REGİONLAR
Xəzər Hüseynov: Tarixdə ikinci dəfə müstəqilliyimizi itirə bilərdik, lakin bunun qarşısını Ulu Öndərimiz aldı
Naxçıvan, 13 iyun, Rauf Kəngərli, AZƏRTAC
Ölkəmiz müstəqilliyinin ilk illərində çox böyük çətinliklər, bəlalarla üz-üzə qalmışdı. Hətta 1993-cü ilin iyununda ölkədə vətəndaş müharibəsi, qardaş qırğını təhlükəsi yaranmışdı. Azərbaycan tarixdə ikinci dəfə müstəqilliyini əldən verə, parçalana bilərdi. Bütün bunların qarşısını 1993-cü il iyunun ayında xalqın harayına səs verən görkəmli dövlət xadimi, ulu öndərimiz Heydər Əliyev aldı. Bu baxımdan, 15 iyun tarixi ümumxalq bayramı kimi qeyd olunur.
Bu fikirləri AZƏRTAC-ın Naxçıvan bürosuna müsahibəsində Naxçıvan Dövlət Universitetin dosenti, tarix üzrə elmlər doktoru Xəzər Hüseynov deyib.
O qeyd edib ki, 1993-cü ildə həmin dəhşətli hadisələrin baş verməsinin əsas səbəbi xarici kəşfiyyat orqanlarının dağıdıcı fəaliyyəti ilə yanaşı, səriştəsiz insanların respublikaya rəhbərlik etməsi idi. Belə ki, parlamentin sədri kiçik elmi işçi idi, 11 il ərzində kiçik bir dissertasiyanı müdafiə edə bilməmişdi. Baş nazir əvvəllər kiçik mövsümi ticarətlə məşğul olmuşdu. Belə bir təcrübədən sonra əvvəl dövlət katibi kimi ciddi siyasi post, daha sonra baş nazir postu onun üçün olduqca ağır idi. Ölkədə mənəviyyatsızlıq hökm sürürdü. Daxili işlər naziri insanları qanunsuz həbs edir, məhkəməsiz 700 nəfər məhbusu azadlığa buraxıb, silahlandırmışdı. Ölkədə özəlləşdirilmə prosesi getmədiyi halda 3 mindən çox xidməti maşını məmurlar şəxsi istifadə üçün mənimsəmişdilər. Bu kimi faktları saymaqla qurtarmaq olmaz. Əlbəttə, bütün bunların nəticəsində həmin dövrdəki hakimiyyət ictimai dəstəkdən tamamilə məhrum qalmışdı. Ona görə də baş verən dağıdıcı hadisələrin qarşısını almaq mümkün deyildi.
“Vətənin belə ağır günündə xalq Azərbaycanın görkəmli oğlu Heydər Əliyevi Naxçıvandan Bakıya dəvət etdi. Azərbaycan xalqının, müstəqil Azərbaycan Respublikasının tarixində yeni bir dövr başlandı. Dahi şəxsiyyət çevik, düşünülmüş və uzaqgörən siyasəti ilə ölkəni bəlalardan xilas etdi. Heydər Əliyevin xilaskarlıq missiyası Azərbaycanı məhv olmaqdan, parçalanmaqdan xilas etdi”, - deyən Xəzər Hüseynov bildirib ki, bundan sonra ölkədə asayiş və qayda-qanun bərqərar edildi, soyğunçuluğa, vətəndaşların əmlakının qəsb olunmasına son qoyuldu, nizami ordu yaradıldı, Qarabağ müharibəsində atəşkəs əldə edildi, idarəetmə sistemi formalaşdırıldı, insanlara öz dövlətinə inamı qaytarıldı, neft müqavilələri imzalandı, Azərbaycanın iqtisadi dirçəlişinin əsası qoyuldu.
Xəzər Hüseynov deyib: “Xalqına arxalanan, onun üçün çalışan, yaradan insanlar xoşbəxt insanlardır. Onlar millətin taleyini təyin etmək məsuliyyətinin nə demək olduğunu anlayır, bu məsuliyyəti ləyaqətlə daşıyır, həyatda xoşbəxtliyi ancaq gələcək nəsillərin şərəfi, varlığı və rahatlığı üçün çalışmaqda görürlər. Ümummilli liderimiz Heydər Əliyev məhz belə tarixi şəxsiyyətdir. O, müstəqil Azərbaycan Respublikasının, xoşbəxt gələcəyimizin qurucusudur.
O vurğulayıb ki, bu gün Ümummilli Liderimizin siyasi xətti onun layiqli davamçısı Prezident İlham Əliyev tərəfindən uğurla davam etdirilir. Ötən illər ərzində Azərbaycan siyasi, iqtisadi, sosial və hərbi sahələrdə nəzərəçarpan tərəqqi əldə edib. Hazırda Cənubi Qafqazın lider dövləti olan Azərbaycan dünya birliyində özünə layiqli yer tutub, bölgədə geosiyasi mövqelərini möhkəmləndirərək beynəlxalq nüfuz qazanıb.