AZƏRBAYCANDA MİSİR RƏSSAMLARININ BƏDİİ PLASTİK İNCƏSƏNƏT SƏRGİSİ NÜMAYİŞ ETDİRİLMİŞDİR
AZƏRTAC xəbər verir ki, aprelin 21-də Bədii Sərgi Salonunda Azərbaycanda Misir mədəniyyəti günləri çərgivəsində misirli rəssamların plastik incəsənət sərgisi nümayiş etdirilmişdir.
Sərgidə xanım sənətkarların - Hanan əl-Şeyx, Marva əl-Şazli, Asmaa əl-Navavi və Ramia əl-Helvinin fəlsəfi-didaktik mövzuda əl işləri maraqla qarşılanmışdır.
Abstrakt təsəvvür gücünə malik Hanan əl-Şeyxin əsərləri daha çox maraq doğurmuşdur. Onun əsərlərində, əsasən, konfliktin həllində və həyat uğrunda mübarizədə ağlın qələbə çalacağına inam təbliğ olunur.
Əsasən qırmızı və yaşıl rənglərdən istifadə edən Marva əl-Şazli həndəsi predmetlərdən istifadə edərək, ideyanın tamaşaçıya çatdırılmasına nail olmuşdur.
Dünyanın ağ-qara, xeyir və şərdən ibarət olduğunu göstərən Asmaa əl-Havavinin əsərlərində ana-qadın obrazı “xeyir mələk” anlamını yaratmışdır.
İllüziyaya qapılaraq, bütün problemlərin həllini rənglərin dili ilə verməyə çalışan Ramia əl-Helvinin də əsərləri janr və formasına görə yenilikdən xəbər verir.
Sərgidəki qeyri-adilik, saflıq və həqiqətə inam hissi tamaşaçılarda rəğbər hissi oyatmışdır.
Bölmənin digər xəbərləri
