BAXIN İNDİYƏ QƏDƏR MƏLUM OLMAYAN ƏSƏRİ TAPILMIŞDIR
AZƏRTAC xarici kütləvi informasiya vasitələrinə istinadla xəbər verir ki, almaniyalı mütəxəssislər İ.S.Baxın indiyə qədər məlum olmayan “Wo Gott der Her nicht bei uns haelt” adlı əsərini aşkar etmişlər. Orqan üçün yazılmış bu əsər bəstəkarın yaradıcılığının ilk dövrünə aiddir.
Əsərin partiturunu tapmış mütəxəssislərdən biri - Ştefan Blat demişdir ki, Qall şəhərindəki Martin Lüter universitetinin bir qrup alimi bu əsəri hərracların birində tapmışlar.
Blat bu məlumatı dəqiqləşdirərək bildirmişdir ki, not partituru XIX əsrdə yaşamış Leypsiqli bəstəkar Vilhelm Rusta məxsus olmuşdur. Musiqiçinin bütün kolleksiyası ilə birlikdə bu partitur da hərracda satışa çıxarılmalı idi.
Baxın Leypsiqdəki arxivində çalışan ekspertlər yeni tapılmış əsəri təhlil edərək bu qənaətə gəlmişlər ki, həmin əsər İohann Sebastyan Bax tərəfindən 1705-1710-cu illərdə yazılmışdır. Onlar həmçinin, müəyyən etmişlər ki, yeni tapılmış notlar əvvəllər məlum olan musiqi fraqmentinin tam versiyasıdır. Həmin fraqmentin Baxa mənsub olması ehtimal edilirdi. Lakin indiyə qədər mütəxəssislər bu fraqmentin həqiqətən məşhur bəstəkar tərəfindən yaradılmasına şübhə edirdilər.
Bölmənin digər xəbərləri
