Şəki, 24 aprel (AZƏRTAC). Cari ilin birinci rübündə Şəki rayonunda faktiki qiymətlərlə 48 milyon 954 min manatlıq məhsul buraxılmışdır. Bu, 2011-ci ilin müvafiq dövrü ilə müqayisədə 5,4 faiz çoxdur. Rüb ərzində əmtəə dövriyyəsinin həcmi ötən ilin eyni dövrü ilə müqayisədə 13,9 faiz artaraq 66 milyon 912 min manat olmuşdur. Birinci rübdə rayonda istehsal və qeyri-istehsal sahələrinin inkişafına yönəldilmiş investisiyaların həcmi 11 milyon 632 min manat təşkil etmişdir. Bu isə ötən ilin müvafiq dövrünə nisbətən 25,4 faiz çoxdur. Əsas kapitala yönəldilmiş investisiyaların 71,7 faizi tikinti-quraşdırma işlərinə sərf edilmişdir. Rayon əhalisinin aztəminatlı təbəqəsinin sosial vəziyyətinin yaxşılaşdırılması istiqamətində tədbirlər davam etdirilmiş, rüb ərzində 804 ailəyə ünvanlı dövlət sosial yardımı təyin olunmuşdur. İlin ilk rübündə rayonda 288 yeni, daimi iş yeri açılmışdır.

AZƏRTAC xəbər verir ki, bu faktlar Prezident İlham Əliyevin sədrliyi ilə Nazirlər Kabinetinin 2012-ci ilin birinci rübünün sosial-iqtisadi inkişafının yekunlarına həsr olunmuş iclasından irəli gələn vəzifələr və cari ilin birinci rübündə rayonda görülmüş işlərlə bağlı Şəki Şəhər İcra Hakimiyyətində keçirilən geniş şura iclasında icra hakimiyyətinin başçısı Elxan Usubovun hesabat məruzəsində səsləndirilmişdir.

Bildirilmişdir ki, cari ilin birinci rübündə də kənd təsərrüfatında özəl bölmə diqqət mərkəzində saxlanmış, taxılçılığın, heyvandarlığın, meyvəçiliyin, üzümçülüyün inkişafı üçün bir sıra tədbirlər həyata keçirilmişdir. Cari ilin məhsulu üçün payızlıq taxıl əkilmiş 76 min 235 hektar sahəyə aqrotexniki qulluq olunmuş, sahələrə yemləmə gübrəsi verilmişdir. Bu il rayonda yazlıq bitkilərin əkin sahələrinin 650 hektar artırılaraq 8100 hektara çatdırılması nəzərdə tutulur. Hazırda təsərrüfatlarda yazlıq bitkilərin əkini mütəşəkkil davam edir. Ekoloji mühitin sağlamlaşdırılması məqsədi ilə rayon ərazisində genişmiqyaslı yaşıllaşdırma işlərinə başlanmış, rüb ərzində magistral yolların kənarlarında, şəhərin müxtəlif ərazilərində, qəsəbə və kəndlərdə 30 mindən çox ağac əkilmişdir.

Hesabatda rayonda aparılan tikinti-quruculuq işləri barədə də məlumat verilmişdir. Azərbaycan Prezidentinin 2011-ci il 12 sentyabr tarixli Sərəncamına uyğun olaraq, Şəkinin milli memarlıq ənənələri və üslubunun qorunub saxlanması şərti ilə müasir şəkildə yenidən qurulması istiqamətində tədbirlərin davam etdirildiyi, şəhərin küçə və prospektlərində, parklarda əsaslı təmir, bərpa və yenidənqurma işlərinin aparıldığı, dövlətimizin başçısının tapşırığına uyğun olaraq tezliklə şəhərdə “Yay teatrı”nın inşasına başlanacağı diqqətə çatdırılmışdır.

Məlumat verilmişdir ki, hazırda şəhərdəki 5 nömrəli tam orta məktəb üçün 320 yerlik yeni tədris korpusunun, Şorsu və Aşağı Layısqı kəndlərinin hər birində 360, Çələbixan qəsəbəsində 180 yerlik yeni məktəb, Aşağı və Baş Göynük kəndlərində yeni xəstəxana binalarının tikintisi, habelə doğum evi kompleksinin dövlət vəsaiti hesabına əsaslı təmiri davam etdirilir. Bundan əlavə, bu ilin sonunadək Şəki şəhərində Heydər Əliyev Mərkəzinin, Bayraq Meydanının, şəhər icra hakimiyyəti üçün yeni inzibati binanın, Qarabağ müharibəsi əlilləri və şəhid ailələri üçün 36 mənzilli binanın, yetkinlik yaşına çatmayan uşaqlar üçün 30 yerlik ixtisaslaşdırılmış reabilitasiya mərkəzinin və 25 yerlik sosial sığınacağın tikintisinə başlanılması nəzərdə tutulur.

Əhalinin təbii qaz, elektrik enerjisi, içməli su və digər xidmətlərlə təminatının yaxşılaşdırlması sahəsində də işlər davam etdirilmişdir. Birinci rüb ərzində 481 mənzil təbii qazla təmin edilməklə, abonentlərin ümumi sayı 18339 nəfərə çatdırılmış, 2010-cu ildə icrasına başlanılan Şəki şəhərinin su təchizatı və kanalizasiya sistemlərinin yenidən qurulması layihəsinin birinci mərhələsi üzrə işlər isə artıq yekunlaşmaq üzrədir.

Qeyd olunmuşdur ki, ümumiyyətlə, 2012-ci il Şəkinin tarixində “yubileylər ili” kimi yadda qalacaqdır. Cari ildə M.F.Axundzadənin 200 illik, Şəki xanları sarayının 250 illik, şəhər 5 nömrəli tam orta məktəbin 180 illik yubileylərinin, habelə “İpək yolu” III Beynəlxalq Musiqi Festivalının keçirilməsi, “Şəhər Günü”nün bayram edilməsi nəzərdə tutulur.

Məruzədə, həmçinin rayonun turizm infrastrukturunun yaxşılaşdırılması, turizm potensialının daha geniş təbliği, əhalinin ərizə və şikayətlərinə baxılması, qanunçuluğun möhkəmləndirilməsi və digər məsələlərdən bəhs olunmuş, qarşıda duran vəzifələrə toxunulmuşdur.

Məruzə ətrafında çıxışlar olmuşdur.

Şura iclasında Azərbaycan Respublikası Prezidentinin Administrasiyasının məsul işçisi Əflatun Rufiyev çıxış edərək 2012-ci ilin birinci rübündə respublikamızda ictimai-siyasi və sosial-iqtisadi sahədə əldə olunan uğurlardan danışmış, tövsiyələrini bildirmişdir.