SİYASƏT
Xocalı soyqırımının 20-ci ildönümü dünyanın müxtəlif ölkələrində qeyd olunacaqdır
Bakı, 17 fevral (AZƏRTAC). Xocalı faciəsinin 20-ci ildönümü ilə əlaqədar dünyanın onlarla ölkəsində tədbirlər, soyqırımı qurbanlarının anma mərasimləri, sərgi və konfranslar, kütləvi aksiyalar keçiriləcəkdir.
Rusiya Federasiyasının Moskva, Sankt-Peterburq, Yekaterinburq, Murmansk və digər şəhərlərində Ümumrusiya Azərbaycanlıları Konqresi, Heydər Əliyev Fondunun Rusiya Nümayəndəliyi və Rusiyanın Azərbaycanlı Gənclər Təşkilatının təşkilatçılığı ilə anma mərasimləri, dəyirmi masa və konfranslar keçiriləcək, Xocalıda dinc əhalinin qətlə yetirilməsini əks etdirən fotosərgilər, sənədli filmlər nümayiş etdiriləcəkdir.
Diasporla İş üzrə Dövlət Komitəsinin mətbuat xidmətindən AZƏRTAC-a bildirmişlər ki, fevralın 26-da Rusiyanın Azərbaycanlı Gənclər Təşkilatı tərəfindən Moskvada “Xocalıya ədalət” kampaniyası çərçivəsində Rusiyanın ayrı-ayrı regionlarında Xocalı soyqırımının 20-ci ildönümünə həsr olunmuş tədbirlər təşkil olunacaqdır.
Xocalı faciəsinin ildönümü ilə əlaqədar tədbirlər Ukrayna, Belarus, Estoniya, Litva, Latviya və Kişinyovda da keçiriləcəkdir. İslam Konfransı Gənclər Forumunun və Ukrayna Azərbaycanlı Gənclər Birliyinin təşəbbüsü ilə Ukraynada fevral ayı “Xocalı ayı” elan olunmuşdur. “Xocalı ayı” tədbirlərinə Xarkovda start verilmişdir. Xarkov vilayət administrasiyası rəsmilərinin, Azərbaycan diasporunun fəallarının, yerli KİV nümayəndələrinin iştirak etdikləri ilk anma mərasimində 20 ilin keçməsinə baxmayaraq, beynəlxalq təşkilatlar tərəfindən Xocalı soyqırımına hüquqi siyasi qiymətin verilməməsi tarixi ədalətsizlik kimi qiymətləndirilmişdir.
Ukrayna Azərbaycanlıları Konqresinin təşkilatçılığı ilə fevralın 25-də Kiyev şəhərində Xocalı soyqırımının 20-ci ildönümünə həsr olunmuş anma mərasimi keçiriləcəkdir.
Fevralın 26-da Minskdə Belarus Azərbaycan İcmaları Konqresi, fevralın 27-də isə Kişineu şəhərində Moldova Azərbaycanlıları Konqresinin təşkilatçılığı ilə Xocalı soyqırımı qurbanlarının xatirəsinə həsr olunmuş tədbirlər keçiriləcək, yerli kütləvi informasiya vasitələrində Xocalı soyqırımı ilə bağlı materiallar dərc olunacaqdır.
Vülnüsdə Litva Azərbaycanlıları Cəmiyyəti fevralın 24-də, Tallində “Aydan” Estoniya-Azərbaycan Mədəniyyət Mərkəzi isə fevralın 25-də Azərbaycan Respublikasının bu ölkədəki səfirliyi ilə birgə Xocalı soyqırımı qurbanlarının xatirəsini anacaqlar.
Avropanın ayrı-ayrı ölkələrində, o cümlədən Almaniya, Fransa, İtaliya, habelə Danimarka, İsveç, Niderland Krallıqlarında, Polşa, Rumıniya, Macarıstan, Finlandiya, Çexiyada keçiriləcək tədbirlərdə bu ölkələrin parlamentlərinin, ictimai-siyasi təşkilatlarının, Azərbaycan diasporunun, türk, yəhudi icmalarının nümayəndələri iştirak edəcəklər.
