Astana, 6 iyun, AZƏRTAC

Aysun Tanrıverdiyeva Y.A.Buketov adına Karaqanda Milli Tədqiqat Universitetində beynəlxalq münasibətlər ixtisası üzrə təhsil alır. O, beynəlxalq layihələrdə və diplomatlarla görüşlərdə iştirak edir, gələcəkdə isə peşəkar fəaliyyətini diplomatiya və Azərbaycanın maraqlarının beynəlxalq səviyyədə təbliği ilə bağlamağı planlaşdırır.

– Aysun, siz Şəki şəhərində anadan olmusunuz, uşaqlığınız Azərbaycanda keçib, sonra isə təhsilinizi Qazaxıstanda davam etdirmisiniz. İki ölkə arasındakı həyat beynəlxalq münasibətlər və diplomatiya seçiminizə necə təsir edib?

– Mən Şəkidə dünyaya göz açmışam. Uşaqlığımın ilk illəri təmiz havası və füsunkar təbiəti ilə yadda qalan, mənim üçün xüsusilə əziz olan kiçik dağ kəndi Təpəcənnətdə keçib.

Uşaqlıqdan ailəm vasitəsilə tarixi irsimizlə bağlılıq hiss etmişəm. Babamın sözlərinə görə, köklərimiz qədim Oğuz-Türk irsinə, o cümlədən Qaraqoyunlular dövrünə gedib çıxır. Bu amil tarixə, mədəniyyətə və mənşəyimə marağımı həmişə artırıb.

Sonralar ailə vəziyyəti ilə əlaqədar təhsilimi Qazaxıstanda davam etdirməli oldum. Başqa ölkədə yaşamaq mənim üçün mühüm təcrübə idi. Bu, uyğunlaşma, yeni mühit, fərqli həyat tempi və başqa mədəni kontekst baxımından çətin dövr idi. Məhz həmin vaxt müxtəlif mədəniyyətləri anlamağın və insanlarla ortaq dil tapmağın nə qədər vacib olduğunu dərk etdim. Düşünürəm ki, beynəlxalq münasibətlərə marağım da məhz bu dövrdə ölkələri, xalqları və mədəniyyətləri birləşdirən sahə kimi formalaşmağa başladı.

– Niyə məhz diplomatiya sizin peşəkar məqsədinizə çevrildi?

– Uşaqlıqdan ətrafımda baş verən hər şey məndə maraq doğurub – təkcə gündəlik həyatda deyil, həm də ölkəmdə və dünyada baş verən hadisələrdə. Həmyaşıdlarım daha çox oyunlarla maraqlandığı vaxt mən valideynlərimlə xəbərləri müzakirə etməkdən, suallar verməkdən və beynəlxalq məsələlər haqqında düşünməkdən zövq alırdım.

Ailəm tərbiyəmdə mühüm rol oynayıb. Valideynlərim məndə tarixə maraq, ünsiyyət mədəniyyətinə, etik davranış qaydalarına hörmət aşılayıblar. Məni hər zaman şəxsiyyət kimi qəbul ediblər, yaşımdan asılı olmayaraq fikrimi soruşublar və mövqeyimi əsaslandırılmış şəkildə ifadə etməyi öyrədiblər. Bu, dünyagörüşümün formalaşmasına ciddi təsir göstərib.

Atam da həyatımda mühüm rol oynayıb. Atam Azər Tanrıverdiyev Azərbaycan Ordusunun zabiti olub. O, Cəmşid Naxçıvanski adına Hərbi Liseyi və Azərbaycan Silahlı Qüvvələrinin Hərbi Akademiyasını bitirib, baş leytenant rütbəsində minaatan batareyasının komandiri kimi xidmət edib. Həyatını Azərbaycan Respublikasına hərbi xidmətə həsr edib.

Təəssüf ki, onu erkən yaşda itirdik. Onun nümunəsi mənim üçün məsuliyyətin, intizamın və Vətənə sədaqətin simvoluna çevrilib. Bunun sayəsində uşaqlıqdan məndə dövlətə dərin hörmət və vətənpərvərlik hissi formalaşıb.

Zaman keçdikcə bütün bunlar məni təbii şəkildə diplomatiyaya yönləndirdi. Dialoq, qarşılıqlı hörmət və beynəlxalq səviyyədə ölkəmin maraqlarına xidmət etmək ideyası mənə çox yaxındır.

– Siz Azərbaycan, türk, rus, qazax və ingilis dillərini bilirsiniz, həmçinin fransız dilini öyrənirsiniz. Dilləri bilmək təhsilinizdə, ünsiyyətinizdə və beynəlxalq layihələrdə iştirakınızda sizə necə kömək edir?

– Uşaqlıqdan dillərə marağım olub. Zaman keçdikcə anladım ki, dil sadəcə bacarıq deyil, həm də insanları və dünyanı fərqli şəkildə qavramaq vasitəsidir. Bir dildən digərinə keçəndə hətta düşüncə tərzi də dəyişir, eyni vəziyyətə müxtəlif baxış bucaqlarından yanaşmağa başlayırsan. Boş vaxtlarımda bildiyim xarici dilləri tədris edirəm.

