AZƏRBAYCAN ELEKTRİK ENERJİSİ İXRAC EDƏN ÖLKƏYƏ ÇEVRİLƏCƏKDİR
Prezident İlham Əliyev Nazirlər Kabinetinin 2008-ci ilin birinci rübünün sosial-iqtisadi inkişafının yekunlarına həsr olunmuş iclasında vurğulamışdır ki, bütün bölgə ölkələrində bu qışın çox sərt keçməsi energetika sahəsinə mənfi təsir göstərmişdir. Biz bilirik ki, bəzi hallarda ölkələr başqa ölkələr qarşısında öz müqavilə öhdəliklərini icra edə bilməmişlər. Bizdən daha çox həcmdə qaz hasil və ixrac edən ölkələr qaz ixracatını dayandırmışdır. Çünki daxili tələbat artmışdır. Ancaq biz nəinki bunu etməmişik, eyni zamanda, daxili tələbatımızı da ödəmişik, xarici öhdəliklərimizi də icra etmişik. Bu, qısa müddət ərzində infrastruktur layihələrinə çox böyük vəsait qoymağımızın hesabına mümkün olubdur.
Azərbaycanda energetika sahəsində vəziyyət böyük dərəcədə sağlamlaşdırılıbdır və növbəti layihələr icra olunandan sonra Azərbaycan elektrik enerjisi ixrac edən ölkəyə çevriləcəkdir - deyən dövlət başçısı yeraltı qaz anbarının genişlənməsinin əhəmiyyətini, ölkədə qaz hasilatının artdığını söyləmişdir.
Prezident İlham Əliyev 2008-ci ilin büdcəsinə ediləcək əlavələrin sosial məsələlərin həlli ilə bərabər, infrastruktur layihələrinə də yönəldiləcəyini vurğulamışdır.
Bölmənin digər xəbərləri
