ELM VƏ TƏHSİL
Azərbaycan alimi Türkiyədə keçirilən beynəlxalq simpoziumda iştirak etmişdir
Bakı, 22 may (AZƏRTAC). İstanbulda “I Türk-İran dil və ədəbiyyat əlaqələri” mövzusunda beynəlxalq simpozium keçirilmişdir.
Azərbaycan Milli Elmlər Akademiyasından (AMEA) AZƏRTAC-a bildirmişlər ki, Tehran və İstanbul universitetlərinin birgə təşkil etdikləri tədbirdə dünyanın müxtəlif ölkələrindən gəlmiş 75 alimin məruzəsi dinlənilmiş, əsasən orta əsrlərdə Anadolu və İran məkanında dil və ədəbiyyat məsələlərinin aktual problemləri müzakirə olunmuşdur.
Tədbirdə iştirak edən AMEA Naxçıvan Bölməsinin İncəsənət, Dil və Ədəbiyyat İnstitutunun direktoru, AMEA-nın müxbir üzvü Əbülfəz Quliyev simpoziumun bölmə iclasına sədrlik etmişdir.
Ə.Quliyev “Mövlana Cəlaləddin Ruminin “Məsnəvi” poemasının Azərbaycanda öyrənilməsi və nəşri məsələləri” mövzusunda məruzə etmişdir. O, müstəqillik dövründə Azərbaycanda dünya ədəbiyyatından tərcümə işinə geniş qayğı göstərilməsindən, o cümlədən Mövlana irsi, onun tədqiqi və nəşrindən bəhs etmişdir.