“ABDULLA ŞAİQ VƏ ƏDƏBİ MÜHİTİ”
AZƏRTAC xəbər verir ki, görkəmli uşaq yazıçısı Abdulla Şaiqin ev-muzeyində “Abdulla Şaiq və ədəbi mühiti” mövzusunda anma tədbiri keçirilmişdir.
Tədbirdə A.Şaiqin müasirləri, XX əsrin görkəmli ziyalıları Nəriman Nərimanov, Üzeyir Hacıbəyov, Cəlil Məmmədquluzadə, Hüseyn Cavid, Cəfər Cabbarlı, Səməd Vurğun, Yusif Vəzir Çəmənzəminli və başqaları ilə sıx münasibətindən söz açılmışdır. Vurğulanmışdır ki, Şaiq əfəndinin ünsiyyətdə olduğu və müxtəlif janrlarda yazıb-yaradan bu adamlar heç vaxt şan-şöhrət, var-dövlət dalınca qaçmamışlar. Onlar həmişə xalqının gələcəyi, onun mənəvi zənginliyi haqqında düşünmüş, bu yolda həyatlarını qurban verməkdən belə çəkinməmişlər.
Muzeyin əməkdaşı Arzu Hacızadə iştirakçılara burada görülən işlər barədə ətraflı məlumat vermiş və bildirmişdir ki, bu ev həmişə qonaqlı-qaralı olmuşdur. Dövrünün ziyalıları Abdulla Şaiqlə ünsiyyətdən mənəvi zövq almışlar.
Səməd Vurğunun ev-muzeyinin direktoru Aybəniz Vurğunqızı, Yusif Vəzir Çəmənzəminlinin oğlu Orxan Vəzirov, sənətşünaslıq namizədi Minəxanım Əsədli və başqaları tədbirdə çıxış edərək Şaiq əfəndinin müasirlərinə sədaqətindən, heç nədən çəkinmədən onların xeyir və şərində iştirakından ətraflı danışmışlar. Uşaqların tərbiyəsində Abdulla Şaiq yaradıcılığının mühüm əhəmiyyəti vurğulanmışdır.
Tədbirdə H.Mahmudbəyov adına liseyin şagirdləri A.Şaiqin şeirlərini söyləmiş, onun sözlərinə yazılmış mahnılar səsləndirilmişdir.
Bölmənin digər xəbərləri
