Bakı, 4 oktyabr, AZƏRTAC

Ümumiyyətlə, liderlik fenomeninə ən müxtəlif yanaşmalar mövcuddur. Bununla yanaşı, tarixi təcrübə əksər hallarda sübut edir ki, əsl lider məhz xalqının dar günündə özünü təsdiq edir. Belə ki, xalq tarixi sınaqlar qarşısında qaldığı, özü üçün gedəcəyi təhlükəsiz, uğurlu yolu müəyyənləşdirə bilmədiyi zaman lider onu bu sınaqlardan üzüağ çıxarmaqla yanaşı, həm də gedəcəyi bir uğur yolunu müəyyənləşdirir. Ulu öndər Heydər Əliyev bütün lider keyfiyyətlərinə malik olmaqla, Azərbaycan xalqının ən dar günündə xilaskarlıq missiyasını öz üzərinə götürdü. Klassik alman fəlsəfəsində də liderlik məsələsinə məhz belə yanaşma mövcuddur. Yəni, əsl lider xalqın dar günündə meydana çıxır və tarixi xilaskarlıq missiyasını yerinə yetirir. SSRİ-nin süqutu ilə müstəqilliyinə qovuşan Azərbaycan Respublikası eyni anda bir neçə ciddi problemlərlə üz-üzə qaldı. Bu problemlərin aradan qaldırılması imkanları isə həmin dövrdə görünmürdü. Çünki, yaranmış yeni reallıqlar çərçivəsində optimal davranış sərgiləyəcək idarəedənlərin olmaması, digər tərəfdən Ermənistanın əsassız ərazi iddiaları və işğalçılıq siyasəti yenicə müstəqil olmuş ölkənin gələcəyini sual qarşısında qoyurdu.

Bu fikirləri AZƏRTAC-a açıqlamasında Milli Məclisin deputatı, YAP İdarə Heyətinin üzvü, siyasi elmlər doktoru, professor Elşad Mirbəşiroğlu söyləyib.

Deputat bildirib ki, müstəqilliyinə yeni qovuşmuş dövlətin qarşısında duran vəzifələr müstəqilliyin, suverenliyin möhkəmləndirilməsinə, dönməzliyinə xidmət edəcək tərzdə müəyyənləşdirilməli idi. Bunun üçün milli iqtisadi sisteminin yaradılması, ölkəyə sərmayə axınının təşkil olunması və digər zəruri addımların atılması vacib idi. Bunun əksinə olaraq, ölkədə hakimiyyət uğrunda qeyri-sivil mübarizə gedirdi, dərin xaos hökm sürürdü. Belə bir vəziyyətdə Azərbaycan xalqının yeganə ümidi Heydər Əliyev idi. Ulu öndər Heydər Əliyev SSRİ dönəmində Azərbaycanı aqrar ölkədən qısa zaman kəsiyində sənaye ölkəsinə çevirdi, ittifaqın ən qabaqcıl respublikasına çevrildi və idarəetmə sistemi əhəmiyyətli dərəcədə təkmilləşdirildi. Moskvada fəaliyyəti dövründə isə ümummilli lider Heydər Əliyev ən məsuliyyətli sahələrdə öz bilik və bacarığını, yüksək idarəçilik təcrübəsini nümayiş etdirirdi. Bu baxımdan, yalnız Heydər Əliyev kimi təcrübəli, iradəli və xalqına bağlı olan bir şəxsiyyət Azərbaycan dövlətini və xalqını bəlalardan qurtarıb, inkişaf yoluna sala bilərdi. Azərbaycan xalqı bütün bunları nəzərə alaraq, təkidlə Heydər Əliyevin hakimiyyətə qayıtmasını tələb etdi. Həmişə xalqının yanında olan Heydər Əliyev yenə də bu çağırışlara həssas yanaşdı və xilaskarlıq missiyasını öz üzərinə götürdü.

E.Mirbəşiroğlu qeyd edib ki, 1993-cü il oktyabrın 3-də keçirilmiş prezident seçkilərində xalq yekdilliklə Heydər Əliyevi dəstəklədi və bununla da qurtuluşa gedən yola qədəm qoydu. Azərbaycan Respublikasının Prezidenti kimi fəaliyyətə başladığı ilk dövrdən ölkənin gələcəyi üçün çox təsirli addımlar atmağa başlayan Ulu Öndər qısa zaman kəsiyində ölkədəki daxili siyasi gərginliyi aradan qaldırdı, qanunsuz silahlı birləşmələri ləğv etdi və ölkəni inkişaf yoluna qoydu. Prezident seçildikdən sonra andiçmə mərasimində dediyi kimi, ulu öndər Heydər Əliyev bütün həyatını xalqına, dövlətinə həsr etdi.

“Onun atdığı hər addım Azərbaycan xalqının rifahı, dövlətçiliyinin möhkəmləndirilməsi naminə idi. Heydər Əliyevin zamanın nəbzini dəqiqliklə tutaraq, bütün zəruri addımları dəqiqliklə atmağı bacardı. 1994-cü ildə Əsrin müqaviləsinin imzalanması məhz Ulu Öndərin iradəsinin, uzaqgörənliyinin nəticəsi idi. Milli iqtisadi sistemin qurulması üçün ölkəyə sərmayələrin cəlb edilməsi ən təxirəsalınmaz vəzifə idi. Bu, həm də Azərbaycan Respublikasının beynəlxalq əməkdaşlığının qurulması və genişləndirilməsi istiqamətində çox mühüm addım idi. Bununla bərabər inkişaf üçün qüvvə toplamaq üçün, ən əsası isə təcavüzkar Ermənistanın işğalçılıq siyasətini durdurmaq üçün atəşkəs rejiminə nail olunması olduqca vacib idi”, - deyə YAP-ın İdarə Heyətinin üzvü bildirib.

1994-cü ilin mayında Bişkek protokolunun imzalanmasının ölkəyə məhz belə bir imkan verdiyini qeyd edən E.Mirbəşiroğlu deyib: “Azərbaycan Respublikası bundan sonra davamlı inkişaf yoluna qədəm qoydu. Bütün istiqamətlərdə potensialını formalaşdırmağa və gücləndirməyə başladı. Heydər Əliyev hər zaman Azərbaycan dövlətinin gücünə və Azərbaycan xalqının iradəsinə inanırdı, güvənirdi. Ona görə də həmişə inamla deyirdi ki, biz mütləq Qarabağa, Şuşaya qayıdacağıq və qayıtdıq. Ulu Öndər tərəfindən etibarlı, sarsılmaz əsası qoyulan inkişaf yolu Prezident İlham Əliyev tərəfindən yeni dövrün reallıqlarına uzlaşdırılaraq layiqincə davam etdirildi və Azərbaycan dövləti tarixinin ən güclü dövrünə qədəm qoydu.

44 günlük Vətən müharibəsi Azərbaycan dövlətinin, xalqının gücünü və iradəsini bütün dünyaya nümayiş etdirdi. Şanlı Azərbaycan Ordusu qısa zaman kəsiyində işğalçı Ermənistan Ordusunu ağır məğlubiyyətə uğratdı və torpaqlarımızı azad etdi. Bu tarixi Qələbənin əsasında məhz ulu öndər Heydər Əliyev tərəfindən qoyulmuş etibarlı bünövrə var idi”.