İDMAN
Azərbaycan idmançıları Fransada keçirilən karate üzrə dünya çempionatında uğurla çıxış etmişlər
Paris, 25 noyabr (AZƏRTAC). Fransanın paytaxtı Parisin “Bersi“ stadionunda karate üzrə 21-ci dünya çempionatı keçirilmişdir.
Noyabrın 21-dən 25-dək davam edən yarışlarda 113 ölkədən mindən artıq idmançının oyununu 3 azərbaycanlı da daxil olmaqla 200 hakim idarə etmişdir.
Azərbaycan Karate Federasiyasının prezidenti, respublikanın Əməkdar Məşqçisi və Əməkdar İdman Ustası Yaşar Bəşirov idmançılarımızın çempionatda iştirakı barədə AZƏRTAC-a müsahibəsində demişdir: “İki il bundan əvvəl Belqradda keçirilən karate üzrə 20-ci dünya çempionatında komandamız bir gümüş və bir bürünc medal qazanmışdı. Ötən iki il ərzində idmançılarımızın peşəkarlığı xeyli artmışdır. Bunu bu il Fransadakı yarışlarda idmançılarımızın uğurlu çıxışı sübut etmişdir. Komandamızın iki gümüş və bir bürünc medal qazanmasını, ümumi komanda hesabında 113 ölkə arasında 8-ci yeri tutmasını çox sevindirici göstərici hesab etmək olar.
Karate idmanı üzrə yaxşı tanınan, dəfələrlə Avropa və dünya çempionatlarında müvəffəqiyyətlə çıxış edən idmançımız Rafael Ağayev qızıl medala yaxın namizəd idi. R.Ağayev finalda italiyalı rəqibi ilə görüşmüşdür. Hər iki idmançı xal qazanmasa da, hakimlər qələbəni yarışda daha fəal olan italiyalı idmançıya verdilər. Rafael Ağayev isə çempionatın gümüş medalına sahib oldu.
2010-cu ildə keçirilən dünya çempionatında bürünc medal qazanan Şahin Atamov bu dəfə nəticələrini yaxşılaşdırmışdır. 84 kiloqramdan artıq çəki dərəcəsində çıxış edən Şahin Atamov final yarışlarında türkiyəli rəqibinə məğlub olaraq komandamıza ikinci gümüş medal qazandıra bilmişdir.
Gənclər arasında keçirilən yarışlarda Avropa və dünya çempionu olan idmançımız Ayxan Mamayev bu il ilk dəfə yaşlılar arasında gücünü sınamışdır. Ayxan Mamayev ona göstərilən etimadı doğrultmuşdur. Yarımfinalda Hollandiyadan olan rəqibini məğlub edən Ayxan Mamayev öz çəki dərəcəsində çempionatın bürünc medalını qazanmışdır.
Karateçilərimiz komanda görüşündə çox uğurla çıxış etmişlər. Onlar yarışların ilk günündə çox güclü rəqibləri olan Yaponiya komandasını məğlub etmişlər. Yeni Zelandiya və İspaniya komandalarına da qalib gələn komandamız Almaniya idmançıları ilə görüşmüşdür. Hər iki kollektiv bərabər səviyyədə çıxış etsə də, hakimlər qələbəni Almaniya komandasına vermişlər.
Bir faktı diqqətə çatdırım ki, bu çempionatda bürünc medal qazanan Qazaxıstan komandası istisna olmaqla MDB məkanındakı ölkələrin heç biri nəinki medal qazana bilmədilər, hətta dörddə bir finala belə vəsiqə qazanmadılar.
Mən inanıram ki, iki gümüş və bir bürünc medal qazanaraq Vətənə böyük uğurla qayıdan komandamız qarşıdakı yarışlarda daha yaxşı çıxış etməyə, ölkəmizin idman şərəfini daha ləyaqətlə qorumağa səy göstərəcəkdir.
Sonda komandamızın dünya çempionatında iştirakına yardım göstərən Azərbaycan Beynəlxalq Bankının rəhbərliyinə minnətdarlığımı bildirirəm”.
Əsgər Əliyev
AZƏRTAC-ın xüsusi müxbiri
Paris