AZƏRBAYCAN TƏHSİL NAZİRİ MİSİR MƏRDANOVUN ÇIXIŞI
O dedi ki, bu gün maarifpərvər xalqımız, ölkəmizin elmi-pedaqoji ictimaiyyəti Azərbaycan müəllimlərinin XII qurultayının keçirilməsi kimi əlamətdar, fərəhli bir hadisənin sevincini yaşayır. Təhsilimizin işıqlı gələcəyinə inam və nikbinlik bəxş edən bu əlamətdar gün münasibətilə qurultay nümayəndələrini, qonaqlarımızı, şərəfli müəllim adını ləyaqətlə daşıyan bütün insanları səmimi qəlbdən təbrik edir, hamınıza uğurlar diləyirəm. Qarşıdan gələn Beynəlxalq müəllim günü, bu şərəfli peşə bayramı münasibətilə də bütün müəllimləri ürəkdən təbrik edir, cansağlığı və səadət arzulayıram.
Qurultayın əlamətdar hadisələr ərəfəsində keçirildiyini vurğulayan nazir xatırlatdı ki, oktyabrın 15-i Azərbaycanda prezident seçkiləri günüdür. Heç şübhə yoxdur ki, vətəndaşlarımız ən layiqli namizədi dövlətimizin başçısı seçməklə son illər ölkəmizdə bərqərar olmuş siyasi və iqtisadi sabitliyin davamlılığına və gələcək inkişafa səs verəcəklər.
Natiq dedi ki, bu əlamətdar bayram təhsilimizin himayəçisi, müəllimlərin yaxın dostu, müstəqil Azərbaycanın ilk xalq müəllimi möhtərəm Heydər Əliyevə daha çox aiddir. İcazə verin, bu bayram münasibətilə əziz Prezidentimizi Azərbaycanın bütün təhsil işçiləri adından ürəkdən təbrik edim, təhsilimizə göstərdiyi müntəzəm diqqət və qayğıya görə ona dərin təşəkkürümüzü bildirim. Cənab Prezidentin qurultayımızı təbrik etməsi, Vətəndən uzaqlarda olsa da, müəllimləri unutmaması hamımızda böyük ruh yüksəkliyi doğurdu. Təbrik məktubundakı xoş sözlərə və səmimi arzulara görə Sizin adınızdan möhtərəm Prezidentimizə bir daha minnətdarlığımı bildirir, ona möhkəm cansağlığı və xoşbəxtlik arzulayıram.
Misir Mərdanov vurğuladı ki, 1999-cu ildə möhtərəm Prezidentimiz Heydər Əliyev tərəfindən Təhsil İslahatı Proqramının təsdiq edilməsi ilə Azərbaycan təhsilinin müasir ideyalar əsasında inkişafında yeni bir dövr başlanmışdır. Dövlət müstəqilliyimizin 1991-ci ildə bərpa olunmasına baxmayaraq, Təhsil İslahatı Proqramının yalnız 8 ildən sonra qəbul edilməsi heç də təsadüfi deyildi və bunun tarixi səbəbləri vardır.
Yaddan çıxarmaq olmaz ki, 1991-ci ilin sonundan 1993-cü ilin ortalarına kimi ölkəmizdə hərc-mərclik, xaos vəziyyəti hökm sürürdü, cəmiyyətdə qarşıdurma və vətəndaş müharibəsi təhlükəsi mövcud idi. 1993-cü ilin 15 iyununda xalqın tələbi ilə yenidən siyasi hakimiyyətə qayıdan Heydər Əliyevin gərgin, ardıcıl və məqsədyönlü fəaliyyəti ilə ölkəmizdə siyasi sabitlik, sağlam mühit bərqərar oldu, tənəzzülə uğramış iqtisadiyyatın dirçəlişi və tədricən inkişafı üçün real zəmin yarandı. Sosial-iqtisadi tərəqqi dövrünə keçid və ən ağrılı dərdimiz olan Dağlıq Qarabağ problemi ilə əlaqədar məruz qaldığımız müharibə şəraitində təhsil islahatlarına başlanması həm çox cəsarətli addım, həm də Azərbaycan dövlətinin təhsilə göstərdiyi yüksək qayğının nümunəsi idi.
