Siyasi şərhçi: Azərbaycanın müstəqil xarici siyasəti beynəlxalq çəkisini və manevr imkanlarını artırır
Bakı, 6 oktyabr, AZƏRTAC
Yeni Azərbaycan Partiyasının VIII Qurultayında Prezident İlham Əliyevin çıxışında xüsusi vurğulanan istiqamətlərdən biri Azərbaycanın müstəqil xarici siyasət kursu oldu. Dövlətimizin başçısının çıxışında səsləndirdiyi fikirlər təkcə mövcud vəziyyətin qiymətləndirilməsi deyil, Azərbaycanın dəyişən dünya düzənində bundan sonrakı fəaliyyətinin əsas siyasi konturlarını göstərir. Qlobal geosiyasi qarşıdurmaların dərinləşdiyi, güc mərkəzləri arasında rəqabətin sərtləşdiyi bir dövrdə Azərbaycan öz xarici siyasətini milli maraqlar üzərində qurmaq xəttini davam etdirir. Prezident İlham Əliyevin uzun illər ərzində həyata keçirdiyi bu siyasətin əsas xüsusiyyətlərindən biri ondan ibarətdir ki, Azərbaycan beynəlxalq münasibətlərdə öz mövqeyini hansısa siyasi mərkəzlərin maraqlarına uyğunlaşdırmaq deyil, tərəfdaşlıq münasibətlərini öz milli maraqları əsasında müəyyənləşdirmək prinsipindən çıxış edir.
Bu fikirləri AZƏRTAC-a açıqlamasında siyasi şərhçi Ülviyyə Zülfiqar deyib.
Onun sözlərinə görə, Prezident İlham Əliyevin həyata keçirdiyi xarici siyasət modelinin mühüm nəticələrindən biri Azərbaycanın fərqli və bəzən bir-biri ilə qarşıdurmada olan güc mərkəzləri ilə eyni vaxtda işlək münasibətlər qurmaq imkanını qorumasıdır. Azərbaycan Çin, ABŞ, Rusiya, Ukrayna, Avropa İttifaqı və digər tərəflərlə münasibətlərini inkişaf etdirir. Avropa İttifaqının 10 ölkəsi ilə strateji tərəfdaşlıq münasibətlərinin mövcudluğu, Çin və ABŞ ilə əlaqələrin strateji xarakter daşıması bu siyasətin geniş coğrafiyasını nümayiş etdirir. Burada diqqətçəkən əsas məqam bir istiqamətlə yaxınlaşmanın digər istiqamətdən uzaqlaşma hesabına baş verməməsidir. Bu, Prezident İlham Əliyevin xarici siyasət kursunda ardıcıl şəkildə qorunan siyasi manevr imkanının ifadəsidir. Azərbaycan öz seçimlərini milli maraqlarına uyğun şəkildə özü müəyyənləşdirən dövlət mövqeyindən çıxış edir. Dövlət başçısının qurultaydakı çıxışından irəli gələn mühüm məqamlardan biri də müstəqil siyasətlə dövlətin beynəlxalq çəkisi arasındakı birbaşa əlaqədir. Müstəqil siyasət yürüdən, qəbul etdiyi qərarları həyata keçirmək imkanına malik olan dövlətin mövqeyi eşidilir və onunla hesablaşırlar. Azərbaycanın son illərdə regional və beynəlxalq proseslərdə daha fəal görünməsi də bu kontekstdə nəzərdən keçirilə bilər. Prezident İlham Əliyevin xarici siyasət fəaliyyətində Azərbaycan təşəbbüslərlə çıxış edən, yeni əməkdaşlıq imkanlarının yaradılmasına çalışan və müxtəlif siyasi platformalarda öz gündəliyini təqdim edən aktor kimi mövqe tutur.
“Bu siyasətin yaratdığı başqa bir imkan Azərbaycanın fərqli tərəflər arasında dialoq və təmas məkanı rolunun genişlənməsidir. Müasir dünyada qarşıdurma xətlərinin çoxalması, bəzi dövlətlər və siyasi mərkəzlər arasında birbaşa dialoqun çətinləşməsi neytral və etibarlı təmas platformalarına ehtiyacı artırır. Prezident İlham Əliyevin həyata keçirdiyi çoxşaxəli xarici siyasət Azərbaycanın belə imkanlarını genişləndirir. Çünki bir-biri ilə ziddiyyət yaşayan tərəflərlə eyni zamanda normal münasibətlər saxlamaq yalnız siyasi manevr deyil, həm də qarşılıqlı etimad tələb edir. Bu baxımdan Azərbaycanın heç bir qarşıdurma xəttinin bir hissəsinə çevrilmədən müxtəlif tərəflərlə əməkdaşlıq edə bilməsi gələcəkdə dialoq, uzlaşdırma və təmas platforması kimi imkanlarının daha da genişlənməsi üçün zəmin yaradır. Prezident İlham Əliyevin xarici siyasət kursunun mühüm istiqamətlərindən biri Azərbaycanın çoxtərəfli diplomatiyada rolunun genişləndirilməsidir. Qoşulmama Hərəkatında fəaliyyət, İslam Əməkdaşlıq Təşkilatı çərçivəsində təşəbbüslər, Mərkəzi Asiya dövlətləri ilə əlaqələrin yeni səviyyəyə yüksəlməsi və D-8 formatında iştirak Azərbaycanın diplomatik fəaliyyət coğrafiyasının hər gün genişləndiyini göstərir. Azərbaycan bu platformalarda öz siyasi çəkisini konkret təşəbbüslər, yeni əməkdaşlıq istiqamətləri və mövcud mexanizmlərin fəallaşdırılması vasitəsilə göstərməyə çalışır”, – deyə siyasi şərhçi qeyd edib.
U.Zülfiqarın fikrincə, siyasi qərarların kənar təsirlərdən asılı olmaması üçün dövlətin onları həyata keçirməyə imkan verən iqtisadi resurslara malik olması mühüm şərtdir. Bu baxımdan Azərbaycanın enerji potensialının genişləndirilməsi, nəqliyyat-logistika infrastrukturunun illər ərzində ardıcıl şəkildə inkişaf etdirilməsi və ölkənin Şərq-Qərb, Şimal-Cənub istiqamətlərində mühüm bağlantı nöqtəsinə çevrilməsi xarici siyasət imkanlarını da artırır. Sənəddə qeyd edilən enerji və nəqliyyat göstəriciləri də bu iqtisadi imkanların siyasi əhəmiyyətini önə çıxarır. Prezident İlham Əliyevin həyata keçirdiyi siyasətdə iqtisadi, enerji və nəqliyyat strategiyası dövlətin ümumi strateji müstəqilliyini təmin edən bir-biri ilə bağlı istiqamətlər kimi çıxış edir.
Müxbir - Səbinə Əlizadə
Bölmənin digər xəbərləri
