İQTİSADİYYAT
Bakıda Hindistan məhsullarının ən böyük eksklüziv Ticarət Sərgisinin açılış mərasimi olub
Bakı, 2 sentyabr, AZƏRTAC
ANM Exhibitions, Hindistan İxrac Təşkilatları Federasiyası (1965-ci ildə Hindistan hökuməti, Ticarət Nazirliyi tərəfindən yaradılıb) və Hindistanın Bakıdakı səfirliyi ilə birgə “Best of India” - Hindistan məhsullarının ən böyük eksklüziv Ticarət Sərgisinin açılış mərasimi keçirilib.
AZƏRTAC xəbər verir ki, əvvəlcə Hindistanın Azərbaycandakı müvəqqəti işlər vəkili Vinay Kumar sərginin rəmzi açılışını bildirən qırmızı lenti kəsib.
Sərgidə çıxış edən V.Kumar qeyd edib ki, bugünkü sərgi Hindistanın müstəqilliyin 75-ci ildönümü münasibətilə keçirilən tədbirlər çərçivəsində təşkil olunub.
Diqqətə çatdırılıb ki, Hindistan və Azərbaycan arasında tarixi və mədəni əlaqələrə əsaslanan sıx dostluq münasibətləri mövcuddur. Müvəqqəti işlər vəkili bildirib ki, 2022-ci ilin yanvar-iyul aylarında Hindistan və Azərbaycan arasında ümumi ikitərəfli ticarət dövriyyəsi ötən ilə nisbətən 169,1 faiz artaraq 1 milyard 184 milyon ABŞ dolları təşkil edib.
“Azərbaycanla müxtəlif sahələrdə geniş əməkdaşlıq mövcuddur. Belə ki, Hindistan məhsulları üçün bu bazarda kifayət qədər imkan var. Bu sərgi Hindistanın təklif etdiyi məhsul və xidmətlərin nümayiş olunması rolunu oynayır. Ümid edirəm ki, bu sərgi isti və mehriban Azərbaycan xalqını Hindistan mədəniyyəti ilə yaxından tanış edəcək”, - deyə Vinay Kumar qeyd edib.
Sonra Hindistanın Mikro, Kiçik və Orta Sahibkarlıq Nazirliyinin Milli İdarə Heyətinin üzvü və Mikro, Kiçik və Orta Sahibkarlığın İnkişafı Forumunun sədri Rajniş Goenka sərgidə çıxış edərək Bakı şəhərini çox bəyəndiyini bildirib. O qeyd edib ki, ölkəmizdə olduğu müddətdə Azərbaycanla Hindistan arasında kiçik və orta sahibkarlıq, o cümlədən ikitərəfli biznesin inkişafı üzrə fəaliyyətləri araşdırıb.
Həmçinin diqqətə çatdırıb ki, bir neçə gün əvvəl sərgi çərçivəsində dəb nümayişi keçirilib. R.Goenka tədbirin təşkil edilməsində iştirak edən hər kəsə minnətdarlığını ifadə edib.
Daha sonra Hindistan geyimlərindən ibarət moda nümayişi keçirilib.
Qeyd edək ki, xarici ölkələrdə ardıcıl olaraq təşkil olunan bu sərgi Hindistan sənayesinin yüksəkkeyfiyyətli dəb, tekstil və həyat tərzi məhsullarını dünyaya tanıdır. Builki sərgidə özünün düyü, çay, ədviyyat, hədiyyələr, əl işləri, ev mebeli kimi yüksəkkeyfiyyətli məhsul və xidmətlərini nümayiş etdirən Hindistanın 65-ə yaxın şirkəti iştirak edir.
Sərginin ilk üç günündə saat 13:00-dan saat 16:00-a qədər davam edəcək “Hindistan yaradıcılığı səhnədə” eksklüziv canlı dəb nümayişi olacaq. Bütün bunlar ziyarətçilər üçün ödənişsiz təqdim edilir. Ziyarətçilər tədbir günləri ərzində istənilən vaxt Hindistan səfirliyinin stendində ödənişsiz olaraq Hindistan çayını dada bilərlər. Bundan əlavə, tədbir zamanı böyük LED ekranda Hindistanın turizm, mədəniyyət və investisiya imkanlarının təbliğatı məqsədilə Azərbaycan dilində subtitrlərlə videoları fasiləsiz nümayiş olunacaq.
Tədbirdə biznes və ticarətlə yanaşı, zəngin Hindistan mədəni irsinin nümunələri - xalq rəqsləri, Bollivud mahnılarının ifaları, ənənəvi alətlərdə ifa, xına (Mehndi) sənəti və sair vasitəsilə təmsil olunması da diqqət mərkəzində olacaq və bu da öz növbəsində “Best of India” tədbirinə əlavə dəyər qatacaq.
Qeyd edək ki, sentyabrın 12-dək davam edəcək sərgiyə giriş ödənişsizdir.