SİYASƏT
AZƏRBAYCAN PREZİDENTİNİN İCRA APARATININ RƏHBƏRİ RAMİZ MEHDİYEVİN AZƏRTAC-IN VƏ TURAN İNFORMASİYA AGENTLİYİNİN MÜXBİRLƏRİ İLƏ MÜSAHİBƏSİ
SUAL: Ramiz müəllim, Azərbaycan Prezidenti Heydər Əliyevin Klivlenddə cərrahiyyə əməliyyatı keçirməsi, onun sağlamlığının vəziyyəti və bütün bunların respublikada daxili vəziyyətə təsiri ilə bağlı son günlər bəzi mətbuat orqanlarında müxtəlif yazılar gedir. Xahiş edirik, bu məsələlərə aydınlıq gətirəsiniz.
CAVAB: Əvvəla, onu bildirim ki, respublika daxilində vəziyyət tam sabitdir. Üç-dörd qəzeti çıxmaq şərtilə, mətbuat orqanları da bu məsələyə tam normal yanaşır və prosesləri obyektiv işıqlandırırlar. Bütün dövlət strukturları ahəngdar işləyir. Ölkəmizin başçısı səfərə getdiyi andan hər gün respublikanın bütün rəhbərləri ilə - Milli Məclisin sədri Murtuz Ələsgərovla, Baş nazir Artur Rasizadə ilə, mənimlə, güc strukturlarının rəhbərləri ilə və digər rəsmi şəxslərlə mütəmadi əlaqə saxlayır, gündəlik iş haqqında ona məruzə olunur və məsləhətləşmələr aparılır. Odur ki, ölkədəki vəziyyət və Prezidentin bu vəziyyət haqqında məlumatlandırılması, onun rəhbər göstərişlərinin alınması və həyata keçirilməsi sahəsində heç bir problem yoxdur.
O ki qaldı Prezidentin səhhəti ilə bağlı məsələyə, onun Nyu-Yorkdan Klivlendə getməsi, orada tam müayinədən keçməsi, həkimlərin məsləhəti ilə aparılmış cərrahiyyə əməliyyatı haqqında dolğun məlumat verilmişdir. Prezidentin səhhəti elə ağır deyil ki, hər gün bu haqda rəsmi açıqlamalar verilsin. Prezidentin cərrahiyyə əməliyatından sonrakı vəziyyəti haqqında onu deyə bilərəm ki, elə fevralın 14-də, yəni cərrahiyyə əməliyyatı aparılan günün axşamı işlərimiz haqqında mənim Prezidentlə geniş söhbətim olubdur.
Belə olduğu halda, bəzi mətbuat orqanlarını qane etməyən nədir? Əslində, hər şey gün kimi aydındır, bu qəzetlər müxtəlif şayiələr, yalan və uydurmalar yaymaqla respublikada vəziyyəti qarışdırmaq, əhalini çaş-baş salmaq istəyirlər. Belə təsəvvür yaranır ki, bu adamlar uydurma, böhtan yarışına çıxıblar. Bax, özlərini belə mənəviyyatsız işlərə həsr edirlər.
Ölkəmizin başçısı ilə sonuncu dəfə mən dünən, yəni fevralın 15-də axşam danışmışam. Cərrahiyyə əməliyyatındən sonra onun vəziyyəti tam qənaətbəxşdir, bərpa dövrü müvəffəqiyyətlə keçir. Bu gün yenə də telefon danışığımız olacaqdır. Odur ki, Prezidentin səhhəti ətrafında şou düzəltmək cəhdləri əbəsdir.
SUAL: Ramiz müəllim, ölkəmizin başçısının respublikaya qayıdışı barədə nə deyə bilərsiniz?
CAVAB: Bilirsiniz, əgər mən bu gün konkret bir tarix söyləsəm, sabah yenə bundan da istifadə etməyə çalışacaqlar ki, bəs, deyilən informasiya doğru çıxmadı. Hər halda, cərrahiyyə əməliyyatından sonra bərpa üçün müəyyən vaxt lazımdır. Bu, bir həftə də, on gün də ola bilər. Bunu biz yox, həkimlər müəyyən edirlər. Biz yalnız arzu edə bilərik ki, bu proses qısa və müvəffəqiyyətli olsun. Prezidentə bərpa üçün Klivlenddə neçə gün qalmaq tələb olunursa, o qədər də qalacaqdır. O ki qaldı Prezidentin ölkədə olmamasının daxili vəziyyətə təsirinə, bu barədə narahat olmağa heç bir əsas yoxdur. O, hər gün, respublikada olduğu kimi, ölkəni idarə edir.
Müsahibəyə görə sağ olun.