Bakı, 27 mart, Günel Məlikova, AZƏRTAC 

Hamiləlik, doğuş, kəskin arıqlama, piylənmə, keçirilmiş cərrahi əməliyyatlar və bir sıra digər amillərin təsiri nəticəsində qarnın forma və hüdudları dəyişir. Buna səbəb qarnın ön divarının əzələlərinin zəifləməsi, sərtliyinin itməsidir. Belə dəyişikliklər özünü sallanmış dəri, piy qatları, qırışlar, dəri çatları, sellülit və bir sıra digər hallarla büruzə verir. Bu da xarici görkəmi, qaməti korlayır və ən başlıcası da psixoloji kompleksə səbəb olur. Bundan əlavə qarnın ön divarının zəifləməsi fizioloji problemlərə də gətirib çıxarır. Nəticədə bu problem kompleks yaradaraq insanların həyatına birmənalı mənfi təsir göstərir. Gün ərzində klinikamıza bu tip problemlə əlaqədar çoxsaylı müraciətlər olur. Qarında əmələ gələn bu deformasiyalar demək olar ki, müxtəlif yaş qruplarına aid qadınların ümumi probleminə çevrilib.

Klinikamıza müraciət edən pasiyentlərin əksəriyyəti bu halın aradan qaldırılmasına idman və ya pəhrizin kömək etmədiyini bildirirlər.

Belə olan halda pasiyentlərə abdominoplastika və ya qarın gərmə əməliyyatı tövsiyə edilir. Bu əməliyyat qarnın ön divarının forma və funksiyasının vəziyyətini bərpa edərək görkəmi dəyişməyə imkan verir.

Bu sözləri AZƏRTAC-a məxsusi müsahibəsində Azərbaycan Tibb Universitetinin II cərrahi xəstəliklər kafedrasının assistenti, Tədris Cərrahiyyə Klinikasının ümumi cərrahı, tibb elmləri namizədi Elçin Abdinov bildirib.

Cərrah deyib: “Pəhriz və idmanın təsir etmədiyi, qarın dərisi sallanması əmələ gəlmiş və bədən konturları düzgün olmayan insanlar bu əməliyyat üçün uyğundurlar. Həkim olaraq məsləhət görərdim ki, arıqlamaq istəyənlər çəki atdıqdan sonra, hamiləlik haqqında düşünənlər isə doğuşdan sonra bu əməliyyatı etsinlər. Cərrahi müdaxiləyə qərar verməzdən əvvəl gözlədiyiniz nəticə haqqında yaxşı düşünməli və bunları cərrahınızla ətraflı müzakirə etməlisiniz. Əməliyyatın bir sıra şərtləri var. Xüsusilə siqaret çəkənlər bu pis vərdişdən əməliyyatdan dörd həftə əvvəldən və iki həftə sonraya qədər imtina etməlidirlər. Əməliyyatdan sonra günəş şüalarından mümkün qədər uzaq durmaq, E vitamini və ya aspirindən istifadə edənlərin isə bu dərmanların qəbuluna ara vermələri lazımdır. Əməliyyatdan öncə ağır pəhriz saxlamaq məsləhət görülmür. Bundan əlavə soyuqdəymə və ya başqa bir infeksiya əməliyyatın ertələnməsinə səbəb ola bilər.

Abdominoplastika piylənmənin müalicəsi deyil. Bu orta və alt qarın nahiyəsində olan artıq yağ və sallanmış dəri toxumasının alındığı və qarın əzələlərinin gərilərək sağlamlaşdırıldığı bir cərrahi müdaxilədir. Kök insanlar bu əməliyyatdan əvvəl arıqlaya bildikləri qədər arıqlamalıdırlar. Bu əməliyyat ilə kök göbək və qarın görünüşü nəzərəçarpacaq şəkildə düzəlir, lakin əməliyyatdan qalan çapıq izi keçmir.

Abdominoplastika üçün plastik cərrahlar tərəfindən istifadə edilən bir çox üsul var.

