Bakı, 18 mart, AZƏRTAC

Respublikamızın hər yerində olduğu kimi, AMEA-nın Gəncə Bölməsində də Elm günü geniş şəkildə qeyd edilib.

AZƏRTAC-ın bölgə müxbiri xəbər verir ki, Elm günü münasibətilə AMEA-nın Gəncə Bölməsində elmi-praktik konfrans təşkil edilib. Konfransda son illərdə qərb bölgəsində əldə edilmiş elmi nəticələrin hesabatı dinlənilib, elmi nailiyyətlərin sərgisi açılıb.

Konfrans öz işinə Gəncə Bölməsində təşkil olunan “27 mart – Elm günü” sərgisinə baxış və “Gəncəli akademiklərin portret-qalereyası”nın açılışı ilə başlayıb. Sərgidə son illərdə şəhərdə əldə olunan elmi nailiyyətlər, nəşr olunan kitab və monoqrafiyalar, müxtəlif jurnallarda dərc edilən məqalələr öz əksini tapır.

Elmi-praktik konfransı açan Gəncə Bölməsinin sədri, akademik Fuad Əliyev dövlət başçısı tərəfindən Elm gününün təsis edilməsinin əhəmiyyəti, şəhərin bugünkü elmi potensialı və qarşıda duran vəzifələrdən danışıb, Gəncə elminin inkişaf tarixi haqqında məlumat verib.

Konfransda Diyarşünaslıq İnstitutunun şöbə müdiri, professor Həsənbala Sadıqovun “Şərqin ən qədim elm mərkəzlərindən biri – Gəncə”, Nizami Gəncəvi Mərkəzinin direktoru, professor Xəlil Yusiflinin “İki Qivami: Qivami Mütərrizi Gəncəvi və Qivami Razi Xəbbas”, AMEA Nizami Gəncəvi adına Ədəbiyyat İnstitutunun böyük elmi işçisi Təhminə Bədəlova “Nizami Gəncəvi ədəbi irsinin tədqiqi və təbliğinə gəncəli alimlərin töhfələri”, Gəncə Bölməsinin Gənc alimlər və mütəxəssislər Şurasının sədri Elnur Həsənovun “Gəncədə elm və təhsilin inteqrasiyasında gənc alimlərin fəaliyyəti”, Elmi katib Mətanət Əliyevanın “Görkəmli elm adamlarının adlarının əbədiləşdirilməsi”, Nizami Gəncəvi Mərkəzinin böyük elmi işçisi, filologiya üzrə fəlsəfə doktoru Əlimuxtar Muxtarovun “Qədim Gəncənin klassikləri”, laboratoriya müdiri, kimya üzrə fəlsəfə doktoru İmran Qasımovun “Gəncədə fəaliyyət göstərən universitetlər və elmi-tədqiqat institutları” mövzularında məruzələri dinlənilib.

Məruzələrdə və müzakirələrdə qeyd olunub ki, ümummilli lider Heydər Əliyevin diqqət və qayğısı ilə “Gəncə elm Mərkəzi” kimi fəaliyyətə başlayan və ötən 40 ildən artıq bir müddətdə elmin inkişafına sanballı töhfələr verən AMEA Gəncə Bölməsi qərb regionunda elmin koordinasiyasının təşkilinə, elmi kadrların hazırlanmasına, bölgənin iqtisadi inkişafına cavab verən texnologiyaların istehsalata tətbiq edilməsinə və regionun zəngin milli-mənəvi dəyərlərinin, tarixi irsinin və görkəmli mütəfəkkirlərin, klassiklərin həyat və yaradıcılığının öyrənilməsinə sanballı töhfələr verib.

Qeyd olunub ki, qədim elm və mədəniyyət mərkəzi olan Gəncə şəhərində bu gün Azərbaycan Milli Elmlər Akademiyasının Gəncə Bölməsi, üç universitet, dörd elmi-tədqiqat institutu fəaliyyət göstərir. Burada 1 nəfər akademik, 2 nəfər AMEA-nın müxbir üzvü, 50-dən artıq elmlər doktoru, 560-dan çox fəlsəfə doktoru çalışır.

Gəncə Şəhər İcra Hakimiyyəti başçısının müavini Adil Tağıyev çıxış edərək Elm günü münasibətilə iştirakçıları təbrik edib. O, elmi-tədqiqat və elmi-təşkilati işlərdə əldə olunmuş uğurları diqqətə çatdıraraq, gəncəli alimlərin şəhərin elmi, sosial-iqtisadi və sosial-mədəni həyatında fəal iştiraklarını xüsusi vurğulayıb.

Tədbirdə son illər elmi fəaliyyəti ilə fərqlənən alimlərə, “İlin ən yaxşı qadın alimi” və İlin ən yaxşı gənc tədqiqatçısı” müsabiqəsinin qaliblərinə fəxri fərmanlar təqdim edilib.

Konfrans iştirakçıları adından AMEA-nın prezidenti vəzifəsini icra edən akademik Arif Həşimova müraciət qəbul olunub.

Sonda Gəncə şəhərində dəfn edilən akademiklər Çingiz Cuvarlıının, Məmmədtağı Cəfərovun və başqa elm adamlarının məzarları ziyarət edilib, ruhlarına dualar oxunub.