SİYASƏT
Azərbaycan-Avropa İttifaqı əməkdaşlığı müzakirə olunmuşdur
Bakı, 11 fevral (AZƏRTAC). Azərbaycanın xarici işlər nazirinin müavini Xələf Xələfov Avropa İttifaqının (Aİ) Mərkəzi Asiya üzrə xüsusi nümayəndəsi xanım Patrisia Florun başçılıq etdiyi nümayəndə heyəti ilə görüşmüşdür.
Xarici İşlər Nazirliyinin mətbuat xidmətindən AZƏRTAC-a bildirmişlər ki, görüşdə Azərbaycan-Aİ əməkdaşlığı, enerji və nəqliyyat layihələri, regional təhlükəsizlik, Ermənistan-Azərbaycan, Dağlıq Qarabağ münaqişəsinin nizamlanması, Xəzər regionu ilə əlaqədar məsələlər müzakirə olunmuşdur.
P.Flor ölkəmizə növbəti səfərindən və Azərbaycan ilə Aİ arasında çoxsahəli əməkdaşlığın mövcudluğundan məmnunluğunu bildirmişdir. Aİ-nin Azərbaycan ilə əməkdaşlığını daha da genişləndirmək niyyətində olduğunu qeyd edən P.Flor ölkəmizin qurumun Mərkəzi Asiya ilə əlaqələrinin inkişafı baxımından mühüm rolunu diqqətə çatdırmışdır. Vurğulanmışdır ki, Azərbaycan Avropanın enerji təchizatında vacib rol oynayır. Azərbaycan ilə Aİ arasında yaradılmış strateji enerji tərəfdaşlığı böyük əhəmiyyətə malikdir.
Azərbaycan ilə Aİ arasında müxtəlif sahələrdə yüksək səviyyəli əməkdaşlığın olduğunu məmnunluqla qeyd edən X.Xələfov bu münasibətlərin dinamik inkişafından danışmışdır. Xüsusilə enerji və nəqliyyat sahələrində Azərbaycanın Aİ-nin uzunmüddətli və etibarlı tərəfdaşı olduğunu deyən X.Xələfov bu sahədə dialoqun genişləndirilməsinin əhəmiyyətini vurğulamışdır. Əminliklə bildirilmişdir ki, Trans-Anadolu qaz kəməri, “Cənub” enerji dəhlizi, “Transxəzər” qaz kəməri kimi layihələrin reallaşması ilə Azərbaycanın istər enerji istehsalçısı, istərsə də tranzit ölkə kimi Avropanın enerji sistemində rolu artacaqdır. Azərbaycan Mərkəzi Asiya regionunun Aİ ilə münasibətlərinin daha da genişləndirilməsində maraqlıdır. TRASECA layihəsinin bu regionun Avropa ilə əlaqələrinin inkişafında xüsusi əhəmiyyəti vardır.
Azərbaycanın regional təhlükəsizliyin təmin olunmasındakı rolundan danışan nazir müavini ölkəmizin Mərkəzi Asiya ilə əməkdaşlığın genişləndirilməsində, həmçinin Əfqanıstanda sülhün və sabitliyin təmin edilməsində maraqlı olduğunu bildirmişdir. Azərbaycanın Əfqanıstan üzrə “İstanbul prosesi”nin fəal iştirakçısı olduğunu bildirən X.Xələfov bu ölkədə kadr potensialının gücləndirilməsi, infrastruktur və sosial sahələrdə layihələrin həyata keçirildiyini və bu istiqamətdə fəaliyyətin genişləndiriləcəyini vurğulamışdır. Azərbaycan Əfqanıstandan çıxarılan hərbi birliklərin daşınması üçün tranzit ölkə kimi vacib rola malikdir.
Görüşdə Ermənistan-Azərbaycan, Dağlıq Qarabağ münaqişəsinə toxunan X.Xələfov diqqətə çatdırmışdır ki, Ermənistanın danışıqlar prosesində nümayiş etdirdiyi qeyri-konstruktiv mövqe regionun təhlükəsizliyinə təhdiddir. Bildirilmişdir ki, Ermənistan rəhbərliyinin Xocalı hava limanına uçuşların həyata keçiriləcəyi ilə bağlı təxribat xarakterli bəyanatları və Suriyadan gələn ermənilərin Azərbaycanın işğal olunmuş ərazilərində məskunlaşdırması kimi addımları münaqişənin həllinə, regionda sülhün və sabitliyin bərqərar olmasına ciddi maneədir. Ermənistan tərəfindən işğal altında saxlanılan Azərbaycan ərazilərində nəzarətsizlikdən istifadə edilərək narkotik maddələrin dövriyyəsinə və terrorizm kimi qlobal sabitliyə təhdid təşkil edən fəaliyyətlərin həyata keçirilməsinə diqqəti cəlb edən nazir müavini beynəlxalq ictimaiyyət və Aİ tərəfindən Ermənistana təzyiqlərin artırılmasının vacibliyini vurğulamışdır.