Oğuzda elmi konfrans: Şimal-Qərbi Azərbaycanın tarixi memarlıq irsi öyrənilir
Bakı, 3 iyun, AZƏRTAC
AMEA-nın Şəki Regional Elmi Mərkəzinin və Oğuz Rayon İcra Hakimiyyətinin birgə təşkilatçılığı ilə "Şəhərsalma və Memarlıq İli" çərçivəsində Oğuz Rayon Dövlət Aqrar İnkişaf Mərkəzində "Erkən orta əsrlərdə Şimal-Qərbi Azərbaycanda şəhərsalma və memarlığın inkişafı” mövzusunda elmi-praktik konfrans keçirilib.
Bu barədə AZƏRTAC-a AMEA-dan məlumat verilib.
Oğuz Rayon İcra Hakimiyyəti başçısının müavini, Ərazi-təşkilat və ictimai-siyasi məsələlər şöbəsinin müdiri Aliyǝ Osmanova tədbirdə bildirib ki, ölkədə tarix, mədəni irs, şəhərsalma və memarlıq ənənələrinin öyrənilməsi və təbliği istiqamətində həyata keçirilən tədbirlər milli-mənəvi dəyərlərin qorunmasına və gələcək nəsillərə çatdırılmasına mühüm töhfə verir. O qeyd edib ki, Azərbaycan Respublikası Prezidentinin müvafiq Sərəncamına əsasən 2026-cı ilin “Şəhərsalma və Memarlıq İli” elan olunması bu sahəyə diqqətin daha da artırılmasına, elmi tədqiqatların genişləndirilməsinə və şəhərsalma irsinin sistemli şəkildə öyrənilməsinə əlavə stimul yaradıb.
Sonra AMEA-nın Şəki Regional Elmi Mərkəzinin direktoru vəzifəsini icra edən dosent Kamil Adışirinov çıxış edərək bildirib ki, erkən orta əsrlərdə Şimal-Qərbi Azərbaycanın şəhərsalma və memarlıq irsinin tədqiqi regionun tarixi-mədəni inkişaf mərhələlərinin öyrənilməsi baxımından mühüm əhəmiyyət kəsb edir. Kamil Adışirinov bu cür elmi-praktik konfransların tarix, arxeologiya və memarlıq sahələrində aparılan araşdırmaların nəticələrinin elmi ictimaiyyətə çatdırılmasına, eləcə də yeni tədqiqat istiqamətlərinin müəyyənləşdirilməsinə geniş imkan yaratdığını vurğulayıb.
Konfrans məruzələr ətrafında öz işini davam etdirib.
Bölmənin digər xəbərləri
