Azərbaycan Respublikası Dövlət Neft Şirkətindən (ARDNŞ) AZƏRTAC-a bildirmişlər ki, bu il ölkəmizdə yanacaq-enerji kompleksinin inkişafı, o cümlədən qaz hasilatının sabitləşdirilməsi və artırılması üçün tədbirlər proqramı hazırlanmışdır. Proqramda “Azneft” İstehsalat Birliyi üzrə 2008-ci ildə qaz təhvilinin 8 milyard kubmetrə çatdırılması nəzərdə tutulmuşdur.

2006-cı ildə əsaslı tikinti işlərinə 83 milyon 457 min manat, qazma işlərinə isə 77 milyon 988 min manat vəsait yönəldilmişdir. İstehsal təyinatlı obyektlər üzrə kapital qoyuluşunun həcmi 194 milyon 587 min manat olmuşdur. Neft və qaz hasilatının artırılması məqsədi ilə stasionar platformaların inşaası sahəsində də mühüm işlər görülmüş, bir sıra vacib obyektlər istifadəyə verilmişdir. Belə ki, “Neft Daşları” yatağında tikintisinə 1999-cu ildən başlanılmış 1887 saylı dəniz stasionar platforması 2006-cı ildə istismara verilmişdir. 5 ədəd dayaq blokundan ibarət olan bu platforma 36 quyunun qazılması üçün nəzərdə tutulmuşdur. “Xəzər-4” üzən qazma qurğusu ilə qazılmış 3 quyu isə yüksək hasilatla istismardadır. Qalan quyular isə ”Bayıl Limanı” Dəniz Kəşfiyyat Qazma İdarəsi tərəfindən qazılacaq və bu quyuların istismara verilməsi yataqdan neft hasilatının artımına səbəb olacaqdır.

Ötən il “Abşeronneft” Neft və Qaz Çıxarma İdarəsinin (NQÇİ) istismar etdiyi “Şimal qırışığı” dəniz yatağında 14 hasilat quyusunun qazılması üçün yeni stasionar özülün tikintisinə başlanmış, “Günəşli” yatağındakı 13 saylı dərin dəniz özülündə tamamlama işləri sona çatdırılmışdır. “Günəşli” yatağından hasil olunan xam neftin nəqli üçün özüllərarası 4,16 kilometrlik boru xəttinin tikintisi başa çatdırılmış, Dübəndidəki 8-ci rezervuar parkı istifadəyə verilmiş, həmçinin yataqdan hasil edilən yüksək təzyiqli qazın nəqli təmin olunmuşdur.

2006-cı ildə Nəriman Nərimanov adına NQÇİ-nin balansında olan 7 saylı, “Qum adası” NQÇİ-nin istismar etdiyi 1 saylı qaz kompressor stansiyaları da yenidən qurulmuş, Əli Əmirov adına NQÇİ üzrə Kürsəngi kompressor stansiyasının genişləndirilməsi başa çatdırılmışdır.