Bakı, 2 noyabr (AZƏRTAC). Noyabrın 2-də Dövlət Şəhərsalma və Arxitektura komitəsinin təşkilatçılığı ilə Böyük Bakının Regional İnkişaf Planının (BBRİP) konseptual sxemi ilə bağlı ictimai müzakirələr keçirilmişdir.

AZƏRTAC xəbər verir ki, tədbiri giriş sözü ilə açan Dövlət Şəhərsalma və Arxitektura komitəsinin sədri Abbas Ələsgərov 2030-cu ilədək həyata keçiriləcək layihəyə dair müzakirə və təkliflərin 2013-cü ilin sonunadək yekunlaşdırılacağını bildirmişdir.

A.Ələsgərov qeyd etmişdir ki, koordinatoru Bakı Dövlət Layihə İnstitutunun olduğu layihə üzrə işlər əsasən tamamlanmışdır.

Bakı Dövlət Layihə İnstitutunun direktoru İlqar İsbatov son 17 ay ərzində rəhbərlik etdiyi qurumun mütəxəssisləri tərəfindən görülən işlərlə bağlı tədbir iştirakçılarına ətraflı məlumat vermişdir.

Vurğulanmışdır ki, BBRİP-da başlıca olaraq mövcud vəziyyət, imkanlar, planlaşdırma üzrə yanaşma metodları, inkişaf modeli üzrə alternativlərin müəyyənləşdirilməsi kimi məsələlərə xüsusi yer ayrılmışdır.

BBRİP layihəsinə Bakı şəhərinin 11 rayonu, Abşeron rayonunun bir hissəsi, Sumqayıt şəhəri, Hacı Zeynalabdin və Corat qəsəbələri daxildir. Əvvəlcə bu ərazilərin 20 il ərzindəki artım dinamikası araşdırılmış, region üzrə əhalinin sayı proqnozlaşdırılmışdır. Hesablamalara görə, 2030-cu ilədək həmin ərazidə əhalinin 3 milyon 500 minədək artımı gözlənilir.

İ.İsbatov məruzəsində bu sahədə imkan və potensiallara toxunmuş, layihənin inkişaf modeli ilə bağlı 4 alternativ variantın təklif olunduğunu söyləmişdir.

layihənin Yerli İqtisadi İnkişaf bölməsinin icraçısı, Harvard Universitetinin professoru xanım Kaya Miller bildirmişdir ki, Azərbaycanda əhalinin artım sürəti “Böyük Bakı”nın işində müəyyən problemlərin yaranmasına gətirib çıxarmışdır.

ABŞ-dan olan mütəxəssis qeyd etmişdir ki, Azərbaycan uzun illərdir ki, ÜDM-in həcminə və iqtisadi artım sürətinə görə dünyanın lider ölkələrindən biridir. Respublikada neft və qaz sənayesi güclü inkişaf edir. Son 20 ildə yüzlərlə yeni müəssisələr yaradılmış, yeni iş yerləri açılmışdır. Lakin əhali artdıqca bu məsələyə daha çox ehtiyac duyulur. Odur ki, tikinti, turizm, kənd təsərrüfatı, yerli sənaye, təhsil, nəqliyyat, xidmət sahələrindən əhalinin məşğulluğu istiqamətində daha ciddi tədbirlər görülməli, kiçik və orta sahibkarlığın inkişafına diqqət artırılmalıdır.

Tədbirdə çıxış edən xarici məsləhətçilər, respublikanın tanınmış memar və inşaatçıları Böyük Bakının Regional İnkişaf Planına dair fikir mübadiləsi aparmış, dəyərli məsləhətlər vermişlər.