Xocalı soyqırımının 20-ci ildönümü ilə əlaqədar Azərbaycan Diasporunun Almaniyadakı Mərkəzi Şurası tərəfindən fevralın 10-dan başlayaraq Berlin şəhərində “Biz sülh istəyirik” adlı silsilə rəsm müsabiqələrinə start verilmişdir. Fevralın 11-də Almaniyanın Hamburq şəhərində Saksen-Anhalt Əyaləti üzrə Alman-Azərbaycan Mədəniyyət Cəmiyyəti təşkilatçılığı ilə Xocalı soyqırımının 20-ci ildönümünə həsr olunmuş boks turniri keçirilmiş, yarışı izləyən 600-dən artıq tamaşaçıya Xocalı soyqırımı haqqında məlumat verilmişdir. Maqdeburq şəhərində fevralın 17-də Almaniya Sosial Demokrat Partiyasının toplantısında Xocalı soyqırımına dair məruzə təqdim olunacaq, fevralın 18-də Xocalı soyqırımı qurbanlarının xatirəsinə həsr olunmuş avtomobil yürüşü, fevralın 26-da isə alman yazıçısı Rolf Kunşun alman dilində nəşr olunmuş “Xocalı” kitabının təqdimat mərasimi keçiriləcəkdir. Fevralın 24-də Berlində Almaniyadakı Azərbaycanlıların Əlaqələndirmə Mərkəzinin və Atatürkçü Düşüncə Dərnəyi Berlin-Brandenburq Cəmiyyətinin təşkilatçılığı ilə Xocalı soyqırımının 20-ci ildönümünə həsr olunmuş “Qafqazda sülhün qorunması və Türk-Azərbaycan münasibətləri” mövzusunda konfransa keçiriləcəkdir. Fevralın 25-də Berlin-Bakı Qalereyası Bakı Pantomima teatrı ilə birgə Berlində Xocalı soyqırımına həsr olunmuş foto və rəsm sərgisi təşkil edəcək, tamaşaçıların diqqətinə Xocalı soyqırımından bəhs edən ədəbi-bədii kompozisiya təqdim edəcəkdir. Fevralın 25-də Berlində Azərbaycan Evi, Alman-Azərbaycan Həmrəylik Cəmiyyəti, Almaniyadakı Azərbaycanlıların Əlaqələndirmə Mərkəzinin birgə təşkilatçılığı ilə Xocalı soyqırımının 20-ci ildönümü münasibətilə etiraz aksiyası təşkil olunacaqdır. Xocalı soyqırımının 20-ci ildönümünə həsr olunmuş tədbirlər Almaniyanın Drezden, Kassel, Hannover və Mayns şəhərlərində də keçiriləcəkdir.
Böyük Britaniya və Şimali İrlandiya Birləşmiş Krallığında fəaliyyət göstərən Avropa Azərbaycan Cəmiyyəti Xocalı soyqırımının 20-ci ildönümü münasibətilə silsilə tədbirlər keçirəcək, o cümlədən fevralın 22-də Londonda Xocalı soyqırımına həsr olunmuş rəsm əsərlərindən ibarət sərgi təşkil edəcəkdir. Benilüks Azərbaycanlıları Konqresi fevralın 22-də Amsterdamda azərbaycanlı uşaqların Xocalıya aid əl işləri və rəsmlərindən ibarət sərgi, fevralın 23-də Haaqada “Uşaq rəsm sərgisi” təşkil edəcəkdir.
Fevralın 28-də Benilüks Azərbaycanlıları Konqresinin təşkilatçılığı ilə Belçikanın paytaxtı Brüsseldə Xocalı soyqırımının 20-ci ildönümü münasibətilə mitinq keçiriləcəkdir. Brüsseldəki Place Schuman meydanında Avropa Komissiyasının önündə saat 13.00-15.00 arasında keçiriləcək “İnsanlıq ayıbı Xocalıya ədalət mitinqi”ndə “Hamımız Xocalılıyıq! Hamımız Türkük!” şüarlarının sədaları altında ölkədə fəaliyyət göstərən Azərbaycan və Türk diaspor təşkilatlarının, siyasi partiya və ictimai təşkilatların nümayəndələrinin iştirakı planlaşdırılmışdır.
Fevralın 25-də İsveç Krallığının Malmö şəhərində İsveç Azərbaycanlıları Konqresinin təşkilatçılığı ilə Xocalı soyqırımına həsr olunmuş konfrans, fevralın 26-da Stokholm şəhərində Azərbaycan İsveç Federasiyasının təşkilatçılığı ilə seminar keçiriləcəkdir. Fevralın 26-da həmçinin Azərbaycan İsveç Federasiyası tərəfindən Stokholmda Xocalı soyqırımının 20-ci ildönümünə həsr olunmuş kütləvi etiraz aksiyasının keçirilməsi planlaşdırılmışdır.
Fevralın 26-da Xaricdə Təhsil Alan və Məzun Olmuş Azərbaycanlı Gənclərin Beynəlxalq Forumunun (ASAİF) təşkilatçılığı ilə Böyük Britaniya və Şimali İrlandiya Birləşmiş Krallığında, Misir Ərəb Respublikasında, İtaliya, Fransa, Niderland Krallığında, Kanada da Xocalı soyqırımının 20-ci ildönümünə həsr olunmuş tədbirlər keçiriləcəkdir.
