Deputat: Regionların sosial-iqtisadi inkişafı Prezident İlham Əliyevin siyasətinin mühüm tərkib hissəsidir
Bakı, 6 oktyabr, AZƏRTAC
Prezident İlham Əliyevin rəhbərliyi ilə həyata keçirilən daxili siyasətin mühüm tərkib hissələrindən biri regionlarımızın, şəhər və rayonlarımızın sosial-iqtisadi potensialının üzə çıxarılması və inkişaf etdirilməsidir. Oktyabrın 5-də dövlətimizin başçısının iştirakı ilə Pirallahı Sənaye Parkında “Gen Pharma Caucasus Manufacturing Operations” MMC-nin dərman istehsalı müəssisəsinin açılması rayonun sosial-iqtisadi tərəqqisi üçün mühüm əhəmiyyət kəsb edir.
Bu fikirləri AZƏRTAC-a açıqlamasında Milli Məclisin deputatı, Mədəniyyət komitəsinin sədr müavini Günay Əfəndiyeva deyib.
Pirallahı Sənaye Parkının Azərbaycanın vacib sənaye komplekslərindən biri olduğunu deyən deputat bildirib ki, burada artıq müxtəlif tibbi müəssisələr, o cümlədən “Diamed” şpris və dərman istehsalı zavodları fəaliyyət göstərir. İndi isə həmin sənaye kompleksində beynəlxalq standartlara uyğun yeni müəssisə istifadəyə verildi. Bu o deməkdir ki, insanlara lazım olan bir çox dərman vasitələrini biz artıq öz ölkəmizdə hazırlamaq imkanına malikik. Bu, həm də ixtisaslı mütəxəssislərin cəlb olunmasına, yeni iş yerlərinin açılmasına şərait yaradır.
Bundan başqa, zavodda Azərbaycan Tibb Universiteti və Qarabağ Universiteti üçün tədris bazasının yaradılması nəticəsində tibbi ixtisaslar üzrə təhsil alan tələbələr, gələcək əczaçılar öz biliklərini təcrübə ilə möhkəmləndirə biləcəklər. Müəssisədə istehsal olunan əczaçılıq məhsulları xarici ölkələrə də ixrac ediləcək. Yəni ölkəmizin beynəlxalq əməkdaşlığı, xarici tərəfdaşlarla əlaqələri daha da genişlənəcək. Eyni zamanda, Pirallahı Sənaye Parkında bir sıra yeni müəssisələrin yaradılması nəzərdə tutulur ki, bu da rayonun iqtisadi inkişafına xidmət edəcək.
“Pirallahı rayonu 2012-ci ildə Azərbaycan Prezidentinin imzaladığı Fərmanla yaradılıb. Yəni ayrıca inzibati ərazi vahidi kimi formalaşdırılması baxımından yeni bir rayondur. Əvvəllər isə Xəzər rayonunun inzibati ərazi bölgüsünə daxil olub. Pirallahı Xəzərin sahilində yerləşən, dənizlə torpağın qovuşduğu bir ərazidir. Abşeron arxipelaqının ən böyük adasıdır. Prezident İlham Əliyevin müvafiq göstərişi ilə Pirallahıda yaşayış binaları, yeni mənzillər, məktəblər, uşaq bağçaları, səhiyyə və digər sosial obyektlər inşa edilib, təmir olunub, küçələr, yollar abadlaşdırılıb, parklar və istirahət məkanları salınıb, istehsal müəssisələri fəaliyyətə başlayıb. Seçicilərlə mütəmadi görüşlərimizdə, söhbətlərimizdə də onlar dövlət başçısına rayonun abadlığına, firavanlığa görə öz minnətdarlıqlarını ifadə edirlər. Pirallahı sakinləri, eyni zamanda, Azərbaycanın Birinci vitse-prezidenti Mehriban Əliyevanın millət vəkilliyi dövründəki geniş fəaliyyətini, xeyirxahlığını, insanlara qayğısını məmnuniyyətlə xatırlayırlar”, - deyə deputat əlavə edib.
Onun sözlərinə görə, Prezident İlham Əliyevin Pirallahı Sənaye Parkını ziyarəti həm də dövlətimizin başçısının rayonun qarşıdakı inkişaf mərhələsinə göstərdiyi diqqəti nümayiş etdirir. Bir vaxtlar Pirallahı daha çox “uzaq ada” təsəvvürü yaradırdısa, bu gün Bakının çiçəklənən, yüksələn, yeni investisiyalar cəlb edən rayonlarından birinə çevrilir.
Bölmənin digər xəbərləri
