Arxeoloji qazıntılar zamanı tapılan nümunələr Qəbələ Dövlət Tarix-Bədii Qoruğuna təhvil verilib VİDEO
Qəbələ, 29 oktyabr, Mustafa Dadaşov, AZƏRTAC
AMEA Arxeologiya, Etnoqrafiya və Antropologiya İnstitutunun Qəbələ arxeoloji ekspedisiyasının tarix elmləri doktoru, professor Qafar Cəbiyevin rəhbərliyi ilə Qəbələ Dövlət Tarix-Bədii Qoruğunun “Qala” ərazisində apardığı arxeoloji qazıntı işləri başa çatıb. Bir ay davam edən tədqiqatların məqsədi əvvəlki illərdə tədqiqinə başlanmış IX qazıntı sahəsində şəhərin daha erkən dövrlərinə aid alt yaşayış qatlarını öyrənmək olub.
Arxeoloji qazıntı işlərinin nəticələri barədə AZƏRTAC-ın bölgə müxbirinə açıqlama verən Qəbələ Dövlət Tarix-Bədii Qoruğunun direktoru Zahir Kərimov bildirib ki, tədqiqatlar zamanı şəhərin VII-XIV əsrlərə aid yaşayış qatı öyrənilib. Tədqiqi davam etdirilən 150 kvadratmetrə yaxın ərazinin ayrı-ayrı nöqtələrində mədəni təbəqə, yəni yaşayış qatı 3-3,5 metr dərinliyədək öyrənilib. Tədqiqatların terrasvarı planda davam etdirilməsi VII-XIV əsrlərdə Qəbələdə şəhər həyatının ən müxtəlif sahələrinin inkişaf və ya tənəzzül dinamikasını əyani şəkildə öyrənmək baxımından çox əhəmiyyətli olub.
“Qəbələ Azərbaycanın qədim və orta əsr şəhərləri içərisində davamlı olaraq arxeoloji cəhətdən ən yaxşı öyrənilən şəhərlərimizdəndir. Lakin bu, heç də o demək deyil ki, artıq Qəbələnin tarixi ilə bağlı hər şey öyrənilib. Əksinə, öyrənildikcə şəhərin tarixi keçmişi ilə bağlı yeni-yeni suallar ortaya çıxır. Özü də nəzərə almaq lazımdır ki, Qəbələnin tarixi həm də qədim Azərbaycan dövləti olan Albaniyanın tarixidir. Biz Qəbələnin tarixini dərindən və hərtərəfli araşdırmaqla, həm də Albaniya tarixini daha ətraflı və mükəmməl öyrənmiş oluruq”, - deyə Qoruğun direktoru vurğulayıb.
Tədqiqatların yekunu olaraq Qəbələ Arxeoloji Mərkəzin sərgi salonunda Qəbələ (Qala dəstəsi) arxeoloji ekspedisiyasının üzvləri və Qəbələ Dövlət Tarix-Bədii Qoruğu əməkdaşlarının iştirakı ilə toplantı keçirilib.
Arxeoloji ekspedisiyanın rəhbəri Qafar Cəbiyev toplantıda vurğulayıb ki, tədqiqatların gedişində orta əsr şəhər infrastrukturu üçün səciyyəvi olan çoxsaylı tikinti və memarlıq elementləri, yaşayış binaları, küçə və meydanların qalıqları aşkarlanaraq öyrənilib. Axtarışlar nəticəsində şəhərin təsərrüfat həyatı və əhalinin məişətindən xəbər verən çoxsaylı dəyərli artefaktlar üzə çıxıb. Aşkarlanan tapıntıların böyük əksəriyyəti isə Qəbələ sənətkarlarının istehsal etmiş olduqları dəmir, şüşə və keramika məmulatı nümunələridir. Bu qəlibdən olan tapıntılar həm də Qəbələ ustalarının sənətkarlıq səviyyəsindən xəbər verir. Əldə olunan bir sıra tapıntılar isə qədim paytaxt şəhərin təkcə Azərbaycan şəhərləri ilə deyil, həm də Avropa və Asiyanın bir sıra sənət və mədəniyyət mərkəzləri ilə intensiv təmaslarından xəbər verir. Yeni nəticələr Qəbələ tarixinin, bütövlükdə Albaniya tarixinin gələcəkdə daha dərindən və hərtərəfli öyrənilməsi baxımından çox mühüm elmi əhəmiyyət kəsb edir.
Qəbələ Dövlət Tarix-Bədii Qoruğunun direktoru Zahir Kərimov çıxış edərək, ekspedisiyanın işini yüksək qiymətləndirib, aşkar edilən arxeoloji nümunələrin qorunub-saxlanması və yeni nəsillərə ötürülməsinin mühüm əhəmiyyət kəsb etdiyini vurğulayıb.
Ekspedisiyanın üzvləri Elmira Abbasova və Əlibaba Babayev çıxış edərək, qısa zaman ərzində apardıqları arxeoloji qazıntılar zamanı əldə olunan maddi mədəniyyət nümunələri və ekspedisiyanın gördüyü işlər barədə ətraflı məlumat veriblər.
Sonda arxeoloji qazıntılar zamanı yeni əldə olunan maddi-mədəniyyət nümunələri ekspedisiya üzvləri tərəfindən Qəbələ Dövlət Tarix-Bədii Qoruğuna təhvil verilib.
Bölmənin digər xəbərləri
