CƏMİYYƏT
“Azəriqaz”ın bir qrup əməkdaşı YAP-a üzv qəbul edilib
Bakı, 26 dekabr, AZƏRTAC
Dekabrın 26-da Yeni Azərbaycan Partiyasına (YAP) yeni üzvlərin qəbulu ilə əlaqədar partiyanın Xətai rayon ərazi təşkilatının “Azəriqaz” İstehsalat Birliyi üzrə ərazi ilk partiya təşkilatının idarə heyətinin yığıncağı keçirilib.
Birlikdən AZƏRTAC-a bildirilib ki, yığıncaqda “Azəriqaz”ın rəhbərliyi, partiya fəalları, eləcə də bir neçə struktur bölmələrin məsul əməkdaşları iştirak ediblər. “Azəriqaz” İB-nin baş direktorunun satış və istismar üzrə müavini Cahid Hüseynov Yeni Azərbaycan Partiyasına üzvlüyə qəbul edilən 12 nəfəri təbrik edib. Partiya sıralarında gənclərin yer almasını yüksək dəyərləndirən C.Hüseynov onlara uğurlar arzulayıb.
Digər çıxış edənlər də partiyanın yeni üzvlərinin ümumi məqsədlər üçün səylə çalışacaqlarına inandıqlarını ifadə ediblər. Daha sonra birliyin 12 əməkdaşına Yeni Azərbaycan Partiyasının üzvlük vəsiqələri təqdim olunub.