SİYASƏT
Ulu öndər Heydər Əliyevin anadan olmasının 99-cu ildönümü İndoneziyanın Bakrie Universitetində qeyd edilib
Cakarta, 25 may, AZƏRTAC
Mayın 25-də İndoneziyanın Cakarta şəhərində yerləşən Bakrie Universitetində müasir Azərbaycan dövlətinin qurucusu, ümummilli lider Heydər Əliyevin anadan olmasının 99-cu ildönümü münasibətilə “Dövlətçiliyin möhkəmləndirilməsində liderlərin rolu” mövzusunda tədbir keçirilib.
AZƏRTAC xəbər verir ki, əvvəlcə Azərbaycan və İndoneziyanın Dövlət himnləri səsləndirilib.
Tədbiri açan Bakrie Universitetinin prorektoru Tri Andika Azərbaycan ilə İndoneziya arasında münasibətlərin yüksək səviyyəsindən məmnunluq ifadə edərək, Azərbaycan səfirliyi ilə birlikdə keçirilən tədbirin bu əlaqələrin bariz nümunəsi olduğunu vurğulayıb. Ölkəmizin İndoneziyadakı səfirini Bakrie Universitetində salamlamaqdan məmnunluğunu ifadə edib. Hər bir ölkənin müstəqilliyinin qazanılmasında və qorunmasında liderlərə ehtiyacı olduğunu qeyd edən prorektor İndoneziyanın müstəqilliyində ölkənin ilk Prezidenti Sukarnonun, Azərbaycanda isə ümummilli lider Heydər Əliyevin xüsusi rolunun olduğuna diqqət çəkib. Bugünkü tədbirin məhz bu iki liderin fəaliyyətinə həsr olunduğunu, Bakrie Universitetinin tələbələrinin təqdim ediləcək çıxışlardan sonra suallarını istər Azərbaycan səfirinə, istərsə də universitetin rəhbərliyinə yönəldə biləcəklərini vurğulayıb. Çıxışının sonunda universitet ilə səfirlik arasında əməkdaşlığın bundan sonra da davam etdiriləcəyinə ümidvar olduğunu bildirib.
Bakrie Universitetinin rəhbərliyini və müəllim-tələbə heyətini salamlayan səfir C.Mirzəyev tarixdə iki növ liderlik xüsusiyyətinin olduğunu, bunlardan birinin tarixdə qalan liderlik, digərinin isə tarix yazan liderlik olduğunu qeyd edib. Azərbaycan xalqının ümummilli lideri Heydər Əliyevin məhz tarix yazan lider olduğunu vurğulayıb. Heydər Əliyevin Azərbaycan müasir tarixinin yaradıcısı, dövrünün həqiqi fenomeni olduğunu qeyd edən səfir, onun tarixə nadir lider, güclü dövlət rəhbəri, fədakar insan və dövlət quruculuğunda böyük çətinliklərin öhdəsindən gəlmək bacarığına sahib əfsanəvi şəxsiyyət olduğunu bildirib. Məhz Ümummilli Liderin əvəzsiz xidmətləri sayəsində Azərbaycanın gənc dövlət kimi öz ayaqları üzərində durduğunu, müstəqil ölkə kimi XXI əsrə qədəm qoyduğunu söyləyib.
Heydər Əliyevin həyatı və fəaliyyəti haqqında geniş məlumat verən səfir onun Sovet dövründə, həm də müstəqillik illərində göstərdiyi böyük rəhbərlik bacarığından bəhs edib.
Heydər Əliyevin müasir Azərbaycana 10 ildən çox prezidentliyi dövründə ölkədə köklü islahatların aparılmasına nail olduğunu söyləyib. Heydər Əliyevin çoxtərəfli siyasəti nəticəsində Azərbaycanın ABŞ, Avropa ölkələri, Türkiyə, Rusiya və İran kimi ölkələrlə qurulmuş yüksək münasibətlərdən bəhs edən səfir onun ölkənin, xalqın rifahı naminə reallaşdırdığı layihələr - “Əsrin müqaviləsi”, Bakı-Tbilisi-Ceyhan neft boru kəməri haqqında geniş məlumat verib. Ölkə Konstitusiyasının təkmilləşdirilməsi, təhsil sisteminin, xaricdə təhsil almaq imkanlarının artırılması kimi məsələlərin də Heydər Əliyevin rəhbərliyi ilə həyata keçirildiyini qeyd edən səfir Azərbaycan xalqının bütün həyatını Azərbaycanın və xalqının rifahına həsr edən Heydər Əliyevlə qürur duyduğunu, onun işıqlı xatirəsini əziz tutduğunu, ürəklərdə yaşatdığını vurğulayıb.
Sonra Bakrie Universitetinin Siyasi Elmlər Fakültəsinin rəhbəri Aditya Batara Günəvan çıxış edərək, İndoneziyanın ilk Prezidenti Sukarno haqqında məlumat verib, onun fəaliyyətində əsas amalın xalqların sülh və qardaşlıq şəraitində birgə yaşayacağı dünyanın qurulması olduğunu, gənclərin ölkənin gələcəyi olduğuna inandığını, bu məsələyə böyük diqqətlə yanaşdığını bildirib. Sukarnonun çox çətin şəraitdə hazırkı İndoneziya Respublikasını qurduğunu, bütün həyatını, sağlamlığını buna həsr etdiyini bildirən A.Batara Günəvan Azərbaycanla İndoneziya arasında münasibətlərin hazırkı inkişafından məmnunluğunu ifadə edərək, hazırda Azərbaycanın sədrlik etdiyi Qoşulmama Hərəkatının (QH) məhz İndoneziyanın Bandunq şəhərində keçirilən və qəbul edilən Bandunq Prinsipləri əsasında yaradıldığını xatırladıb. Azərbaycanın QH-na 2019-cu ildən uğurla sədrlik etdiyini, həmin dövrdə qlobal məsələləri gündəliyə çıxarıldığını söyləyib. Qoşulmama Hərəkatının 18-ci Bakı Sammiti çərçivəsində Azərbaycan Prezidenti İlham Əliyev tərəfindən COVID-19 pandemiyası ilə mübarizədə bir sıra təşəbbüslər irəli sürdüyünü vurğulayıb. Qoşulmama Hərəkatına sədrliyi çərçivəsində ölkəmizin digər uğurunun gənclərlə iş sahəsinə xüsusi diqqət ayırmasının olduğu, bunun İndoneziyada böyük təqdirlə qarşılandığını deyib.
İndoneziya və Azərbaycan arasında münasibətlərin 30 illik səviyyəsindən məmnunluğunu ifadə edən A.Batara Cünəvan iki ölkə arasında ali təhsil ocaqlarının əməkdaşlıq səviyyəsinin artırılmasının vacibliyinə də diqqət çəkib.
Çıxışının sonunda belə bir vacib mövzuda tədbirin indoneziyalı tələbələrlə keçirilməsinin əhəmiyyətini qeyd edən natiq bu fürsəti yaratdığına görə səfirliyə minnətdarlığını çatdırıb.
Sonra tələbələrin verdiyi suallar cavablandırılıb, xatirə şəkilləri çəkdirilib.
Vüqar Ağayev
AZƏRTAC-ın xüsusi müxbiri
Cakarta