İstanbul, 9 noyabr, AZƏRTAC

Türkiyə Cümhuriyyətinin Qazi Universitetində Azərbaycan Dövlət Pedaqoji Universiteti (ADPU) ilə təhsil, akademik və mədəniyyət məsələlərini əhatə edən Əməkdaşlıq Protokolu və “Erasmus” sazişinin imzalanma mərasimi keçirilib.

ADPU-dan AZƏRTAC-a bildiriblər ki, Qazi Universiteti rektorluğunun Yeni Sənət zalında keçirilən protokol mərasimində rektorlar Musa Yıldız və Cəfər Cəfərov müqavilələri imzalayıblar.

Mərasimdə Qazi Universiteti nümayəndə heyətinin üzvlərindən prorektorlar Yücel Gelişli və Fazlı Polat, rektorun məsləhətçiləri Fahri Temizyürek və Ahmet Bilal Dostbil, Qazi Təhsil Fakültəsinin dekanı Mahmut Selvi, Təhsil və Xarici Əlaqələr Qurumunun Koordinatoru İhsan Kalenderoğlu, Koordinator müavini Fatma Nur Fişne, Qazi TÜRKDAM-ın direktoru Alev Çakmakoğlu Kuru və direktor müavini Bülent Aksoy, Qazi TÖMER direktor müavini Mustafa Kurt, Qazi EPAR Müdiri Mahmut Çitil, baş katib Raqib Akyürek, müavinləri Raşit Yıldırım və Mehmet Əli Özkan iştirak ediblər. ADPU nümayəndə həyətindən tədbirə Azərbaycan Respublikasının Türkiyədəki səfirliyinin təhsil müşaviri Nəcibə Nəsibova, prorektorlar Eldar Aslanov və Könül Pirverdiyeva, dekan müavini Könül Həsənova və Beynəlxalq Əlaqələr şöbəsinin müdiri Günay Məhərrəmova qatılıblar.

Akademik əməkdaşlıq üçün bir araya gələn nümayəndə heyətləri protokol imzalanma mərasimindən əvvəl Azərbaycanın Mingəçevir Dövlət Universiteti (MDU) və Karatay Universitetinin tərəfdaşlığı ilə 8 Noyabr - Zəfər Gününün ikinci ildönümü münasibətilə təşkil olunan proqramda iştirak ediblər. Onlayn proqramda çıxış edən təhsil müşaviri N.Nəsibova deyib: “Prezident İlham Əliyevin Qarabağ müharibəsində qazanılan Qələbənin şərəfinə elan etdiyi Zəfər Gününün tarixi əhəmiyyəti var. Bizim ümumi qələbəmiz hər yerdə qeyd olunur. Qazi Universitetində keçiriləcək təntənəli tədbir üçün də M.Yıldıza və əməyi keçən hər kəsə təşəkkür edirəm”.

Qazi Universitetinin rektoru M.Yıldız çıxışında deyib: “Bu gün bizim üçün əhəmiyyətli bir gündür. Qarabağ Zəfərinin ikinci ildönümüdür. Qarabağ hadisələri başlayanda Can Azərbaycana dəstəyimizi göstərmək üçün Qazi Universitetinin binasına Azərbaycan Bayrağını və Türkiyə Cümhuriyyətinin Bayrağını asdıq. Yenə o vaxt Qazi Universitetində Qarabağın dünəni, bu günü və sabahı mövzusunda panel keçirdik. Həmin paneldə müharibənin qələbə ilə başa çatacağını bildirdik. Bu gün bu proqramda MDU rektoru Şahin Bayramovun dəvəti ilə qonaq olduq. Universitetimizdə də bayram proqramı olacaq. Karatay Universitetinin rektoru Fevzi Rıfat Ortaça da təşəkkür edirəm”.

Pedaqoji Universitetin rektoru C.Cəfərov çıxışında deyib: “Biz böyük Zəfər bayramı ərəfəsindəyik. Azərbaycanda çoxlu müxtəlif mərasimlər keçiririk. Bu günü qardaş Türkiyədəki Qazi Universitetində də qeyd edəcəyik. Türkiyə bir çox sahədə böyük uğurlar qazanıb. Qazi Universiteti Türkiyəni daha yaxşı gələcəyə aparan qurumlardan biridir. Bu gün bizi burada qəbul etdiyi üçün Qazi Universitetinə təşəkkür etmək istəyirəm. Universitetlərarası akademik əməkdaşlığın faydalı olmasını arzulayıram”.

Onlayn proqramdan sonra Qazi Universitetinin tanıtım filmi nümayiş etdirilib. Filmin nümayişindən sonra nümayəndə heyətlərinin görüşü baş tutub. Protokolun imzalanma mərasiminin sonunda rektorlar bir-birinə xatirə hədiyyələri təqdim ediblər. Bundan əlavə, M.Yıldız Qazi Universitetinin meşəsalma işləri çərçivəsində Azərbaycan Dövlət Pedaqoji Universitetinin nümayəndə heyətinin üzvlərinə fidan sertifikatı təqdim edib.

Mərasim kollektiv xatirə şəklinin çəkilməsi ilə başa çatıb.