Müəyyən dövlət müəssisələrinin birbaşa özəl kapitala açılması hədəflənir
Bakı, 6 oktyabr, AZƏRTAC
Biz özəl sektorun maliyyələşməsinə diqqət yetirsək də, Azərbaycanda bəzi infrastruktur layihələri hələ də dövlət müəssisələri tərəfindən həyata keçirilir. Bu səbəbdən strategiyamız əsas dövlət müəssisələri ilə işləyərək onların korporativləşməsinə, maliyyə göstəricilərinin, biznes strategiyalarının, ətraf mühit və sosial standartlarının yaxşılaşdırılmasına kömək etməkdir. Onların bəzilərinin gələcəkdə səhmlərini ictimaiyyətə təqdim edə bilməsini (IPO) və birbaşa özəl kapitallara açıla bilməsini hədəfləyirik.
AZƏRTAC xəbər verir ki, bu sözləri Asiya İnkişaf Bankının (AİB) Azərbaycan üzrə direktoru Sunniya Duranı Camal Alman-Azərbaycan Strateji Tərəfdaşlıq və Bağlantılar Konfransı çərçivəsində "Azərbaycanda investisiyaların sürətləndirilməsi" panelində deyib.
O bildirib ki, ölkə tərəfdaşlığı strategiyası əslində hökumətin inkişaf vizyonunu dəstəkləməyə yönəlib: “Müxtəlif investisiyaları təşviq etmək üçün ekosistemdəki müxtəlif tərəfdaşlara kömək etmək məqsədilə müxtəlif mərhələlərdə qoşulmağa çalışırıq. Təxminən on il əvvəl hökumət "Şahdəniz" qaz yatağını işləyirdi. Müxtəlif səbəblərdən yüksək qiymətləndirilən texniki və kommersiya riskləri var idi. Asiya İnkişaf Bankı prosesə qoşuldu və biz bəzi beynəlxalq kommersiya banklarına təxminən 500 milyon dollar məbləğində qismən kredit zəmanəti təklif etdik. Düşünürəm ki, bu addım hökumət tərəfindən yüksək qiymətləndirildi. Çünki beynəlxalq investorların cəlb olunmasına kömək etdi və ümid edirəm ki, gələcəkdə yerli kommersiya bankları da buraya qoşulacaq. İkinci nümunə isə bərpaolunan enerji ilə bağlıdır. Yenə də Avropa Yenidənqurma və İnkişaf Bankı və digər bir neçə tərəfdaşla birlikdə ölkədəki ilk bərpaolunan enerji layihələrindən olan Günəş enerjisi layihələrini maliyyələşdirdik”.
“Ölkədə necə fəaliyyət göstərdiyimizə və investisiyalar baxımından üçüncü nümunə isə ixrac və idxalın təşviq edilməsidir. Ticarət və təchizat zəncirinin maliyyələşdirilməsi proqramımız var, burada kommersiya bankları ilə işləyərək onların daha kiçik ixracatçı və idxalatçıların risklərini üzərlərinə götürmələrinə kömək edirik. Bu, birbaşa investisiya sayılmasa da, böyük potensiala malik bir sahə kimi baxıram. Xüsusilə bu kiçik təşkilatları beynəlxalq banklara və onları tanımayan ixracatçılara tanıtmaq üçün əlaqələrimizdən istifadə edirik. Dördüncü sahə isə hələ iş görmədiyimiz, lakin infrastruktur baxımından çox marağımı çəkən təbii kapital mövzusudur. Almaniya hökuməti ilə birlikdə təbii infrastruktur və biomüxtəliflik fondlarımızdan birinə töhfə veririk. Bu cür alətlər və investisiyalar, eyni zamanda, güzəştli maliyyələşməni və ya təsir investorlarını cəlb edir. Düşünürəm ki, yaşıl istiqrazlar və ya yaşıl maliyyələşdirmə kimi alətlərlə yanaşı, bu mexanizmlərdən daha innovativ infrastruktur üçün istifadə edə biləcəyimiz sahələr var”, - deyə Sunniya Duranı Camal qeyd edib.
Foto - Tofiq Babayev
Bölmənin digər xəbərləri
