Bakı, 25 noyabr, AZƏRTAC

Batumidə baş verən qalmaqalın mənbəyi məlum idi. Bu, Azərbaycana və ölkəmizin QHT-lərinə qarşı bir təxribat idi. Vaxtında müdaxilə etməsəydik, onlar öz istəklərinə nail olacaqdılar.

AZƏRTAC xəbər verir ki, bu sözləri Beynəlxalq Avrasiya Mətbuat Fondunun sədri Umud Rəhimoğlu Gürcüstanın Batumi şəhərində Avropa İttifaqı “Şərq Tərəfdaşlığı” Proqramının təşkilatçılığı ilə keçirilən vətəndaş cəmiyyəti forumunda baş verənlərlə bağlı bəyanatında bildirib.

Forumda baş verənlər haqqında çoxlu müzakirələr və yazıların olduğunu qeyd edən U.Rəhimoğlu yerli mətbuatın bəzi məqamlarda səhvlərə yol verdiyini də vurğulayıb. Xüsusilə məlumatların ilk mənbədən yayılmaması forumun keçirildiyi günlərdə cəmiyyət tərəfindən yanlış təəssürat formalaşmasına rəvac verib. U.Rəhimoğlu deyib ki, forumda ilk ciddi qalmaqal məhz Çexiyanın “People in Need” təşkilatının foyeyə stendlər quraşdıraraq, Azərbaycana dair tənqidi plakatlar asması ilə başladı. Azərbaycan nümayəndə heyəti buna qəti etirazını bildirərək, foruma qatılmaqdan imtina etdi. Təəssüf ki, bizim nümayəndə heyətindən bir neçə nəfər bütün cəhdlərimizə rəğmən iclas zalına daxil oldu. Bununla belə biz mövqeyimizdə qaldıq. Çünki belə bir plakatın yerləşdirilməsi forumun proqramına daxil deyildi və məsələ sadəcə bizə qarşı qərəzli münasibətdə idi.

Stendləri yerləşdirən Çexiyaya məxsus təşkilatın Avropada ermənipərəst bir təşkilat kimi tanındığını bildirən U.Rəhimoğlu, hətta bu təşkilatın Dağlıq Qarabağ ermənilərini əsas nümayəndə heyəti kimi foruma salmağa çalışdığını da qeyd edərək dedi: “Azərbaycan nümayəndə heyəti forumda bu cəhdin qarşısını aldı. Bundan başqa, erməni nümayəndə heyətinin üzvləri cəbhə xəttində vurulmuş Ermənistana məxsus helikopterlə bağlı məsələni də forumun gündəliyinə daxil etməyə cəhd göstərdilər. Bizim ciddi etirazımızdan sonra onların bu istəyi də baş tutmadı. Onu da deyim ki, “People İn Need”in rəhbər şəxsləri Azərbaycanın işğal olunmuş torpaqlarına, Dağlıq Qarabağa indiyədək bir neçə dəfə qanunsuz səfər ediblər. Göründüyü kimi, bu təşkilatın Azərbaycana qarşı niyə belə addım atmasının səbəbi məlumdur. Bu təşkilata bir sıra erməni QHT-ləri lobbiçilik edir. Xüsusilə Batumi qalmaqalının əsas dirijorlarından biri, Ermənistanın vətəndaş cəmiyyəti təmsilçisi Boris Novosardiyanın bu təşkilata təlimatlar verdiyi ortaya çıxdı. Hətta forumun rəsmi foto və video çəkilişini aparanlar da əslən ermənilər idi”.

Tədbirin ən vacib məqamlarından biri isə forumda Azərbaycanda insan hüquqları ilə bağlı məruzənin müzakirəyə çıxarılması idi. Təsəvvür edin, məruzə başdan-ayağa qərəzli və onu da tərtib edən məruzəçilərdən biri Artur Sagunts adlı erməni idi. Prosesin Azərbaycanın əleyhinə cərəyan etdiyini görüb yenidən çıxış etmək qərarına gəldim və söz haqqı istədim. Belə bir məruzənin, özü də erməni əsilli birisinin hazırladığı sənədin forum iştirakçıları tərəfindən qəbul edilməsinin çox ciddi səhv olacağını və Azərbaycanın vətəndaş cəmiyyəti təmsilçilərinin bu forumla gələcək əməkdaşlığını sual altına alacağını diqqətə çatdırdım. Səsvermə bizim xeyrimizə başa çatdı və biz auditoriyadan dəstək aldıq. Müşahidə etdiyimiz ən vacib detallardan biri də foruma moderatorluq və həmsədrlik edən şəxslərin aydın şəkildə bizə qərəzli mövqe sərgiləməsi və iştirakçıları bu məruzəni qəbul etməyə yönləndirməsi idi. Təsadüfi deyil ki, forumdakı iclasda bu məruzənin müzakirəsi zamanı moderator əslən polşalı Kristof Babinski təkid edərək səsvermənin yenidən keçirilməsini istədi. Mən və nümayəndə heyətindəki digər həmkarlarım Sabir Bağırov və İradə Rzazadə yenidən çıxış etdik, belə bir sənədin qəbulunun hansı mənfi nəticələrə gətirib çıxaracağını sadaladıq. Yenidən gizli formada keçirilən səsvermədə 32 nəfər əleyhinə və 29 nəfər lehinə olmaqla sənəd qəbul edilmədi.

BAMF-ın sədri təəssüf etdiyini bildirdi ki, forumun bəzi iştirakçıları bu səsvermə prosesi ilə bağlı mətbuata səhv informasiya verib, guya ermənilərin də sənədin əleyhinə olduğunu deməklə cəmiyyəti aldatmağa cəhd edirlər. Ermənilərə bəraət qazandırmaq heç də onların adını uca etmir. Əksinə, bunun məyusedici bir hal olduğunu bildirən BAMF sədri həmin şəxsləri belə strateji məsələlərdə öz siyasi maraqlarından çıxış edərək, ictimai marağı manipulyasiya etməkdənsə, vicdanlarının səsinə qulaq asıb milli maraqlarımızı qorumağa çağırıb. U.Rəhimoğlu deyib: “Əgər forumda nümayəndə heyətimiz arasında həmrəylik olsaydı, Azərbaycana qarşı bu addımı atmağa cürət etməzdilər. Təəssüf ki, biz əksini müşahidə etdik”.