AĞSTAFADA ÜÇ AYIN YEKUNLARI İLƏ BAĞLI MÜŞAVİRƏ KEÇİRİLMİŞDİR
AZƏRTAC-ın müxbiri xəbər verir ki, Ağstafa Rayon İcra Hakimiyyətində cari ilin üç ayında görülmüş işlər və qarşıda duran vəzifələrə həsr olunmuş geniş şura iclası keçirilmişdir.
Tədbir iştirakçıları yığıncaqdan əvvəl ümummilli lider Heydər Əliyevin adını daşıyan parkda ulu öndərin büstü önünə əklil və tər çiçək qoymuş, xatirəsini ehtiramla yad etmişlər.
Rayon icra hakimiyyətinin başçısı Elxan Usubov hesabat məruzəsi ilə çıxış etmişdir. Natiq son üç ayda görülən işlərdən söhbət açaraq cari ilin birinci rübündə rayonda kənd təsərrüfatı məhsulu istehsalı artımının 1,1 dəfə, xidmət sahələrində artımın isə 1,7 dəfə təşkil etdiyini bildirmişdir. Həmçinin yeni iş yerlərinin yaradılması, sahibkarlığın inkişafına dəstək, tikinti-quruculuq və abadlıq işləri istiqamətində də uğurlar qazanıldığını qeyd edən natiq cari ilin birinci rübündə ötən ilin müvafiq dövrü ilə müqayisədə tikinti sahəsində 101 faiz, pərakəndə əmtəə dövriyyəsinda 130,3 faiz, nəqliyyat xidmətində 102,7 faiz, əhaliyə göstərilən pullu xidmətlər sahəsində 166,6 faiz artım olduğunu diqqətə çatdırmışdır. Rayon üzrə orta aylıq əmək haqqı 96,10 manat olmuşdur ki, bu da ötən ilin müvafiq dövrü ilə müqayisədə 27,12 manat çoxdur.
Hesabat dövründə rayonda məhsul istehsalının artım səviyyəsi də yüksək olmuşdur. Ötən ilin müvafiq dövrü ilə müqayisədə kənd təsərrüfatı məhsulu istehsalı 109,2 faiz artmışdır.
2008-ci ilin üç ayında 246 yeni iş yeri yaradılmışdır ki, bununla da rayon üzrə 2007-ci ildən bəri yaradılan iş yerlərinin sayı 5398-ə çatdırılmışdır. Regionların sosial-iqtisadi inkişafı Dövlət Proqramı çərçivəsində yaradılması nəzərdə tutulan 5738 yeni iş yerinin 94,1 faizi artıq icra olunmuşdur. Cari ilin əvvəlindən Ağstafa şəhərinin Ü.Hacıbəyov, M.Ə.Rəsulzadə və R.Rəcəbov küçələrində irimiqyaslı tikinti-abadlıq işlərinə başlanmışdır. Həmin küçələrdə yolboyu 104 kubmetr beton bünövrə tökülmüş, bazarlara 6954 kvadratmetr üzlük daş döşənmişdir. Hesabat dövründə inşasına başlanmış Heydər Əliyev Mərkəzinin tikintisi cari ilin ən böyük layihəsidir. Həmçinin Ağstafa tikiş fabrikinin inşası üçün torpaq sahəsinin ayrılması təmin olunmuşdur.
Rayon sakinlərinin təbii qaz ilə təchizatının yaxşılaşdırılması üçün bir sıra tədbirlər görülmüşdür. Şəhərin M.Ə.Rəsulzadə və Ş.Qurbanov küçələrində ictimai yaşayış binalarına yeni magistral qaz xətti çəkilərək istismara verilmişdir. Poylu kəndinə qaz verilməsi təmin olunmuş, Aşağı Göycəli, Həsənsu, Eynallı və Tatlı kəndlərində texniki təmir və bərpa işləri davam etdirilir.
Rayonda şəhid ailələri və Qarabağ müharibəsi əlillərinin problemləri daim diqqət mərkəzindədir. Onlar üçün inşa olunan 32 mənzilli bina bu günlərdə istifadəyə veriləcək və həmin kateqoriyadan olan insanlar üçün daha 16 mənzilli binanın tikintisinə başlanacaqdır.
Qarşıda duran vəzifələrdən söz açan natiq yaxın günlərdə ictimai yaşayış binalarının dam örtüklərinin dəyişdiriləcəyinə, Heydər Əliyev prospektində əsaslı bərpa və abadlıq işlərinin görüləcəyinə, kəndlərdə sosial obyektlərin tikintisinə və kəndarası yolların təmirinə başlanacağını qeyd etmişdir.
İştirakçılar adından Azərbaycan Prezidenti İlham Əliyevə müraciət qəbul olunmuşdur.
Şura iclasında Prezidentin İcra Aparatının məsul işçisi Habil Əzənmədov iştirak etmişdir.
Bölmənin digər xəbərləri
