REGİONLAR
Ulu Öndərin ən çox diqqət yetirdiyi sahələrdən biri də insan hüquq və azadlıqlarının müdafiəsi olub
Cəlilabad-Lənkəran, 11 dekabr, Bağır Əliyev, AZƏRTAC
Ombudsmanın Cəlilabad Regional Mərkəzi Azərbaycan Dövlət Pedaqoji Universitetinin (ADPU) Cəlilabad filialı, Cəlilabad Tibb Kolleci və Lənkəran şəhərindəki Osman Mirzəyev adına qarışıq tipli uşaq evində “İnsan hüquqlarının qorunması dövlətin ali məqsədi kimi və fundamental hüquqlarımız” mövzusunda maarifləndirmə tədbirləri keçirib.
AZƏRTAC-ın bölgə müxbiri xəbər verir ki, təhsil ocaqlarında keçirilən tədbirlərdə çıxış edən Ombudsmanın Cəlilabad Regional Mərkəzinin rəhbəri Ziya İsmayılov tələbələrə və şagirdlərə insan hüquqlarının yaranma tarixi, BMT-nin İnsan Hüquqları Ümumi Bəyannaməsi, iqtisadi, sosial və mədəni hüquqlar haqqında Beynəlxalq Pakt, mülki və siyasi hüquqlar haqqında Beynəlxalq Pakt, ölkəmizin bu mühüm sənədlərə qoşulması və digər müddəalar barədə geniş məlumat verib.
Bildirilib ki, ölkəmizdə insan hüquqları ilə bağlı islahatların təməli Azərbaycan Respublikasının yeni Konstitusiyasının qəbul edilməsi ilə qoyulub. Müstəqil Azərbaycanımızın ilk demokratik Konstitusiyası isə məhz ümummilli lider Heydər Əliyevin rəhbərliyi ilə hazırlanaraq 1995–ci il noyabrın 12-də ümumxalq səsverməsi yolu ilə qəbul edilib.
İnsan və vətəndaş hüquqlarının və azadlıqlarının təmin edilməsini dövlətin ali məqsədi kimi özündə təsbit edən əsas Qanunumuzun 48 maddədən ibarət üçüncü fəslinin bütün müddəaları insan hüquqları əsas götürülərək yazılıb, insan hüquq və azadlıqları ən yüksək dəyər kimi təsbit olunub.
Qeyd olunub ki, ulu öndər Heydər Əliyevin müstəqil Azərbaycan Respublikasına rəhbərlik etdiyi dövrlərdə ən çox diqqət yetirdiyi sahələrdən biri də insan hüquq və azadlıqlarının müdafiəsi və təmin edilməsi olub. Qısa müddət ərzində bu məqsədlə bir sıra mühüm tədbirlər həyata keçirilib, çoxsaylı fərman və sərəncamlar imzalanmaqla müvafiq qanunvericilik aktları qəbul edilib.
Diqqətə çatdırılıb ki, bu gün ölkəmizdə insan hüquqlarının qorunması sahəsində mühüm addımlar atılır. “Azərbaycan Respublikasında insan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramı” isə bu istiqamətdə siyasətin reallaşdırılmasında xüsusi önəm daşıyır.