AZƏRBAYCAN RESPUBLİKASI PREZİDENTİ HEYDƏR ƏLİYEV BMT-NİN BAŞ KATİBİ BUTROS QALİ İLƏ GÖRÜŞMÜŞDÜR
Görüş zamanı Zaqafqaziya regionundakı ictima-siyasi vəziyyət, o cümlədən Ermənistan-Azərbaycan münaqişəsi ətraflı müzakirə edilmişdir. Azərbaycan tərəfi BMT Təhlükəsizlik Şurasının Dağlıq Qarabağa dair dörd məlum qətnaməsinin yerinə yetirilməməsindən narahatlığını bildirmiş, bu nüfuzlu beynəlxalq təşkilatı həmin istiqamətdə təsirli tədbirlər görməyə çağırmışdır. BMT baş katibi münaqişənin aradan qaldırılması üçün beynəlxalq təşkilatların fəaliyyətinin gücləndirilməsinin zəruri olduğunu təsdiqləmiş və bildirmişdir ki, Dağlıq Qarabağla bağlı sülh prosesinə yeni təkan vermək üçün BMT yaxın günlərdə təşəbbüskarlığını daha da artıracaqdır.
Hər iki tərəf təsdiq etmişdir ki, yalnız beynəlxalq təşkilatların himayəsi altında regionda möhkəm və ədalətli sülhə nail olmaq mümkündür.
Görüş səmimi və qarşılıqlı anlaşma şəraitində keçmişdir.
Sentyabrın 6-da Azərbaycan Respublikasının Prezidenti Heydər Əliyev Misir Ərəb Respublikasının Prezidenti Hüsni Mübarək ilə görüşmüşdür. Görüş zamanı ikitərəfli münasibətlərin bir çox problemlərinə toxunulmuşdur.
Heydər Əliyev Ermənistanın Azərbaycana təcavüzü barədə Hüsni Mübarəkə ətraflı məlumat vermiş, münaqişənin aradan qaldırılmasına dair respublikamızın mövqeyini açıqlamışdır. Misir Prezidenti Azərbaycanın haqq işi ilə Misir xalqının həmrəy olduğunu bildirərək, Ermənistanın təcavüzünün dəf olunması üçün Azərbaycana hər cür diplomatik siyasi dəstək göstəriləcəyini vəd etmişdir. O qeyd etmişdir ki, belə bir dəstək Misirin beynəlxalq təşkilatlardakı nümayəndələri vasitəsilə həyata keçirilir və bundan sonra da intensiv şəkildə davam etdiriləcəkdir.
Tərəflər bu istiqamətdə BMT-nin və digər beynəlxalq təşkilatların imkanlarından geniş istifadə etməyi qərara almışlar.
Görüşdə Misir-Azərbaycan ikitərəfli əlaqələrinin inkişaf perspektivlərinə böyük diqqət yetirilmişdir. Qeyd edilmişdir ki, tarixi, dini, mədəni əlaqələrlə bir-birinə bağlı olan Azərbaycan və Misir xalqlarının qarşılıqlı əməkdaşlığının daha da inkişaf etdirilməsi üçün bütün imkanlardan istifadə olunacaqdır.
Azərbaycan Prezidenti Misir Ərəb Respublikasının Prezidentini ölkəmizə rəsmi səfərə dəvət etmişdir. Dəvət məmnuniyyətlə qəbul olunmuşdur.
Görüş səmimilik və dostluq şəraitində keçmişdir.
Sentyabrın 6-da Azərbaycan Respublikasinin Prezidenti Heydər Əliyev Pakistanin Baş naziri Bənazir Bhutto ilə görüşmüşdür. Heydər Əliyev qeyd etmişdir ki Azərbaycanın müstəqilliyini dünya dövlətləri arasında birincilər sırasında tanıyan Pakistanın respublikamıza dostluq münasibətlərini yüksək qiymətləndirir. Bu mövqe Azərbaycan-Ermənistan münaqişəsinə münasibətdə də prinsipiallığı ilə seçilir.
Pakistanın Baş naziri qeyd etmişdir ki, onun ölkəsi Ermənistanın təcavüzünü qətiyyətlə pisləyir və bu təcavüzün dəf edilməsi üçün bütün beynəlxalq təşkilatların imkanlarından öz nümayəndələri vasitəsilə istifadə etməyə çalışır. Baş nazir bu məqsədlə İslam Konfransı Təşkilatının imkanlarından daha geniş istifadə edilməsinin zəruriliyini xüsusi vurğulamış və qeyd etmişdir ki, Ermənistanın təcavüzü ilə əlaqədar olaraq, Azərbaycanla müsəlman həmrəyliyinin nümayiş etdirilməsi prinsipial əhəmiyyətə malikdir.
