Almaniyada “yaşıllar”ın ulduzlu saatı
Berlin, 28 may, AZƏRTAC
Almaniyanın “İttifaq-90/Yaşıllar” partiyası Avropa parlamentinə seçkilərdə 20 faizdən çox səs toplayaraq, əvvəlki seçkilərlə müqayisədə öz nəticəsini iki dəfə yaxşılaşdırıb. “Yaşıllar” bu günlərdə qələbəni qeyd edirlər, hərçənd onlar bu seçkilərdə xristian-demokratlardan sonra ikinci yerdədirlər.
Bu həqiqətən sensasiyadır, çünki “Yaşıllar” indiyə qədər heç vaxt seçkilərdə ikinci yeri tutmağa müvəffəq olmayıb. “Yaşıllar” partiyasından əsas namizəd Ska Kellerin sözlərinə görə, onlar bütün Avropaya sübut edə bildilər ki, qlobal istiləşməyə qarşı mübarizə təşəbbüsləri, o cümlədən iqlimin müdafiəsi üzrə “Fridays for Future” gənclər hərəkatının təşkil etdiyi çoxminli aksiyalar müasir dövrün tələblərinə cavab verirlər.
Almaniyada bu günlərdə tez-tez ölkə qanunverici orqanına — bundestaq növbədənkənar seçkilər haqqında söhbətlər gedir. “Yaşıllar” öz müvəffəqiyyətləri fonunda elan ediblər ki, həm XDİ/XSİ ilə, həm də liberallarla və ya ASDP ilə koalisiya haqqında təkliflərə hazırdırlar. Lakin, onlar ifrat sağçı AüA ilə ittifaqı istisna edirlər. Tamamilə mümkündür ki, indi çoxları onlarla koalisiyaya daxil olmaq istəyəcəklər.
Vüqar Seyidov
AZƏRTAC-ın xüsusi müxbiri
Berlin
Bölmənin digər xəbərləri