Fevralın 25-də Danimarkada, Rumıniyada, fevralın 26-da Finlandiya və Macarıstanda Xocalı soyqırımı qurbanlarının xatirəsinə həsr olunmuş anım mərasimləri keçiriləcəkdir.
Fevralın 25-də Çexiyanın paytaxtı Praqanın Sülh meydanında “Azər-Çex” Cəmiyyətinin təşkilatçılığı ilə “Xocalıya ədalət” kampaniyası çərçivəsində kütləvi etiraz aksiyasının keçirilməsi planlaşdırılmışdır. Xocalı soyqırımının 20-ci ildönümü münasibətilə Gürcüstan, Qazaxıstan, Özbəkistan, Qırğızıstanda anım mərasimləri, konfrans və sərgilər təşkil olunacaqdır.
Qazaxıstanın Astana şəhərində Qazaxıstan Azərbaycanlıları Mədəniyyət Mərkəzləri İttifaqının təşkilatçılığı ilə fevralın 26-da “Xocalı soyqırımı - XX əsrin dəhşətli faciəsi” mövzusunda konfrans keçiriləcəkdir.
Türkiyənin bir sıra şəhərlərində də Xocalı soyqırımının 20-ci ildönümü münasibətilə tədbirlər keçiriləcəkdir. Fevralın 26-da İstanbulun Taksim meydanında Türkiyədə təhsil alan azərbaycanlı tələbələrin, Xaricdə Təhsil Alan və Məzun Olmuş Azərbaycanlı Gənclərin Beynəlxalq Forumunun (ASAİF), İstanbul Türkiyə-Azərbaycan Dərnəyinin, Türkiyə-Azərbaycan Dərnəkləri Federasiyasının, Azərbaycan və Türkiyə qeyri-hökumət təşkilatlarının, KİV-lərin nümayəndələrinin iştirakı ilə “TÜRKİYƏ BUNU TANI, UNUTMA XOCALINI” adı altında izdihamlı yürüş-mitinqin keçirilməsi planlaşdırılmışdır.
Fevralın 26-da Misir Ərəb Respublikasının paytaxtı Qahirədəki Ayn-Şəms Universitetində Qahirə-Türk Araşdırmalar Mərkəzinin Azərbaycan Respublikasının Misirdəki səfirliyi ilə birgə təşkilatçılığı ilə konfrans, Dubayda BƏƏ-də fəaliyyət göstərən “Azərbaycan” Cəmiyyətinin təşkilatçılığı ilə Xocalı soyqırımının 20-ci ildönümünə həsr olunmuş elmi-praktiki konfrans, Küveytdə “Vətənsevər” Azərbaycan-Küveyt Mədəniyyət və Dostluq Cəmiyyətinin təşkilatçılığı ilə anım mərasimi keçiriləcəkdir.
Xocalı soyqırımının 20-ci ildönümü münasibətilə tədbirlər ABŞ-ın Nyu-York, Los-Anceles, San-Fransisko, Hyuston şəhərlərində də keçiriləcəkdir.
Amerika-Azərbaycan Şurası, Amerika-Azərbaycan Cəmiyyəti, Azərbaycan-Nyu-York Assosiasiyası, Hyuston-Bakı Qardaşlaşmış Şəhərlər Assosiasiyasının təşkilatçılığı ilə keçiriləcək anım mərasimlərində ABŞ-ın azərbaycanlı icması ilə yanaşı, türk, yəhudi və digər icmaların nümayəndələrinin iştirakı nəzərdə tutulmuşdur.
Xocalı soyqırımı qurbanlarının xatirəsi Avstraliya, Yeni Zelandiya, ABŞ, Kanada və Meksikada da yad ediləcəkdir.
Avstraliya-Azərbaycan-Türk Dostluq Birliyi təşkilatı fevralın 26-da Sidney sakinlərinə əvvəlcədən istehsal olunmuş üzərində “Xocalı faciəsi - 1992-ci il” yazısı olan köynəklər paylayacaq, Azərbaycan-Yeni Zelandiya Dostluq Cəmiyyəti tərəfindən anım mərasimi keçiriləcəkdir.
Kanadanın Ottava, London və Kalqari şəhərlərində müvafiq olaraq Kanada-Azərbaycan Təşkilatlar Assambleyası, Kanada Azəri-Türk Assosiasiyası, Alberta Azərbaycan Mədəniyyət Mərkəzinin təşkilatçılığı ilə Xocalı soyqırımı ilə bağlı anım mərasimləri təşkil olunacaqdır.
Fevralın 26-da Xocalı soyqırımı qurbanlarının xatirəsi Meksikada fəaliyyət göstərən Latın Amerikasındakı Azərbaycan Assosiasiyası tərəfindən təşkil olunmuş anım mərasimində anılacaqdır.