Dünya çempionatı: Azərbaycanın 3 cüdoçusu tatamiyə çıxır
Bakı, 6 oktyabr, AZƏRTAC
Bakıda keçirilən cüdo üzrə böyüklər arasında dünya çempionatında bu gün üçüncü yarış gününün görüşləri baş tutacaq.
AZƏRTAC xəbər verir ki, Milli Gimnastika Arenasında Azərbaycanı qadınların 57 kiloqram , kişilərin isə 73 kiloqram çəki dərəcələrində ümumilikdə 3 cüdoçu təmsil edəcək.
57 kiloqramda Xədicə Qədəşovanın mundialdakı ilk rəqibi Qırğızıstan təmsilçisi Janar Joldoşeva olacaq. Tərəflər təsnifat mərhələsində üz-üzə gələcəklər. 73 kiloqramda Hidayət Heydərov da mübarizəyə təsnifatdan başlayacaq. Onun rəqibi Kosovo təmsilçisi Akil Qyakovadır.
Bu çəkidə Azərbaycanın digər təmsilçisi Rəşid Məmmədəliyev isə ilk görüşünü 1/16 finalda keçirəcək. Cüdoçumuz Adil Osmanov (Moldova) – Castin Lemir (Kanada) qarşılaşmasının qalibi ilə görüşəcək.
Qeyd edək ki, oktyabrın 11-dək davam edəcək dünya çempionatında Azərbaycan 13 çəki dərəcəsində 24 cüdoçu (17 kişi və 7 qadın) ilə təmsil olunur. Hələlik milli komandanın heyətində Əhməd Yusifov (60 kiloqram) qızıl medal qazanıb.
Bölmənin digər xəbərləri
