İqtisadi güc yeni inkişaf mərhələsinin əsas dayağıdır - ŞƏRH
Bakı, 6 oktyabr, AZƏRTAC
Yeni Azərbaycan Partiyasının (YAP) VIII qurultayı Azərbaycanın yeni siyasi və geosiyasi reallıqlar şəraitində gələcəyə baxışının ifadə olunduğu mühüm platformalardan biri kimi diqqəti cəlb etdi. YAP Sədri, Prezident İlham Əliyevin qurultaydakı proqram xarakterli çıxışında təhlükəsizlik, dövlətçilik və beynəlxalq münasibətlərlə yanaşı, ölkənin iqtisadi inkişaf perspektivlərinə də xüsusi yer ayrıldı. Çıxışın iqtisadi hissəsi göstərdi ki, Azərbaycanın qarşıdakı mərhələdə əsas hədəflərindən biri əldə olunmuş maliyyə və iqtisadi sabitliyi qorumaqla yeni inkişaf mənbələrini daha geniş şəkildə hərəkətə gətirməkdir.
Bu sözləri AZƏRTAC-a açıqlaması zamanı tarix üzrə fəlsəfə doktoru Elbrus İsayev deyib.
Onun sözlərinə görə, Prezidentin çıxışında mühüm məqamlardan biri iqtisadi inkişafla sosial rifah arasındakı əlaqənin xüsusi vurğulanması idi.
“Prezident gələn il minimum əməkhaqqının, pensiyaların və sosial müavinətlərin artırılacağını bildirməklə yanaşı, sosial siyasətin davamlı olması üçün iqtisadi artımın zəruriliyini diqqətə çatdırdı. Bu yanaşma iqtisadi siyasətin yalnız makroiqtisadi göstəricilərdən ibarət olmadığını, son nəticədə onun vətəndaşın gündəlik həyatına və rifahına təsir etməli olduğunu göstərir. Prezident İlham Əliyevin çıxışında ən çox diqqət çəkən istiqamətlərdən biri investisiyalarla bağlı fikirlər oldu. Dövlət başçısı vurğuladı ki, iqtisadiyyatın inkişafında yalnız dövlət investisiyaları kifayət etmir və xarici sərmayələrin cəlb olunması mühüm əhəmiyyət daşıyır. 2025-ci və 2026-cı illərdə keçirilmiş iki Beynəlxalq İnvestisiya Forumunda imzalanan investisiya müqavilələrinin ümumi həcmi 20 milyard dollardan çox olub. Bu rəqəm iqtisadi perspektivlər baxımından yalnız maliyyə göstəricisi kimi deyil, Azərbaycanın investisiya mühiti və ölkəyə yönələn beynəlxalq marağın göstəricisi kimi təqdim edilir. Burada diqqətçəkən digər məqam sərmayələrin yalnız neft-qaz sektoruna deyil, qeyri-neft-qaz sahələrinə də yönəldilməsinin nəzərdə tutulmasıdır. Qarşıdakı dövr üçün iqtisadi gündəliyin əsas suallarından biri investisiyanın həcmi ilə yanaşı, onun hansı sahələrə yönələcəyi olacaq. Çünki uzunmüddətli iqtisadi inkişaf yeni istehsal imkanlarının, texnologiyaların, ixrac məhsullarının və yüksək əlavə dəyər yaradan sahələrin genişləndirilməsindən asılıdır”, - deyə E.İsayev nəzərə çatdırıb.
Bölmənin digər xəbərləri
