Fransada liseylərdə şərait böhranı: şagirdlər daha yaxşısını tələb edir, regionlar isə xərclərdən narahatdır
Paris, 6 oktyabr, AZƏRTAC
Fransada lisey şagirdlərinin etirazlarının əsas tələblərindən biri təhsil şəraitinin yaxşılaşdırılmasıdır. Köhnə binalar, qışda kifayət qədər qızdırılmayan, yayda isə həddindən artıq isti olan sinif otaqları şagirdlərin gündəlik problemləri sırasında yer alır.
AZƏRTAC xəbər verir ki, şagirdlər hər kəs üçün kifayət qədər stul və daha yaxşı vəziyyətdə olan sinif otaqları tələb edirlər. 2026-cı ilin mayında təxminən 200 min peşə liseyi şagirdi güclü istilər zamanı buraxılış imtahanlarını həddindən artıq isti otaqlarda verməli olub. Fransadakı lisey binalarının orta yaşı 70 ildən çoxdur və son 10 ildə onların yalnız 15 faizi yenilənib.
Liseylərin tikintisi, təmiri və saxlanılmasına cavabdeh olan regionlar isə maliyyə imkanlarının məhdud olduğunu bildirirlər. Dövlət dotasiyalarının azalması və artan xərclər fonunda regionların əlavə investisiyalar üçün kifayət qədər vəsait tapmaqda çətinlik çəkdiyi qeyd olunur.
Bundan əlavə, son günlər liseylərdə baş verən dağıntılar da regionların maliyyə yükünü artırıb. İlkin hesablamalara görə, dəymiş ziyanın bərpası Luar regionunda ən azı 3 milyon, İl-dö-Fransda 7 milyon, Ron-Alpda isə 25-30 milyon avroya başa gələ bilər.
Beləliklə, şagirdlərin daha yaxşı təhsil şəraiti tələbi ilə regionların məhdud maliyyə imkanları arasında qarşıdurmanın daha da kəskinləşəcəyi gözlənilir.
Bölmənin digər xəbərləri
