AKADEMİK ROALD SAQDEYEV AZƏRBAYCANA GƏLMİŞDİR
AZƏRTAC xəbər verir ki, görkəmli alim-fizik, akademik Roald Saqdeyev Bakıya gəlmişdir. Aprelin 27-dək davam edəcək səfər çərçivəsində R.Saqdeyev Rabitə və İnformasiya Texnologiyaları Nazirliyində (RİTN) bir sıra görüşlər keçirəcəkdir.
Qeyd edək ki, bu, R.Saqdeyevin Azərbaycana ilk səfəri deyil. Dünya şöhrətli fizik 2007-ci ilin fevral ayında Azərbaycanda olmuş və RİTN-də «Peyk texnologiyalarının müasir vəziyyəti və perspektivləri» mövzusunda seminar keçirmişdir.
Moskva Dövlət Universitetinin məzunu olan akademik R.Saqdeyev İ.V.Kurçatov adına Moskva Atom Enerjisi İnstitutunda, SSRİ EA-nın Nüvə Fizikası İnstitutunun Sibir şöbəsində çalışmışdır. 1989-cu ildən Merilend Universitetinin (ABŞ) professorudur, eyni zamanda Rusiya Elmlər Akademiyasının Kosmik Tədqiqatlar İnstitutunun baş elmi işçisidir.
Roald Saqdeyev plazma fizikası, istilik-nüvə sintezi problemləri və kosmik fizika üzrə əsərlərin müəllifidir.
