Özbəkistan Prezidentinə FAO-nun yüksək mükafatı təqdim olunub
Bakı, 6 oktyabr, AZƏRTAC
Oktyabrın 6-da Özbəkistan Respublikasının Prezidenti Şavkat Mirziyoyev Birləşmiş Millətlər Təşkilatının Ərzaq və Kənd Təsərrüfatı Təşkilatının (FAO) Baş direktoru Qu Donqyu ilə görüşüb.
AZƏRTAC UZA agentliyinə istinadla xəbər verir ki, FAO-nun Baş direktoru Ümumdünya Pambıq Gününə həsr olunmuş beynəlxalq konfransda və Dənizə çıxışı olmayan inkişaf etməkdə olan ölkələrdə kənd təsərrüfatı və ərzaq sistemlərinin inkişafı üzrə İkinci Forumda iştirak etmək üçün Özbəkistanda səfərdədir.
Tərəflər Özbəkistanın BMT-nin bu nüfuzlu ərzaq təhlükəsizliyi və kənd təsərrüfatının inkişafı agentliyi ilə strateji tərəfdaşlığının daha da gücləndirilməsini müzakirə ediblər.
Şavkat Mirziyoyev bildirib ki, Özbəkistan hazırda FAO ilə 17 birgə layihə həyata keçirir. Həmçinin ölkə ilk dəfə olaraq 2028-2029-cu illər üçün FAO Şurasına üzv seçilib. Oktyabrın 7-də Daşkənddə dənizə çıxışı olmayan ölkələr üçün Aqro-İnnovasiya Mərkəzi də fəaliyyətə başlayacaq.
Görüşün sonunda Özbəkistan liderinə FAO tərəfindən 1977-ci ildə təsis edilən “Aqrikola” medalı təqdim olunub. Bu medal aclığın aradan qaldırılması və ərzaq təhlükəsizliyinin təmin edilməsi kimi universal bəşəri məqsədlərə çatmaqda sədaqət və praktiki fəaliyyət nümayiş etdirən görkəmli şəxslərə verilir.
Bölmənin digər xəbərləri
