Birləşmiş Ərəb Əmirlikləri, 10,8 faizi Səudiyyə Ərəbistanı, 7,1 faizi Türkiyə, 6,7 faizi Hindistan, 5,3 faizi Küveyt, 4 faizi Böyük Britaniya, 3,6 faizi İran, 3,2 faizi İsrail, 2,3 faizi ABŞ, 1,9 faizi Qətər, 1,8 faizi İraq, 1,7 faizi Pakistan, 1,6 faizi Qazaxıstan, 1,4 faizi Almaniya, 1 faizi İtaliya, 0,9 faizi Gürcüstan, 0,9 faizi Bəhreyn, 17,9 faizi isə digər ölkələrin vətəndaşlarının payına düşüb.

Əcnəbilər və vətəndaşlığı olmayan şəxslərin keçirdiyi gecələmələrin 73,4 faizi Bakıda, 7,8 faizi Qusarda, 5,2 faizi Qəbələdə, 4,9 faizi Naftalanda, 4 faizi Naxçıvan Muxtar Respublikasında, 2,5 faizi Qubada, 2,2 faizi isə digər rayon və şəhərlərdəki mehmanxanalarda qeydə alınıb. Azərbaycan Respublikası vətəndaşları üzrə mehmanxanalarda keçirilmiş gecələmələrin sayı 2019-cu ilin yanvar-mart ayları ilə müqayisədə 4,7 faiz azalaraq 159,7 min olub.

Cari ilin birinci rübündə mehmanxanaların gəlirləri əvvəlki ilin eyni dövrü ilə müqayisədə 15,8 faiz azalaraq 60 milyon manat olub ki, onun da 58,5 faizi nömrələrin (otaqların) təqdim olunması üzrə xidmətlərdən, 27,8 faizi ictimai iaşə xidmətlərindən, 3,9 faizi müalicə və sağlamlıq xidmətlərindən, 9,8 faizi isə digər xidmətlərin göstərilməsindən əldə edilib.

Bu ilin yanvar-mart aylarında mehmanxanaların birdəfəlik tutumundan istifadə 12,2 faiz səviyyəsində olub (2019-cu ilin yanvar-mart aylarında 15,7 faiz). Bu göstərici Naftalanda 43,4 faiz, Beyləqanda 27,2 faiz, Qusarda 26,9 faiz, Şabranda 25,6 faiz, Qəbələdə 18,7 faiz, Cəlilabadda 18,4 faiz, Qubada 18,3 faiz, Bakıda 17,3 faiz, Naxçıvan Muxtar Respublikasında 16,5 faiz, Sabirabadda 15,3 faiz, Göyçayda 13,9 faiz, digər rayon və şəhərlərdə isə ölkə üzrə orta göstəricidən aşağı olub.