Şəki, 13 aprel, Mustafa Dadaşov, AZƏRTAC

“Xəmsə” Milli İntellektual Oyunu üzrə gənclər arasında XI Azərbaycan çempionatının aprelin 13-də Şəkidə keçirilən zona mərhələsinin yarışları başa çatıb. Yarışlarda Balakən, Zaqatala, Qax, Şəki, Oğuz və Qəbələ rayonlarının təmsilçiləri öz intellektual biliklərini nümayiş etdiriblər.

AZƏRTAC-ın bölgə müxbiri xəbər verir ki, yarışa başlamazdan əvvəl Şəki şəhər gənclər və idman idarəsinin rəisi Vüqar İskəndərov çıxış edərək, Gənclər və İdman Nazirliyinin təşkilatçılığı ilə ənənəvi olaraq hər il keçirilən “Xəmsə” Milli İntellektual Oyunu üzrə yarışların Azərbaycanın zəngin milli mədəniyyətini və tarixini təbliğ etmək, yeniyetmə və gənclərin intellektual səviyyəsini, dünyagörüşünü, zehni inkişafını stimullaşdırmaq, gənclər arasında bilik və elmin nüfuzunu artırmaq, eləcə də onların asudə vaxtlarının mənalı və səmərəli təşkilinə kömək məqsədi daşıdığını bildirib.

Zona yarışında Şəkinin “Anonim”, “Marxal” və Balakən rayonunun “Qubek” komandaları uğurla çıxış edərək, “Xəmsə” Milli İntellektual Oyunu üzrə XI Azərbaycan çempionatının mayda Bakıda keçiriləcək final mərhələsində iştirak etmək hüququ qazanıblar.

Qalib komandalar diplomlarla mükafatlandırılıblar.