Bənazir Bhutto bu təşkilatın digər səylərindən də geniş istifadə etməyi təklif etmişdir. Baş nazir həmçinin demişdir ki, onun ölkəsi BMT-də və digər beynəlxalq təşkilatlarda Azərbaycanın haqq işini ardıcıl surətdə müdafiə edəcəkdir.
Səmimilik və qarşılıqlı anlaşma şəraitində keçən söhbətdə ikitərəfli münasibətlərin bir çox aktual problemlərinə də toxunulmuşdur.
Bənazir Bhutto Azərbaycana rəsmi səfərə dəvət olunmuşdur. Dəvət məmnuniyyətlə qəbul edilmişdir.
ABŞ-IN VİTSE-PREZİDENTİ ALBERT QOR İLƏ GÖRÜŞMÜŞDÜR
Sentyabrın 6-da Azərbaycan Respublikasinin Prezidenti Heydər Əliyev ABŞ-ın vitse-prezidenti Albert Qor ilə görüşmüşdür. Görüşdə Azərbaycan-Ermənistan münaqişəsinin bir çox cəhətlərinə toxunulmuşdur. Atəşkəs rejiminə əməl edilməsini müsbət addım kimi qiyməytləndirən tərəflər sülh haqqında danışıqlar prosesinə yeni dinamizm verilməsi zəruriliyini vurğulamışlar.
Qeyd edilmişdir ki, ATƏM-in Minsk qrupu çərçivəsində aparılan danışıqların məntiqi yekunla başa çatdırılması üçün bu proses həm BMT, həm də iri dövlətlər, o cümlədən ABŞ tərəfindən daha fəal surətdə dəstəklənməkdədir. Görüşdə sülh danışıqlarını əməli işə çevirəcək bəzi təkliflər müzakirə edilmişdir.
Tərəflər neft müqavilələrinin tezliklə imzalanmasının zəruriliyini qeyd etmişlər. Hər iki tərəf bununla əlaqədar öz üzərlərinə düşən bütün öhdəlikləri yerinə yetirəcəyini vəd etmişdir. Azərbaycanda siyasi-iqtisadi islahatların həyata keçirilməsi ilə maraqlanan Albert Qor bu işlərin gedişindən razı qaldığını bildirmişdir. O qeyd etmişdir ki, Amerika tərəfi Azərbaycanda bazar iqtisadiyyatına keçidlə və demokatik islahatlarla bağlı bütün tədbirləri müdafiə edir.
Görüş səmimilik və dostluq şəraitində keçmişdir.
MİSİR ƏRƏB RESPUBLİKASININ XARİCİ İŞLƏR NAZİRİ ƏMR MUSANI
QƏBUL ETMİŞDİR
Misir tərəfi beynəlxalq təşkilatlarda Azərbaycanın siyasi mövqeyinin dəstəklənməsi ilə bağlı özünün konkret fikirlərini söyləmişdir. Qeyd edilmişdir ki, Dağlıq Qarabağ münaqişəsinə Misirin münasibəti aydındır. Onun dövləti Ermənistanın təcavüzünü qətiyyətlə pisləyir, məsələnin sülh yolu ilə həll edilməsi üçün beynəlxalq təşkilatlarda Azərbaycanın mövqeyini ardıcıl surətdə dəstəkləyir.
Qəbulda Azərbaycanın İslam aləmində tutduğu özünəməxsus yer barədə də ətraflı fikir mübadiləsi olmuşdur. Qeyd edilmişdir ki, İslam təşkilatları vasitəsilə Azərbaycanı diplomatik və siyasi baxımdan dəstəkləmək üçün Misir özünün bütün imkanlarından istifadə edəcəkdir.
Görüş zamanı Azərbaycanla Misir arasında iqtisadi və siyasi əlaqələrin daha da inkişaf etdirilməsinin zəruriliyi qeyd olunmuşdur.
Görüş səmimilik və dostluq şəraitində keçmişdir.
Aslan Aslanov
AZƏRTAC-ın xüsusi müxbiri
Qahirə
Bölmənin digər xəbərləri