Hər bir dildə insan sanki özünün bir qədər fərqli versiyasına çevrilir, mədəniyyəti, ünsiyyət xüsusiyyətlərini və insanların düşüncə tərzini daha yaxşı anlayır.

Dilləri bilmək mənə yeni mühitə daha tez uyğunlaşmağa, müxtəlif ölkələrdən olan insanlarla dialoq qurmağa və beynəlxalq ünsiyyətdə özümü daha inamlı hiss etməyə kömək edir. Diplomatiya sahəsində fəaliyyət göstərmək üçün bu, şübhəsiz ki, böyük üstünlükdür.

– Sizcə, Azərbaycan gəncləri Azərbaycanla Qazaxıstan arasında mədəni və humanitar əlaqələrin möhkəmlənməsində hansı rol oynayırlar?

– Hesab edirəm ki, gənclər ölkələr arasında mədəni və humanitar əlaqələrin inkişafında mühüm rol oynayırlar. Onlar dialoqa, yeni ideyalara, birgə layihələrə və mədəniyyətlərarası mübadiləyə açıqdırlar.

Bu yaxınlarda Qazaxıstandakı Azərbaycan milli-mədəni təşkilatlarının fəaliyyəti, o cümlədən onların gənclərlə bağlı layihələri ilə tanış oldum. Gənclərin öz mədəniyyətlərinə maraq göstərməsi, milli kimliklərini qorumağa çalışması və eyni zamanda Azərbaycanla Qazaxıstan arasında əlaqələrin möhkəmləndirilməsində iştirak etməsi sevindirici haldır.

Bundan əlavə, bu gün gənclər üçün müxtəlif təhsil, qrant və beynəlxalq imkanlar mövcuddur. Bu imkanlar onlara yeni biliklər qazanmağa, təcrübə mübadiləsi aparmağa və humanitar əməkdaşlığın əhəmiyyətini daha yaxşı dərk etməyə şərait yaradır. Bütün bunlar göstərir ki, gənclər iki ölkə arasındakı münasibətlərin gələcəyinin mühüm hissəsidir.

– Siz beynəlxalq tədbirlərdə və müxtəlif ölkələrdən olan diplomatlarla görüşlərdə iştirak etmisiniz. Hansı təcrübə sizin üçün daha yaddaqalan olub və nə üçün?

– Bir neçə görüş mənim üçün xüsusilə yaddaqalan olub. Bu görüşlər diplomatiyanın praktikada necə işlədiyini, canlı dialoqun, qarşılıqlı hörmətin və konkret layihələrin əhəmiyyətini görməyə imkan verib.

Belə görüşlərdən biri Litvanın Azərbaycandakı keçmiş səfiri, hazırda isə Qazaxıstandakı diplomatik missiyanın rəhbəri Egidiyus Navikas ilə ünsiyyətim olub. O, hər iki ölkədəki fəaliyyət təcrübəsini bölüşür, ikitərəfli münasibətlərin inkişafından və konkret layihələrin əməkdaşlığın möhkəmlənməsinə necə töhfə verdiyindən danışırdı. Onun Bakı və Azərbaycan haqqında səmimi fikirlərini eşitmək mənim üçün xüsusilə xoş idi.

Bu yaxınlarda Astanada Azərbaycanın Müstəqillik Günü və Silahlı Qüvvələr Gününə həsr olunmuş tədbir də mənim üçün əlamətdar oldu. Həmin tədbirə məni Azərbaycanın Qazaxıstandakı səfiri Ağalar Atamoğlanov və xanımı dəvət etmişdilər.

Belə bir mühitdə olmaq və ölkəmin nümayəndələrini yüksək səviyyədə təmsil olunarkən görmək mənim üçün böyük qürur və şərəf idi.

Bu görüşlər mənə diplomatiyanın hər şeydən əvvəl insanlar, dialoq və etimad qurmaq bacarığı olduğunu anlamağa kömək etdi. Eyni zamanda, bu sahədə göstərdiyim səylərin diqqətdən kənarda qalmadığını və qiymətləndirildiyini hiss etdim.

– Qarşınıza hansı peşəkar məqsədlər qoyursunuz və gələcəkdə beynəlxalq arenada Azərbaycanın maraqlarına necə xidmət etmək istərdiniz?

– Hazırda iki istiqamətdə – beynəlxalq münasibətlər və beynəlxalq iqtisadi əlaqələr, o cümlədən ixrac-idxal sahəsində bilik və bacarıqlarımı inkişaf etdirirəm. Mənim üçün ölkələr arasında təkcə siyasi deyil, həm də praktik əməkdaşlıq böyük maraq doğurur.

Gələcəkdə Azərbaycanı beynəlxalq səviyyədə, xüsusilə siyasi, mədəni və iqtisadi əlaqələrin inkişafı üçün geniş potensiala malik ölkələrdə təmsil etmək istərdim. Həmçinin davamlı inkişaf və beynəlxalq əməkdaşlıq sahələri, o cümlədən BMT İnkişaf Proqramının fəaliyyəti mənə yaxındır.

Əsas məqsədim ölkələr arasında əlaqələrin möhkəmlənməsinə real töhfə verə biləcəyim, Azərbaycanın maraqlarını layiqincə təmsil edəcəyim və beynəlxalq əməkdaşlığa praktik fayda gətirəcəyim sahədə fəaliyyət göstərməkdir.