SİYASƏT
AZƏRBAYCANDA MƏTBUATIN İNKİŞAFINA DAİM QAYĞI GÖSTƏRİLİR
Strasburq, 27 yanvar (AZƏRTAC). Avropa Şurası Parlament Assambleyasının (AŞPA) qış sessiyasının yanvarın 27-də keçirilmiş yığıncağında bir çox məsələlərlə yanaşı, mətbuat azadlığı məsələsi də müzakirə edilmişdir.
Böyük Britaniyadan olan məruzəçi Əndre Makintoş cəmiyyətin formalaşmasında, demokratiyanın inkişafında və ictimai-siyasi həyatda mətbuatın oynadığı rolu yüksək qiymətləndirmişdir. O, bir çox ölkələrdə mətbuata təzyiqlər göstərildiyini qeyd etməklə bərabər, şərəfli borclarını yerinə yetirən jurnalistlərə qarşı sui-qəsd hallarını pisləmiş, əvvəlki illərdən fərqli olaraq son bir ildə çoxlu jurnalistin həlak olmasından təəssüf hissi keçirdiyini bildirmişdir.
ATƏT-in mətbuat azadlığı məsələləri üzrə nümayəndəsi Mikloş Haraşti bir çox mətbu orqanının təsisçinin təsiri altına düşdüyündən müstəqil fikir yürütmədiyini bildirmiş, son illər internetin insanların məişətinə sürətlə daxil olduğunu diqqətə çatdırmış, eyni zamanda, bəzi dövlətlərdə milli internetlərin dünyaya çıxmasının qarşısına sədd çəkildiyini qeyd etmişdir.
Ermənistan nümayəndəsi Azərbaycan mətbuatını ölkəsinə qarşı qərəzli mövqe tutmaqda, Ermənistanda baş vermiş hadisələrə kölgə salmaqda təqsirləndirməyə səy göstərmişdir.
ATƏT-in nümayəndəsi M.Haraşti yekun sözündə yenə ölkəmizə qarşı tutduğu qərəzli mövqeyi nümayiş etdirmişdir.
Azərbaycan nümayəndə heyətinin rəhbəri Səməd Seyidov məruzə ətrafındakı çıxışında mətbuatımıza qarşı qərəzli mövqe tutanların ünvanlarına sərt ittihamlar irəli sürmüşdür. O, müzakirə olunan məsələnin vacibliyini qeyd etmiş, eyni zamanda, yığıncaqda Azərbaycan mətbuatının və jurnalistlərinin fəaliyyətinə dair qeyri-obyektiv məlumatların səsləndirilməsinin heç bir hüquqi əsası olmadığını bildirmişdir. Səməd Seyidov Ermənistan nümayəndəsinin ölkəsində baş verən mənfi halları ört-basdır edərək Azərbaycanın kütləvi informasiya vasitələrinə böhtan atdığını, problemləri Ermənistandan kənarda axtardığını bildirmişdir.
Bütün ölkələrdə olduğu kimi, mətbuatla bağlı ölkəmizdə də bəzi problemlər olduğunu xatırladan S.Seyidov çox qısa zaman kəsiyində söz və mətbuat azadlığı sahəsində böyük işlər görüldüyünü, ölkəmizdə 3500-dən artıq kütləvi informasiya vasitəsinin, 30 informasiya agentliyinin, 44 elektron mətbuatın fəaliyyət göstərdiyini diqqətə çatdırmışdır.
ATƏT nümayəndəsinin internetdən danışmasına toxunan deputat son vaxtlar Azərbaycanda internetdən istifadə tariflərinin aşağı salındığını, nəticədə getdikcə daha çox insanın internetdə yerləşdirilən məlumatlara çıxış əldə etdiyini vurğulamışdır.
S.Seyidov bildirmişdir ki, Azərbaycan hökuməti bu sahədə Avropa Şurası, ATƏT və digər beynəlxalq təşkilatlarla yeni proqramlar hazırlayır. Azərbaycan dövləti kütləvi informasiya vasitələrinin vəziyyətini yaxşılaşdırmaq məqsədi ilə 1,2 milyon avro ayırmışdır. Göründüyü kimi, bu önəmli bir məbləğdir.
Nümayəndə heyətinin rəhbəri ölkədə mətbuat sahəsində olan problemlərdən dəfələrlə söhbət açıldığını, Azərbaycanda mətbuatın tam azad olduğunu, bir çox mətbu orqanının müxtəlif partiyalara məxsusluğunu, onların azad şəkildə fəaliyyət göstərdiklərini bildirmişdir.
Ermənistanın apardığı işğalçılıq siyasəti nəticəsində Azərbaycanın qaçqın və məcburi köçkün problemi ilə üzləşdiyini, onların problemi ilə yalnız yerli mətbuatın maraqlandığını, Ermənistan-Azərbaycan, Dağlıq Qarabağ münaqişəsi nəticəsində doğma ocaqlarından silah gücünə zorla çıxarılmış bu insanların taleyinin Avropa mətbuatında lazımınca işıqlandırılmadığını təəssüf hissi ilə qeyd etmişdir.
AŞPA-nın qış sessiyasının üçüncü günü bununla öz işini başa vurmuşdur.
Əsgər Əliyev
AZƏRTAC-ın xüsusi müxbiri
Strasburq