Nazir Təhsil İslahatı Proqramının təsdiqindən keçən müddətdə konkret istiqamətlər üzrə və ayrı-ayrı təhsil pillələrində görülən işlərdən, əldə etdilən uğurlardan danışdı, həmin dövrdə 150-dən artıq normativ-hüquqi sənədin əksəriyyətinin təsdiq olunduğunu, yeni Təhsil Qanununun qəbul edilməsinin vacibliyini vurğuladı.
Məruzəçi nazirliyin beynəlxalq təşkilatlarla sıx əlaqələrindən, həyata keçirilən müxtəlif layihələrdən, təhsil sahəsində mövcud nöqsanların aradan qaldırılması yollarından, orta təhsil pilləsində istedadlı uşaq və gənclərə göstərilən qayğıdan, ötən 5 il ərzində ümumtəhsil məktəblərinin tədris proqramları, dərslik və dərs vəsaitləri ilə təminatı üçün görülən genişmiqyaslı tədbirlərdən, texniki-peşə təhsili sahəsində aparılan islahatların nəticələrindən, diplomdansonrakı təhsil, kadr təminatı, ali məktəb elmi və elmi tədqiqatlar sahəsində, məktəbdənkənar təhsil və tərbiyə işinin təşkilindən danışdı. O dedi ki, Azərbaycan dövlətinin, hökumətin təhsilə göstərdiyi diqqət və qayğı gələcəyə nikbin baxmağa əsas verir. Bu baxımdan qarşıdakı illərdə orta təhsilin inkişafı, yenidən qurulması, mövcud problemlərin həlli ilə əlaqədar bir sıra mühüm tədbirlərin həyata keçirilməsi nəzərdə tutulmuşdur.
Nazir bildirdi ki, 1998-ci ildə ali məktəb elminin inkişafına dövlət büdcəsindən 1,4 milyard manat vəsait ayrılmışdısa, bu rəqəm 2003-cü ildə 3 dəfə artırılaraq 4,3 milyard manata çatdırılmışdır. Müəllimlərin əmək haqlarının artırılması nəticəsində təhsil işçilərinin aylıq orta əmək haqqı 1998-ci ildəki 132,2 min manatdan 2003-cü ildə 267 min manata çatmışdır. O cümlədən müəllimlərin aylıq orta əmək haqqı 1998-ci ildə 178 min manat idisə, 2003-cü ildə 368 min manat təşkil etmişdir.
Məruzəçi xatırlatdı ki, Prezident Heydər Əliyev 1998-ci ildə bu sarayda müəllimlərin XI qurultayındakı tarixi nitqində başqa problemlərlə yanaşı, məktəb tikintisinə də toxunmuş, iş adamlarını, beynəlxalq təşkilatların nümayəndələrini bu vacib məsələnin həllində Azərbaycana yardım etməyə çağırmışdı. Yerli və xarici iş adamları, beynəlxalq təşkilatlar Prezidentin bu çağırışına qoşuldular. 1998-2002-ci illər ərzində ölkəmizdə daxili imkanlar, büdcə vəsaiti, xarici ölkələrin və beynəlxalq təşkilatların qrant və kreditləri hesabına 14921 yerlik 50 yeni məktəb binası tikilmiş, 22982 şagird yeri olan 66 məktəbdə tikinti-bərpa işləri görülmüş, 34 məktəbdə əsaslı təmir işləri aparılmışdır.
Nazir məruzəsinin sonunda müəllimləri bir daha təbrik etdi, qarşıdan gələn prezident seçkilərində təhsil işçilərini fəal iştiraka, vətəndaş mövqeyi nümayiş etdirməyə çağırdı.
Bölmənin digər xəbərləri
