Avstriya tarixində ilk dəfə qadın Federal Kansler vəzifəsinə təyin olunub
Vyana, 30 may, AZƏRTAC
Avstriya Konstitusiya Məhkəməsinin prezidenti Briqitte Birlayn müvəqqəti hökumətin Kansleri vəzifəsinə təyin edilib.
AZƏRTAC xəbər verir ki, bu barədə məlumatı Federal Prezident Aleksander Van der Bellen mətbuat konfransında təsdiqləyib. Dövlət başçısı Avstriya tarixində ilk qadın olaraq bu vəzifəni icra edəcək B.Birlayna, həmçinin müvəqqəti hökuməti təşkil etməyi də həvalə edib.
B.Birlayn ona göstərilən etimada görə təşəkkür edərək, ən qısa zamanda müvəqqəti hökumətin təşkilinə başlayacağını bildirib. O deyib ki, bir sıra nazirliklərə rəhbərlik edəcək şəxsləri artıq müəyyənləşdirib, lakin bu namizədləri konsensus əsasında parlament partiyaları ilə müzakirələr nəticəsində təyin etmək niyyətindədir.
1949-cu ildə Vyanada anadan olan Briqitte Birlayn 1975-ci ildən rayon məhkəməsi hakimi, prokuror, Vyana Baş Prokurorluğunda məsul vəzifələr tutub və daha sonra Ədliyyə Nazirliyində Cinayət Hüququ seksiyasında yüksək vəzifədə çalışıb. 2003-cü ildə Avstriya Konstitusiya Məhkəməsində birinci vitse-prezident və 2018-ci ildə isə Prezident vəzifəsinə təyin olunub.
Qeyd edək ki, B.Birlaynın rəhbərlik edəcəyi müvəqqəti hökumət payızda keçiriləcək növbədənkənar parlament seçkilərinə və yeni hökumət formalaşana kimi hakimiyyətdə olacaq.
Elgün Niftəli
AZƏRTAC-ın xüsusi müxbiri
Vyana
Bölmənin digər xəbərləri
