Bakı, 27 fevral (AZƏRTAC). Fevralın 27-də Azərbaycan Milli Elmlər Akademiyasının (AMEA) əsas binasında AMEA-nın Yer Elmləri Bölməsinin və AMEA-nın akademik Həsən Əliyev adına Coğrafiya İnstitutunun birgə təşkilatçılığı ilə XX əsr Azərbaycan coğrafiyaşünaslıq elminin görkəmli nümayəndəsi, yorulmaz tədqiqatçı, fədakar alim və pedaqoq, Əməkdar Elm Xadimi, akademik Budaq Budaqovun 85 illiyinə həsr olunmuş xatirə günü keçirilmişdir.

AZƏRTAC xəbər verir ki, əvvəlcə tədbir iştirakçıları alimin əsərlərindən ibarət sərgi ilə tanış olmuşlar.

Tədbirdə AMEA-nın vitse-prezidenti, akademik Akif Əlizadə Azərbaycan coğrafiya elminin görkəmli nümayəndələrindən olan Budaq Budaqovun coğrafiyaşünaslıq elminin inkişafında xidmətlərindən, zəngin elmi yaradıcılığından danışmışdır.

Alimin bütün mənalı ömrünü coğrafiya elminin inkişafına sərf etdiyini vurğulayan A.Əlizadə demişdir ki, Budaq Budaqovun tədqiqatlarının nəticələri ölkəmizdə və xaricdə nəşr edilmiş 600-ə yaxın elmi əsərdə, o cümlədən 25 monoqrafiyada əksini tapmışdır. Görkəmli alim ömrü boyu ekologiya və ətraf mühitin qorunmasını, ölkəmizin zəngin sərvətlərindən səmərəli istifadə olunmasını təbliğ etmişdir.

Coğrafiya İnstitutu direktorunun müavini, AMEA-nın müxbir üzvü Ramiz Məmmədovun “Akademik Budaq Budaqovun həyatı və yaradıcılığı” mövzusunda məruzəsi dinlənilmişdir. Bildirilmişdir ki, akademik Budaq Budaqov 1928-ci il fevralın 23-də keçmiş Ermənistan SSR-in Zəngibasar rayonunun Çobankərə kəndində anadan olmuşdur. Orta məktəbi bitirdikdən sonra 1945-1947-ci illərdə Yerevanda Azərbaycan pedaqoji məktəbində təhsilini davam etdirmiş, 1947-1951-ci illərdə Azərbaycan Dövlət Pedaqoji İnstitutunun coğrafiya fakültəsində ali təhsil almışdır. O, 1951-1955-ci illərdə Moskvada SSRİ Elmlər Akademiyasının Coğrafiya İnstitutunun aspiranturasında oxumuşdur.

Əmək fəaliyyətinə 1955-ci ildən etibarən Azərbaycan Respublikası Elmlər Akademiyasının Coğrafiya İnstitutunda kiçik elmi işçi kimi başlayan Budaq Budaqov 1994-cü ildən ömrünün sonunadək AMEA-nın Həsən Əliyev adına Coğrafiya İnstitutunun direktoru vəzifəsində çalışmışdır.

O, 1955-ci ildə namizədlik, 1967-ci ildə doktorluq dissertasiyalarını müdafiə etmiş, 1969-cu ildə professor elmi adını almışdır. 1976-cı ildə akademiyanın müxbir üzvü, 1989-cu ildə isə həqiqi üzvü seçilmişdir.

B.Budaqov respublikamızda coğrafiya elminin inkişafına qiymətli töhfələr vermişdir. Onun tədqiqatlarının başlıca istiqamətlərini geomorfologiya, landşaftşünaslıq, paleocoğrafiya və toponimika məsələləri təşkil etmişdir. Alimin əsas elmi nailiyyətləri Böyük Qafqazın Azərbaycan hissəsinin geomorfologiyasının, yeni tektonik hərəkətlərin və qədim buzlaşmanın aşkara çıxarılması ilə sıx bağlıdır. Ölkəmizin ərazisinin irimiqyaslı landşaft xəritələrinin və atlaslarının tərtibində onun mühüm xidmətləri vardır.

Xalq Şairi Nəriman Həsənzadə “O, Vətənə qayıdası idi” mövzusunda məruzəsində B.Budaqovun vətənpərvər bir alim olmasından, insanlarla mehriban ünsiyyətindən söz açmışdır.

Tədbirdə professor Şövqi Göyçaylı “Akademik Budaq Budaqovun pedaqoji fəaliyyəti” mövzusunda məruzə ilə çıxış etmişdir. Qeyd olunmuşdur ki, B.Budaqovun elmi, ictimai-siyasi və pedaqoji fəaliyyəti vəhdət təşkil etmişdir. Alim respublikamızda coğrafiyaşünaslar məktəbinin formalaşdırılması üçün bilik və bacarığını əsirgəməmiş, coğrafiya dərsliklərinin hazırlanması və yüksəkixtisaslı kadrların yetişdirilməsi işinə böyük əmək sərf etmişdir.

Bakı Dövlət Universitetinin rektoru, Milli Məclisin deputatı, akademik Abel Məhərrəmov, AMEA-nın Ağsaqqallar Şurasının sədri, akademiyanın müxbir üzvü Rafiq Qasımov, şair Hikmət Mahmud və başqaları akademik Budaq Budaqovun coğrafiya elminin inkişafında xidmətlərindən, çoxşaxəli fəaliyyətindən, elmi irsinin əhəmiyyətindən danışmışlar. Bildirilmişdir ki, görkəmli alim zəngin yaradıcılığı ilə Azərbaycan coğrafiya elminə böyük töhfələr vermişdir.

Mərhum akademikin ailəsi adından çıxış edən qızı Sevinc Budaqova alimin xatirəsinə göstərilən hörmət və ehtirama görə tədbirin təşkilatçılarına və iştirakçılarına dərin minnətdarlığını bildirmişdir.