Əməliyyatdan öncəki ilkin müayinədə pasiyentin ümumi sağlamlığı, qarın nahiyəsindəki yağ miqdarı və yerləşməsi, qarın dərisinin sallanması və artıqlığı, dəri keyfiyyəti öyrənilir. Müayinə zamanı keçirilən və ya hələ də mövcud xəstəliklər, siqaret, spirtli içki kimi pis vərdişlər və qəbul olunan dərmanlar haqqında həkimə doğru və ətraflı məlumat verilməlidir. Bu əməliyyatı istəmə səbəbiniz və əməliyyatdan nələr gözlədiyiniz həkimlə hərtərəfli müzakirə olunmalıdır. Bundan əlavə müayinə zamanı, anesteziya növü, xəstəxanada qalacağınız müddət və əməliyyatdan sonra qarşılaşacağınız problemlər də həkimlə öncədən danışılmalıdır.

Tam abdominoplastika əməliyyatı genişliyindən asılı olaraq 2-5 saat, hissəvi abdominoplastika isə 1-2 saat davam edə bilər.

Ölkəmizdə cərrahlar bu əməliyyat üçün əsasən ümumi anesteziyaya üstünlük verirlər. Adətən bir qalçadan digərinə qədər uzanan, çimərlik geyiminin içinə gizlədilə bilən bir kəsik xətti və göbək dəliyi ətrafına ikinci bir kəsik aparılır. Hissəvi abdominoplastikada kəsik xətti daha qısa olur və göbək yeri dəyişdirilməyə bilər. Əməliyyat zamanı qarın dərisi, qasıqlardan etibarən qabırğa sümüklərinin səviyyəsinə qədər altındakı əzələlərdən sərbəstləşdirilir. Qarın əzələlərində bir zəiflik və ya yırtıq varsa, oraya əlavələr edilir, artıq dəri kəsilərək bədəndən kənarlaşdırılır.

Mini-abdominoplastikada isə aparılan prosedurlar daha məhduddur. Əməliyyat bitdikdən sonra yara istəyə görə tək və ya gizli, yəni intradermik tikişlə bağlanır. O nahiyədə toplanan artıq mayeni xaric etmək üçün dren adlı bir və ya iki boru dəri altına yerləşdirilə bilər.

Əməliyyatdan sonrakı ilk bir neçə gün qarın nahiyəsində şişlik və ağrı kəsici dərmanlarla aradan qaldırıla bilən ağrı ola bilər. Drenlər 1-3 gün, tikişlər isə 1-3 həftə sonra çıxarılır. Əməliyyat olunan pasiyentlər xəstəxanada təxminən 1-3 gün qalır. Əməliyyatın izi ilk 3-6 ay ağırlaşmış kimi görünə bilər, bu normaldır. İzlərin düzləşməsi və solması 9 ay ilə 1 ilə qədər uzana bilər.

Hissəvi və ya tam abdominoplastika əməliyyatları qarın əzələlərində zəiflik və ya dəri sallanması olan xəstələr üçün çox gözəl nəticə verir. Müntəzəm idman və pəhrizlə əldə olunan nəticə illərlə qoruna bilər.

Hər il yüzlərlə abdominoplastika əməliyyatı keçirilir. Hər cərrahi müdaxilə müəyyən risk daşıyır. Bu əməliyyat təcrübəli cərrah tərəfindən aparılmalıdır. Xəstənin əməliyyatı qəbul etməsində cərrahi müdaxilənin risk və faydalarının qarşılaşdırılması çox vacibdir.

Öncədən aparılan düzgün müayinə, uyğun xəstəxana şəraiti və təcrübəli cərrah olduqda bu əməliyyatın infeksiya və qanaxma kimi ağırlaşmalarına nadir rast gəlinir. Yaranın sağalmasında gecikmə, pis sağalma və ya yara izi qalması kimi hallarda ikinci əməliyyata ehtiyac ola bilər. Bu problemə siqaret çəkən insanlarda daha çox rast gəlinir.

Əməliyyatın uzaq nəticələrinə gəldikdə isə onu deyə bilərəm ki, yaşlanma, hamiləlik və ya çəkinin artıb-azalması ilə əlaqədar əməliyyat nahiyəsi xaricində bədən konturları dəyişə bilər. Ümumiyyətlə, bu və ya bunun kimi bir sıra məqamları cərrahla danışaraq öncədən məlumat almaq lazımdır.

Onu da qeyd edim ki, bir abdominoplastika əməliyyatı yalnız xarici görünüşü deyil, özünəgüvən hissini də artırır”.