İQTİSADİYYAT
Azərbaycan aviasiyasının xarici əlaqələri və uçuşların coğrafiyası genişlənmişdir
Bakı, 14 sentyabr (AZƏRTAC). Azərbaycan Respublikası Dövlət Mülki Aviasiya Administrasiyasında (DMAA) iclas keçirilmişdir.
AZƏRTAC xəbər verir ki, DMAA-nın direktoru Fuad Quliyev son 10 ildə Azərbaycanda bütün sahələrdə, o cümlədən mülki aviasiyada müşahidə edilən sürətli inkişaf barədə danışmışdır. Ümummilli lider Heydər Əliyev tərəfindən təməli qoyulmuş hava nəqliyyatının əsaslı şəkildə yenidən qurulması prosesinin Azərbaycan Respublikasının Prezidenti İlham Əliyev tərəfindən müvəffəqiyyətlə davam etdirildiyi vurğulanmışdır.
Bildirilmişdir ki, Naxçıvan, Gəncə, Zaqatala, Lənkəran, Qəbələ beynəlxalq hava limanları fəaliyyətə başlamış, cari il sentyabrın 10-da isə Yevlax hava limanının açılış mərasimi keçirilmişdir. Hava nəqliyyatının infrastrukturu müasir tələblər səviyyəsinə çatdırılmışdır, “Boeing”, “Airbus”, “Embraer” tipli yeni hava gəmiləri və helikopterlər alınmış, xarici əlaqələr və uçuşların coğrafiyası genişlənmişdir.
Fuad Quliyev qeyd etmişdir ki, mülki aviasiya sahəsində nəzarəti, dövlət siyasətini və tənzimləməsini həyata keçirmək məqsədi ilə 2006-cı ilin dekabrında Dövlət Mülki Aviasiya Administrasiyası, habelə mülki aviasiyanın inkişaf etdirilməsi və təkmilləşdirilməsi üçün 2008-ci ilin aprelində “Azərbaycan Hava Yolları” Qapalı Səhmdar Cəmiyyəti yaradılmışdır. 2011-ci il martın 17-də Azərbaycan Respublikası Prezidentinin iştirakı ilə Heydər Əliyev Beynəlxalq Aeroportunda yeni aerovağzal kompleksinin təməlqoyma mərasimi keçirilmişdir. Müasir standartlara uyğun olan bu kompleksin tikintisi hazırda sürətlə və uğurla davam etdirilir.
Mülki aviasiya sahəsini ixtisaslı kadrlarla təmin edən Milli Aviasiya Akademiyası Beynəlxalq Mülki Aviasiya Təşkilatının (ICAO) mülki aviasiya sahəsində mütəxəssislər hazırlayan ali təhsil müəssisələrinin reyestrinə daxil edilmiş, həmçinin Beynəlxalq Hava Nəqliyyatı Assosiasiyasının (IATA) təlim mərkəzləri şəbəkəsinə qəbul olunmuşdur.
Bildirilmişdir ki, 2012-ci il aprelin 20-də Azərbaycan Respublikası Prezidentinin iştirakı ilə Heydər Əliyev Beynəlxalq Aeroportunda uzunluğu 4 min, eni isə 75 metrə çatan yeni uçuş-enmə zolağı istifadəyə verilmişdir.